Əmirəbdullahiyan: hırdənəkıştəti çe sionist rejimi xıslətonkuye
İron İslom Respublika xarıci vəzir de işorə bə Fələstini hırdən Muhəmməd Əldore şəhodəti sorəqardış iyən bə Fələstini hırdənon ələyh sioniston cinoyəton, hırdənəkıştəti sionist rejimi xusiyətonkue zınəşe.
Bə Fars aqentiyəti seşəmbə ruji raporti əsos, ımsor, Fələstini hırdən Muhəmməd Əldore 23 minnə şəhodəti sorəqardışe ki Milodi 2000 minnə sorədə Ğəzzədə deştə dədə bə ico və de sioniston qullə şəhid bıə.
Həminə cəhətədə İroni xarıci vəzir Huseyn Əmirəbdullahiyan Huseyn Əmirəbdullahiyan İKS ictimai kanalədə həminə barədə nıvıştəşe: Fələstini be qınohə hırdən, Muhəmməd Əldore məzlumanə şəhodətiku 23 sor dəvardedə və 23 sore ki Fələstini inəon har şəv, çəy muğaviməti dastan ıştən hırdənon quşədə nəcva kardedən.
Əmirəbdullahiyan ijən bəyonış kardə ki Milodi 2023 minnə soriku tosə ısətde sionist rejimi pesoxtə iyən apartayd rejimi vositə, 40 qılə fələstini hırdən şəhid bıən əv ijən əlovəş kardə: hırdənəkıştəti sionist rejimi xusiyətonkue.
Bə statestikaon əsos ki hırdənonku mudafiə bərnomə səmtiku muntəşir bıə Milodi 2023 minnə sorədə sionist rejim Ğərbi sahilədə 31 qılə hırdən iyən Ğəzzə tanqədə 6 qılə hırdən kıştəşe.
