Ulvi Həsənli şikot təmin kardə nıbe

“AbzasMedia” nəşri direktor, 11 manqe dastqirətiədə bə jurnalist Ulvi Həsənli bə istə mandə Boku İstintoğ Təcridxonə və Penitensiar Xıdməti vəynə məhkəmə şikotı oktyabrə manqi 24-də Xətai Rayon Məhkəmədə diyə kardə bə.

 Şikotədə Ulvi Həsənli, Boku İstintoğ Təcridxonədə bə bevəcə rəftori məruz mande, huğuğon darıştə be iddio  bə.
De vəkil bəyon karde, istintoğ təcridxonədə har ruj 1-2 saat ov doə bedə. Ulvi Həsənli şikotədə məruz mandə fiziki zorəti, bə məhkəmon ğeyri-insoni şəraitədə bardə-varde ğeyd bə.
Ulvi Həsənli bə məhkəmə nəzəş rosniyə ki, de istə əvlodon iyən vəkilon telefon qəpon quş doə be, təcridxonədə bə dustoğon vəynə işqəncon ictimai kardə bə peş bəy təhdid iyən təziyiğon tikiən ziyod bən.
Cəvobdeh tərəfiku – Penitensiar Xıdmət və Boku İstintoğ Təcridxonəku məhkəmədə iştirak kardəy bə ni. Hakimi bəyonış kardə ki,bə vəynə tərəfi məhkəmə vırə iyən fəxti barədə məlumot doə bə.
Hakim bə Ulvi Həsənli iyən vəkili şikoti iyən dəlilon quş bıdoən, əvonış təmin kardə ni.
Vəkil bəyonış kardə ki, Xətai Rayon Məhkəmə ğəroriku apelyasiya şikot bəkarde .
De korrupsiya tədğiği zınə bə “AbzasMedia” koy ro dastqirətiyon ponə sori noyabri 20-ku bino bən. Sıftə sayti direktor Ulvi Həsənli, direktor mıavin Məhəmməd Kekalov, sər redaktor Sevinc Vaqifqızı, peşoən dastqirətiyon tədğiğəkə jurnalist Hafiz Babalı, Nərgiz Absalamova iyən Elnarə Qasımova dastqir kardə bən. Əvon de Cinoyət Məcəllə 206.3.2-minə (i qrup xonəxon tərəfo kontrabanda) maddə ittihom bedən.
Dın maddə sanksiyə əvoni 5 soriku tosə 8 sor dastqirəti cəzo çəş kardə.