Imsornə Ərbəin şemonədə dınyo 40 qılə məmləkəto zəvvaron iştirak kardəşone.
Ərbəin şemoni əzəmət sorbəsor yol, bə dınyo həniən vey pevolo bedə. Im sor çe dınyo 40 qılə məmləkəto İnom Huseyn (ə) aşığon Ərbəin mərasimədə iştirak karde ro bə Kərbəlo tərəf şemon kardışone. Əlomətinə koe ki, bı əzəmətinə şemonədə iqlə mısılmonon ne, xristianə xalqon numayəndonən iştirak kardedən, bə Həzrəte Huseyn (ə) və Aşura faciə diqər şəhidon xatirə ıştə hurmət və ehtirami nişon dodən.
Əba Əbdullah Huseyn (ə) və çey səhabə, həmən duston şəhadəti ımsornə Çılımə rujədə İmom Xomeyni (r.ə) nominə huseyniyyədə de Ali Rəhbər Ayətullah Seyid Əli Xamenei iştiraki Ərbəin mərasimi əzadarəti təşkil bıe. “Maide.az” bə “Leader.ir” sayti istinadən xəbə doəşe ki, mərasim de Ğıroni ruşinə ayəton tilavəti bino bıə, çəyo “Ərbəinə ziyarət” handəşone, İmom Huseyn (ə) sandinə ğiyami hədəf və fəlsəfə barədə qəp jəşone. Əhli-Beyt (ə) vəsf kardə natiğon Həzrət Seyyid-uş-şuhəda (ə) və çe Kərbəloku dəro qıniə əsiron kərvoni kəşə mısibəton həxədə mərsiyə votəşone, tələbə və muəllim kollektivon de Ali Rəhbəri bahəm əzadarəti kardəşone, sinə jəşone. Mərasimədə Ayətullah Xamenei ağa ıştə muxtəsər votemonədə bə cıvonon həxi roədə sabit ğədəm bıe dəspardəşe. Mərasim de Ali Rəhbəri imoməti zohr və əsr nomojon vote bə orəx rəsə.
“Maide.az” imiən xəbə doşe ki, çe dınyo 10 qılə keşvəriku təbibon bə ımsornə Ərbəin mərasim umjən bıən ki, bə zəvvaron həvoyə tibbiə xidmət nişon bıdon. Əvon çe İron, Avstraliya, Tanzaniya, Hindiston, Pakiston, Bəhreyn, Səudiyyə Ərəbıston, Kuveyt, Livan və Suriyaku omə xoşməraminə tibbiə həmkaronin. Ərbəin Tibbiə ğərərqohi rəis Əhməd Cəlil Şəmri votəşe ki, Nəcəf, Babil, Bağdadi roonsə, Kərbəlo ziyarətqahon ətrofədə tibbi xidmət mukibon və mərizxonəon onoəşone. Əyo 650 təbib deştə mərami bə zəvvaron tibbi komək nişon dodən.
