"Im qılı təmşoe və az bın təmşoədə rol nibəbardem”

Dastqirətiədə bə navkonə diplomat ıştəni diktatura rejimi ğıbon hisob kardedə.

Dastqirətiədə bə navkonə diplomat – 2012-2016-mınə soronədə Azərboyconi Amerika İbə Ştati səforətədə kotib, 2016-2019-minə soronədə Uruqvayədə Diplomatik Numayəndətiyədə koon vəkil vəzifədə ko kardə Emin İbrahimovi Boku Qonə Cinoyəton Məhkəmədə proses bino bə.
Məhkəmə hozzobə qırdemonədə Emin İbrahimovi vəkilon çəy şişə kabinədə ne, mıdafiəkon tono nışte barədə doə vəsotət hakimon tərəfo təmin bəbe. Fevrali 12-də dəvardə prosesəda çəy vəkil Fəxrəddin Mehdiyevi tono nışte icozə doə bə.
Məhkəmədə prokuror ittihom aktış elon kardə. İttihoməda, 22 iyul 2024-minə sori Emin İbrahimov və Kamal Şukurovi Boku Nizami rayoni əraziədə, çoştoni təsadufən rast ome nıvıştə bə. De iyəndı oşnə nıbə İbrahimov və Şukurov “Xalqlar dostluğu” metrostansiya tono şə fəxt dave qəte və Emin İbrahimovi de çəxo əy luziku je iddio kardə bedə.
Emin İbrahimov de Cinoyət Məcəllə 126.2.4 (de umumi xətoyninə çəmi, de xuliqanəti niəti bə xəşəti zərər je) və 221.3- (xuliqanəti – siloh və ya siloh ğismədə əşyoku istifodə karde kardeədə) maddon ittihom bedə. Çın maddon sanksiyonəda tosə 11 sori ozodətiku məhrumkardə cəzo nəzərədə qətə bedə.
 Emin İbrahimov ın nıvıştəyon həmmə pesoxtə be, hiç qılı taxsi nıbe, bın təmşoədə rol nıbarde bəyonış kardə.
Navkonə diplomati istintoğədən taxsi nıbe, ifodə doeku imtino kardəşe. Əy, bə işqəncə məruz mande, telefoni kodi zıne ro polis idorədə hətto tok doə be votəşe. Məhkəmədə bənə zərərkəşəy ifodə doə Kamal Şukurovi  kuçədə Emin İbrahimovi tərəfo de çəxo je   iddio kardəşe. 
Navkonə diplomat 2024-minə sor iyuli 22-də dastqir bə.
Emin İbrahimov, dastədə çəxo nıbe, de şər ğande dastqir, çe diktatura rejimi ğıbon be bəyon kardəşe.
Məhkəmə proses marti 12-də dəvom kardə bəbe.