İroni Ostoro sərhəd şəhriku ixracat 20 faiz ziyod bıə.
250 həzo dollar muxtəlif ğeyri nat məhsulon ımsornə sori 1 minnə 6 manqi mıddətədə Ostoro sərhəddonku bə hamsuyə kişvəron sadir bıə.
Bə Tolışi Rədio raporti əsos, ımsornə sori 1 minnə 6 manqi mıddətədə 151 həzo 554 ton muxtəlif məhsulon və əmtəə de 250 həzo dollar erji Ostoro 3 qılə sərdəddonku bə məntəğə kişvəron sadir bıə ki vəzni cəhəto 300 faiz inkişof iyən vey bey nışo doydə.
Tojədən çı Ostoro qomruk idorə de ın xəbə elani raportış doə ki dəvardə 6 manqi mıddətədə xarıciku bə Qilon idxal bıə məhsulon həm vey kam bıə iyən 142 həzo 489 toniku bə 114 həzo 203 ton rəsə.
Bə təsdiğ bıə sənəd-ğərolon əsos İroni ticorət, məədən və sənaye təşkilot jığo hədəfon təiinış kardə ki tosə sori oxo İroni qomrukonku ğeyri nat məhsulon ixracati miğdor bə 5 milyord dollar bırəsi ki ın sahədə Ostoro sərhəd şəhri rol iyən vırə vey əhəmmiyətine.
Ostoro de zəmin, dıyo iyən osonə roon vositə de hamsuyə kişvəron rabitəş heste və bənə qıləy muhimmə tranzit mərkəzi çı Qilon ostani 80 faiz ixracati bə ohdəş qətə iyən əncom dodə.
In port 9 sor bəbe ki təsis bıə iyən Kaspi diyo hamsuyətiədə Ardəvil ostani kənoədəy.
In şəhr de Azərbaycan Respublika 38 kilometr zəmini və 15 kilometr diyoku mıştərik sərhəddış heste.
