Qilonıjon, maşini iyən mexanizmi kaştemoni bə kanə və dasti kaştemoni tərcih dodən.

Mehribonə əməson səlom, şımə ruj bə xəyr bıbu, dəvət kardəm de Tolışi Rədio bə ico bımandən və bə ımrujnə xəbə reportaj baxşi diğğət kənən.

Qiloni ditəsərrufat cihod idorə kaştemoni baxşədə mudir votışe: tosə bə ısət, 44 faiz yəni 102 həzo 510 hiktor, ostani bicoronədə kaştemon əncom bıə ki ım miğdoriku 75 faiz yəni 77 həzo hiktorədə, maşini surəti kaştemon əncom be.

Tojədən, de İrna jurnalisti mısohibədə, İbrahim Əkbərzodə votışe: Qiloni bicoronku 224 həzo hiktor, yəni 94 faizədə iminnə şum əncom bıə ijən bicoronədə tum kaştey həm, 98 faiz əncom be.

Əv fermeronku tələbış kardə ki bə kaştemoni tovsiyəon diğğət kənən iyən əlovəş do: tum kaştey prossesədə, plastikiku istifodə bıbu iyən rujədə xususi qamə saətonədə bə tum əqətə vırəon həvo doe lozime.

Qiloni ditəsərrufat cihod idorə kaştemoni baxşədə mudir votışe: de diğğət bə tumi de bicoron hevujəti həmohənq bey zərurəti, çok ıme ki 1 ya 2 ruji tumi kaşteyku bənav, plastikon peqətə bıbun, iyən kaştemoni bənav iyən i minnə şum jəey mərhələdə, bicoronədə siyohə fosfat iyən potasə qubrəonku istifodə bıbu.

Əkbərzodə əlovəş do: kaştemoni zəmonədə, hərzə aləfon miyoniku bardey koyədə həm standard miğdorədə zəhrəku istifodə kardey lozime.

İşorə kəmon ki İronədə Qilon ostan, bumi iyən keyfiyətinə bırzi istehsoli cəhəto, vey yolə istehsoləkə bə hisob omeydə ki bə 238 həzo hiktor, bicorə zəminon soyb bey xoto, İronədə kaştemoni cəhəto, iminnə rotbə iyən bırzi istehsoli cəhəto 2 minnə rotbəış heste.