İmom Xameneyi:Amerkə məğsəd ironi ebordıneye.

İmom Xameneyi:İroni millət de vəhdəti çe fıtnə peştış darışte,amerkə hədəf ironi ebordıneye.

İslomi İnğlobi Yolə Rəhbər Həzrət Ayətullah Xameneyi de mərdumi mıxtəlifə təbəğəonku bıə çandə həzo nəfəri didoədə hamyəşone:Amerkə iyən çəy ısətnə prezdenti dəvominə hədəf iyən siyosət,İroni ebordıney və ıştə hərbi,siyosi iyən ixtisodi sultə bə kişfəri oqordıneye.

İslomi İnğlobi Yolə Rəhbər Həzrət Ayətullah Xameneyi zinə şambə Məbəsə idi ruji de İroni milləti mıxtəlifə təbəğəonku bıə çandə həzo nəfəri didoədə de bə İslomi Yolə Pəyğombəri(s) bə bənə İslomi sıftədə çe ımrujnə bəşəri camiyədə qıləy əvəzon icod kardey zərfiyyəti işorə kardey və çe cohiliyyət,zılm,zu,tars iyən istikbori camiyəon bə isloh,nicot iyən şərofəti camiyəon təbdil kardey,bə oxonə rujon fıtnə cəhəton iyən çın amerkə fıtnə dizayni kəşə dizayneron iyən təşviğəkəyon mığobilədə bə İslomi Respublikə mevğıyyəti işorəşon karde.

Bə Pars Tudey doə məlumoti əsos,İmom Xameneyi de bəşəri torıxi həmməysə muhimmə idi bə İroni milləti,İslomi ummət iyən bə dınyo həmmə ozodi tələbon de İslomi yolə şə`ni soyb bıə pəyğombəri besəti iyən Ğıroni təvəlludi təbrik votey,bo komilə insoni tərbiyəro çe İlahi bərnoməonku bəşəri aqahəti,İslomi mədəniyyəti sıftə çe ədolət,bıvəti iyən bərobərəti pərçəmi rost beyışon zıne və əlovəşon karde:Həlbəttə,Məbəsi fəziləton dərk kardey bənə əmə odəmon dərkiku bəpeye və bəpe çe Əmirəl-Muminini(ə) zıvoniku iyən de Nəhcul-Bəloğə mıtoliyə dərk kardey bıbu.

İslomi İnğlobi Yolə Rəhbər çe ımrujnə bəşəri camiyə veyniş məxsusən ğərbi camiyəş de cohiliyyəti devroni tafutinə zohir iyən ədəbiyyoti bəico,bə həmonə əxloği,zılm,beədoləti,zu tətbiği iyən istikbori nığılə fəsodon dıço beyış zıne və voteşone:İslom iyən mumin və etığodinə mısılmınon,çəmə bə puçəti iyən fəsodi səmt suğut kardə ımrujnə dınyo bə isloh,nicot iyən şərofəti ğulləon tərəf və çe cəhəndımiku bə vəhışti səmt bıbon.əmmo de ın şərti ki,de nığıl iyən umumi imoni əməl bıkon.

Həzrət Ayətullah Xameneyi de bə وَ لا‌ تَهِنوا وَ لا تَحزَنوا وَ اَنتُمُ الاَعلَونَ اِن کُنتُم مُؤمِنین» ayə istinodən əlovəşon kardə:Bəşəri nicotədə çe mısılmınon ğudrəti əsliyə şərt,Əbuzəri ğəzinə imone.Həlbəttə,İslomi Respublikədə fərdi surətədə çe nomdorə şəhidon və ya hətto çe benomə şəhidon miyono,bənə Əbuzəri insononımon hestebe. əmmo muhimmə çi ıme ki,jıqo qıləy imon camiyə dəqəto.

İslomi İnğlobi Yolə Rəhbər ıştə sıxanon dəvomədə de bə mərdumi bə lıski əzob-əziyyət dənoə iyən bə kişfəri zərəlon rosnə oxonə fıtnə işorə kardey voteşone:In fıtnə de İlahi ovandəti iyən de millət,məsulon iyən de ıştə koy çok zınə məmuron dasti hamuş kardey be,əmmo bəpe bızınəmon ki,çın fıtnə mohiyyət çiç be iyən boçi icod be.çəy uzvon ki bin iyən çəmə çe dışmenon mığobilədə bıə rəftor çokonə bəbe?

Həzrət Ayətullah Xameneyi çe fıtnə mohiyyətış amerkəş zıne iyən çe amerkəvıjon mıxtəlifə suyi-ğəsdon əsliyə hədəfi şərhədə voteşone:Amerkə iyən çəy ısətnə prezdenti dəvominə hədəf iyən siyosət,İroni ebordıney və ıştə hərbi,siyosi iyən ixtisodi sultə bəçəmə kişfəri oqordıneye.Çıro ki,qıləy kişfər de ın vusəti,cəmyəti,imkonoti iyən elmi və texnoloji navşemonon,əv həm jıqo qıləy həssosə coğrafi mərkəzədə boəvon tov vardənin ni.

