Azərboyconi Suriyadə Səforəti fəoliyyət bərpo bə

Azərboycon Respublika13 sorinə fasilə bədiqə Suriya paytoxt Dəməşqdə Səforəti fəoliyyət bərpo kardə bə.

Azərboyconi Xarici Koon Vəzorəti pevolo kardə məlumotədə, dın məğsədi Səforəti mıvəğğəti  vəkili bə Dəməşq şəhər ezam kardə be və fəoliyyət bino be ğeyd kardə bedə.
“Azərboycon Respublikə bə beynəlxalq huğuğon prinsipon əsos, Suriyadə dəvominə sulh iyən sobitəti bərğəror be dastək dodə. Azərboyconi çe Suriya miyonədə dustəti və həmkoəti əlağon bə nuə barzə mərhələ po noe və siyosi, iğtisodi, mədəni və əlidə sahonədə tərəfdorəti ozovzone ro nuə imkonon ofəyeədə Səforət dıtərəfinə əlağon inkişofi dastək bədo”, – XKV-i məlumotəda ğeyd kardə bə.
Azərboyconi Suriyadə səfir və Səforəti koəkon 2012-minə sori avqustəda çəyo beşəbin.
Suriyada Bəşər Əl-Əsəd hokumət məğlub bədiqə Azərboyconi XKV ponə sori dekabri 10-da  dıtərəfinə mınəsibəton bərpo be barədə bəyonat pevolo kardəş be.
 Dekabri 29-də Azərboyconi xarici koon vəziri mıavin Yalçın Rəfiyevi Dəməşqədə de Suriya mıvəğğəti hokuməti xarici koon vəzir Əssad Həsən Əş-Şibani mulağatonədə Azərboyconi “bın nuə onoə vocib mərhələdə de Tırkiyə Respublika bə ico çe Suriya tono be” bəyonış kardə və nezə fəxtonədə Dəməşqədə Azərboycon səforəti fəoliyyəti bino be eçın qəte oşko kardəş be.
Azərboyconi Prezident İlham Əliyevi dəvardə həftə Tırkiyə bə Azərboycon vığandə nuə səfir Birol Akquni etimodnomə ğəbul kardeədə, Azərboyconi Suriya məsələdə de Tırkiyə duş-bəduş mande bəyon kardəş be.
“Suriya məsələdə Azərboyconi çe Tırkiyə tono be ta sıftənə rujonkuş bəyon kardə.  Suriyadə sobitəti, əmniyyətəti təmin be və humanitar problemon həllədə Azərboycon de Tırkiyə bə ico istə koməkəti karde hozzoe”, – İlham Əliyevi fevrali 13-də bəyonış kardə