Pars Today

Nyu-York postədə (İron de Baydeni lutfi atomi bıey astanədəy – Məloon Hərisi səbarzətişon pidə) nomi nəşr bıə məğalə de sənədış nıbə iddiyon cəhd kardedən ta bo ın mevzu Baydeni devləti təsiri və İroni atomi vəziyətiku səhih nıbə şəkil və fiki nışon bıdə.

Bə Pars Tudey raporti əsos ın məğalə pure de ədədoni ki səhih nin bəlkəm ğərəzinə surətədə bo Amerkə milləti miyono tars və be etımodəti icod kardeyo çəy plan kəşə bəy.

Məğalə sıftədə oməy: İron bəzne ta bə Baydeni devələt bə oxo rəsey 12 qıləsə vey bomba istehsol bıko. In iddiyo ki, elm və əsosış ni, cəhd kardə ki, vəziyət bevəc cılvə bıdo.

Bə Beynəl-Xəlğ etıborinə raporton əsos İron to bə ısət bo atom siloh istehsol kardeyo lozim bıə zumandətiş ni və atom enerji Beynəl-Xəlğ Təşkiloti nəzorəti jiyoe.

Çimisə əlovə İron çandə kərə elonış kardə ki, çəy atom bərnomə sırfən fəğət sulhine və bo atom silohon soxteyo hiç qıləy niyyətış ni.

Nyu-York post dəvomədə iddiyo kardedə:

Tehron 6200 kilo qramisə vey urani ta %5, %20, %60 qəncinış kardə. Qıləy holədə ki, ın ədədon imkonış heste texniki surətədə səhih bıbon, muhimmə nuktəy ki, məğalə bəy əhəmmiyətış doə ni, ıme ki, ta çın səviyyə urani qəncin kardey  de bə atom bomba istehsoli nez bıey məno ni. Bo atom siloh istehsol kardeyo, urani bəpe %90 fayizisə veyə səviyə qəncin bıbo, ki İron ta bə ısət bəy rəsə ni və jığo hərəkət de Beynəl_Xəlğ nəzorəton jıyo de ciddiyə nəticəon dim bə dim bəbe.

Məğalə co qılə səhih nıbə iddiyonku ıme ki, İron tobə ısət 7400 qıləsə vey inkişofinə sentrifuqonış heste ki, surətinə surətədə bəzne urani qəncin bıko. In ədəd de nıbə sənədi doə bəy və çəy əsliyə hədəf umumiyə fikonədə tars icod kardeye.

Həyğət ıme ki, ın sentrifuqaon yolə baxş de atom sazişi məhdodiyəton və Beynəl-Xəlğ co qılə sazişon şiddətinə surətədə nəzorəti jiyo ğərorışon heste.

İyən ın zərfiyəton yolə baxş atom sazişiku bəpeştə Trampi xaric be hucuminə siyosəton nəticədə ziyod bıə.

Bə Nyu-York post iddiyon əks, Trampi siyosəton de Beynəl-Xəlğ diplomatiya zəyif karde, əməli surətədə bo İron atomi inkişofonyo roş oj karde.

İyən məğalədə jığo oməy: İron ısət Nətənz məntəğədə qıləy təsisoti soxtey holədəy ki, əxtə nığıl soxtə bəy ki, aviya hucumon vədə əmonədə bəmande. In iddiyo həm pandovnə bıə  və de dəhşət icod kardey hədəfi icod bıəy. harçənd İron atom baxşədə tojə proyekton binoş kardə, əmmo ın hərəkəton həmmə bənə BAEA-i bıə Beynəl-Xəlğə Təşkiloti nəzorəti jiyədəy.

Nyu-York post məğalə coqılə baxşədə bəyon kardə:

İron vaxti ki, Tramp prezdent be 2400 kiloqırəmisə kam uranış qəncin kardə be. In iddiyo de Bayden və Trampi prezdendəti devrəon miyono fərğon nışon doey hədəfi elon bəy. Həyğət ıme ki, Trampi siyosəton, mincumlə atom sazişiku xaric be, əməli surətədə bə İroni atom fəaliyəton ziyod bıey boyis be, çun ki, ın kişvər sazişiku Amerkə xaric bıey bəpeştə ıştə məhdudiyətonış kam karde.

Ğasbu məğalə mıbohisə ın bıbo ki, sərost nıbə surətədə iddiyo kardə İron Amerkə vıjnımonədə bə Kamala Hərisi səbarzəti dumoye. və inki, İronıjon iyə İroni məsul şəxson bovəşon heste ki, demokraton bə ıştə kişvəri ələyh sırrinə hiyləon və təfrığə eğandey cərəyonin.

Nyu-York post nıvıştedə: əqər Kamala Həris vıjnımonədə səbarz bıbo, Amerkəvıjon bə terror və xuni ekarde şoyd bəbe.

Oşkoə surətədə ın cumlə nəyinki, əsosış ni bəlkəm de hiç şoyd bıə çi çəyku himoyə bedə ni. Jığo təhdidinə zıvoniku istifodə kardey nəyinki, bə demokraton nomizədon hucum bardeyo nıvıştə kəsi siyosiyə hədəfon nışon doydə, de həmonə, İron və demokraton miyono rabitəon icod kardey hədəfi.

Oxoysə bəpe bıvotəmon Nyu-York post məğalə etıborinə təhlilon və həyğəton doeysə bənav Amerkə camiyədə tars icod kardey dumoye.

Ədədon və məlumatiku ki, əsos və sənədış ni istifodə kardey, nəyinki bə ın nuktə təkidış heste ki, ın məğalə İroni atom məsələ siyosi karde hədəfi nıvıştə bəy, və qıləy betərəf və dəğiğə təhlil ni.