İmom Xameneyi çe amerkə prezdenti təxribəkəyon iyən odəməkışton bənə İroni miləti unvoni zınə sıxanonış bo İroni miləti qıləy dıjdə iftiroş hisob karde və voteşone:Amerkə prezdent oşkoə formədə fıtnəqəron təşviğ kardedəbe iyən çe səhnə peştono həm amerkə iyən sehyonost rejim bəvon koməqonış karde. binobərin,əmə çe amerkə prezdenti cinoyətko zıneydəmon,həmən bə İroni milləti jeyə tələfot,ziyonon xoto iyən həm bə ğandə behtonon xoto.

Ə Həzrət çe meydoni amilon nevi bəyonədə votəşone:Səhnədə fəol bıə amilon dıqlə dastə bin.iqlə dastə ki,çe amerkə iyən sehyonist rejimi casusi aparaton de dığğəti səçın kardəşonbe və çe ziyodə pulisə əlovə,bəvon bənə çokonə hərəkət kardey,otəş jey,tars icod kardey iyən çe polisi dastiku fərol kardey məsələon barədə təlim doəşonbe ki,çın xəbis və cinoyətkoə amilonku veyə rəğəmədə de intizomi iyən əmniyyəti ğıvvon çokə ko oqətey bıən.

İslomi İnğlobi Yolə Rəhbər çe fıtnə meydoni amilon dıminə dastəş çe iminə dastə təsiri jiyədə bıə nevcıvonon iyən cıvononış zınə və əlovəşon kardə:In dastə de sehyonist rejimi iyən de casusiyə aparaton qıləy rabitəşon bıəni,bəlkəm xomə fərdon bin ki,çəvon dastə yol bəvon təsir kardedəbin iyən de həyəconi icod kardey,bə kali koon iyən şitə hərəkəton dast ğandedəbin ki,bəpe kardəşon nıbe.

İmom Xameneyi əlovəşon kardə:Imon piyodə ğıvvonin iyən çəvon vəzifə bə məkonon,mənzilon,idorəon iyən sənaye mərkəzon hucum kardey be və məələsəf  nodon iyən bexəbə amilon de xəbis və bədə koon təlimi vində amilon rəhbərəti,bənə 250 qılə məçiti xərob kardey,250 qıləsə ziyodə elmi iyən təlimi mərkəzon vironə kardey,bə bərği sənaye mərkəzon,bankon,mıolicə mərkəzon,umumi ərzoği mağazəon ziyon rosney qıləy ziyodə iyən dıjdə cinoyətonışon əncom doe və de bə mərdumi zərəl rosney,çəvon çandə həzo nəfərışon bə ğətl rosne.

Ə Həzrət de bənə qıləy məçiti cıvonon mıhosirə kardey iyən əvoni bəyji-bəyji sutuney və ya qıləy se sornə kinə kıştey və bemıdofiyə iyən beqınoə jenı-merdi kıştey bıə ğeyri-insoni iyən komilən vəhşiyə hərəkəton bə yod dənoə holədə voteşone:In koon çe naviku hozzı kardə bıə fıtnə planonku qıləy baxş be iyən əvon de sardə silohi və hətto de qamə silohon təchiz kardey bıəbin ki,çe xariciku daxil bıəbin və bo jıqo qıləy cinoyəton kardero çe fıtnə unsuron miyono pevolo kardey bıəbe.

İslomi İnğlobi Yolə Rəhbər bımiş təkid kardə ki,İroni milləti çe fıtnə peştış darışte,voteşone:İroni millət Dey manqi 22-ə ruji deştə milyonə hərəkəti,ın rujış ıştə veyə iftixoron kitobədə bə torıxi ruji təbdilış karde iyən de veyə sıxani iddiyo kardə kəson qəvon de qıləy mehkəmə mışti jey,fıtnəş hıtovne.

Həzrət Ayətullah Xameneyi oxonə fıtnədə de İroni milləti dasti amerkə məğlub kardeyış çe amerkə iyən sehyoniston 12 rujnə canqədə bıə dəboxtey dəvomışon zıne və voteşone:əvon ın fıtnəşon de ziyodə mığəddiməon bo vey dıjdə koonro bəro dəğandeşone ki,həlbəttə milləti ın fıtnəş okışte,əmmo ın kifoyət kardedəni iyən amerkə bəpe bəştə kardə hərəkəton cəvob bıdo.

İslomi İnğlobi Yolə Rəhbəri təkidışon kardə:De İlahi ovandəti İroni millət çoko ki,çe fıtnə kəmərış arışte,çe fıtnəqəri peşti həm bəpe barışto.