AİŞ Konqres çe İMT-ku beşe məsələ mızakirə bəkarde

“İMT muharibon, inson huğuğon darışte iyən pandemiyon vəy qəte zınəşni”

AİŞ respublikador senatoron bə Konqres Amerikə çe İbə Milləton Təşkilotiku beşe tələb kardə ğanun loyihə təğdim kardəşone.
Loyihə mətn təşəbbusi mıəllifonədə qılı, Enerji Komitə sərdor Mayk Linini (Yuta ştat) saytədə dərc bə.
Ğanun loyihə İMT iyən çəy aqentətiyon ro maliyyə bıriye, təşkilotu sulhmərominə missiyonədə iştirok nıkarde, Senati roziəti nıbə bə təşkilot oqarde ğadağan karde nəzərədə qətedə.
“İMT bə tiranon platforma iyən bAmerika, həmən mıttəfiğon hucum kardə vırə peqardə. Bı çimi ro pul ovoştone oğətənimon. Prezident Tramp Amerika bə iminə vırə noe xorici siyosətədə inqilob karde ro əmə çın saxta təşkilotiku beşəni, bə real ittifoğon nəzər səğandənine”, – Mayk Li bə “Fox News”-i muisahibədə bəyonış kardə.
Senator Li həmən ğeydış kardə ki, İMT bın soron dırozi bə diğğət iyən puli diyə məkə, muıharibon, inson huğuğon darışte iyən pandemiyon vəy qəte zınəşni.
2025-minə sor fevrali 4-də Amerika Prezident Donald Tramp İbə Ştaton İMT-də iştiroki diyə karde ro fərmon imzo kardəşe.
De çəy fiki, təşkilot zəif idorə bedə və bə istə vəy noə məğsədon bə vırə rocnidəni.