Qılı həm dini fəol dastqir kardə be

De narkotik vasiton beğanuni qardış ittihomi qətə bə dini fəol Elvin Zeynalovi barədə fevrali 1-də Boku Nərimanov Rayon Məhkəmə 4 manq dastqirəti ğərorış bekardə.

İstintoğ Dılətonə Koon Vəzorəti Sər Mıtəşəkkil Cinoyətkorəti Mıbarizə İdorə tərəfo barde bəyon kardə bə.
Fəoli əvlodon ttihomi pesoxtə be iddio kardən.
Maştağa ğəsəbədə jiyə dini fəol Elvin Zeynalov yanvari 31-də, çoştoni kəy nezi məğəzeni vədə mulki şəxson tərəfo qətə bə.
De çəy əvlodon sıxani, şamqovoni siyo olətinə odəmon Elvinşon bə kə vardə və kədə nəvən. Əvon şkafiku qılı şəvlo peğətəşone, bə çəy cif marixuana noə video kəşəşone. Ləzi bədiqə həmonə şəvlo iyən Elvin bardə bən.
Əvlodon bə Dılətonə Koon Vəzorət iyən Ombudsman Aparat bo Elvin Zeynalovi oğətə vırə muəyyən karde ro ovardəyon benəticə mandən.
Əvon, Elvini de har ruj ko məşğul be  və de kardə ğəzənci bə navko dastqir kardə dindoron və dini fəolon xeyzoni komək karde votedən.
Elvin Zeynalov, Ğaraboğ muharibə veteran, 2015-minə sor Naradaran hadison ro məhkum bə, sori bə nav de narkotik maddə savdı ittihomi dastqir kardə Etibar İsmayılovi hovə zoe.
Huğuğ mıdafiəkon azərboyconədə oxonə soron 700-sə ziyod dindoron dastqir be bəyon kardən.
Mısılmon İbe Hərəkati sərdor Taleh Bağırzadə bə ico, hərəkati 70-sə ziyod uzv holiədə dastqirətiədəy.
Dastqir kardə bə dindoron veyni de narkotiki ittihom kardə bən . Əmmo əvon ıştəni taxsikor zınedənin, de pesoxta ittihomi cəzo doə be votedən.