Osmoniyə surəon-117

Osmoniyə surəon-117

Kərimə-Ğıroni sivi iminə Loğmani mıborəkə surə,Məkkədə nozil bıə və 34 qılə ayəku iborəte.beşək,bə ın surə Loğmani nom noey bəçəy xotoye ki,Loğmani de məğzi pur bıə nəsyəton bın surədə omə və yeqanə surəy ki,çın həkim və ağılmandə merdiku sıxan votedə.

Çın surə sıftədə Xıdovənde-Aləm  Ğıroni mehtəvo və məzmunış zumand bıə qıləy kitob elon kardedə və de ın tərtibibə yod dənoydə ki, Kəriomə-Ğıroni mehtəvo iyən məzmun ğoyme.ım kitob ğoym və bəy zərəl nibərəse.bə Ğıroni hiçvaxi  botıl varid nibəbe və bəvədə hiç qıləyn eyb   və noğisəti mevcud ni.ın kitob bənə qıləy həkimə alimi təlim və pand doydə,ibrət amizə  dastononış heste və hikməti qırd mənon ıştədə ehtivo kardedə.inson çı Kərimə-Ğıroni şua jiyədə həyğəton bə dast vardedə və əy ıştə əməlonədə həm   oko doydə və deçəy vositə bə  pərvərdıqori qeşə hidoyət iyən rəhməti şomil bedə.                                                                                   

Əlif. Lam. Mim. Im, hikmətinə kitobi ayəonin. Ki bə çokə ko əkəyon hidoyət iyən rəhməti boyis bedə.-1-3

Loğmani mıborəkə surə-4-5  ayonədə”Muhsinin” və çokə ko soybon jıləvoni təğdım kardedə: Əvon ki, nımoji bərpo kardedən iyən zəkot doydən və fəğət əvon bə axırəti yəğınışon heste. Əvon, çəvon pərvərdıqoriku bıə hidəyətədən və əvonin perəxəkəson.-4-5.

Bo perəxey iyən bə dayimi hərəbaxtəti rəsey ro həm,həmonə çı çokəti kardə kəson roye.qıləy ro ki,de Xıdo iyən Xıdo ofəyə xəlği rabitəş heste və çə şəxson ro ki,bə miad iyən məbdə qıləy komilə bovəşon heste.

Loğmani mıborəkə surə 10-əyədə çı tohidiku sıxan votedə və bə osmoni xılğəti,kurə və planeton atmosferədə bə şıkrə mandey iyən bandon xılğəti işorə kardedə və hamyedə ki,Xıdovəndi osmononış de bəçəş nıçiyə sutunon ofəyəşe.ım bə ın mənoy ki,osmonon iyən kurəon qıləy sutunışon heste,əmmo əvon bəçəş çiyedənin və əmə əvoni vindedənimon.ım bə cazibə iyn dafiyə ğıvvə qıləy lətif və zərifə işorə təbire ki,bənə vey  zumandə sutunone ki,osmoni kurəon bəçəş nıçiyə formədə bəştə tərəf cəzb kardedə.ın mevzu çı Kərimə-Ğıroni co elmi emcuzəonku qıləyni bə hisob omeydə ki,Rə`di mıborəkə surə dıminə ayədə əvımon izoh domone.

Peşonə ayə  çı bandon xılğəti barədə sıxan votedə və hamyedə:” və zəminədə ğoymə bandonış ğərolış doə ta(zəmin) şıməni nılorzıno”.

In ayə ki,Kərimə-Ğıronədə bənə əy ayə ziyode,nışon doydə ki,bandon çı zəmini sabit mandey təzmin kardedən və ımruj həm elmi nəzəku sabit bıə ki,bandon çand cəhətiku bə bəzmini sabitəti iyən oroməti boyis bedə. Çın nəzəku ki,çəvon rəğ-rişəon həmmə bə iyande anqılin və əvon bənə qıləy ğoymə zirehi zəmini çəy daxili təzyiğon mığobilədə hifz kardedə oqəteydə.ehanə ın bandon bıə nıəbin,ğasbu vironəkə buməlarzəon bə insoni bo jimon kardero qıləy məcol nıdon.çımisə əlovə bandon çı tufoni təzyiği vəy qəteydə və ehanə bandon bıə nıəbin,zəmini səth iyən səviyyə de  mardə vardə tufon iyən vavazon bəyənde əqıni.çı beməyon qit qıniye həm  çı Kərimə-Ğıroni elmi mecuzəonkuye.çıro ki,Kərimə-Ğıroni nozil bıə zəmonədə çı beməyon qıt qıniye  fenomen hevujə surətədə sabit bıə nıbe və Ğıroni ım məsələş oj karde.

Loğmani mıborəkə surə 12-ə ayə və çandə qılə peşonə ayə,çı həkimə Loğman iyən çın dıjdə insoni bəştə fərzəndi bıə nəsyəton ibaxşiku sıxan votedə.bın moyizəonədə etığodi məsələon,kali dini vəzifə iyən məsuliyyəton və həmçinin əxloği məbhəson həxədə bəhs bıə.

Loğmani həxədə islomi əzizə peyğombər(s)-iku rəsə hədisədə omə:”Loğman peyğombər nıbe,əmmo qıləy vey fik-fam iyən təfəkkur kardə bandə be..bə Xıdo imonış vardəbe,Xıdoş piyedəbe və Xıdo həm əvış piyedəbe və bəy ziyodə hikmətış baxş karde”.

Loğman bəştə fərzəndi moyizə kardeyədə,çoko ki,bın surədə omə,de “ya bunəyyə”-ha çımı zoə -xitob kardedə və de ın məhəbbətamizə təbiri,rufi iyən psixi cəhəto təsir mısbətə noydə ta çəy mesaj təsirin bıbu.Loğman bəştə fərzəndi sıftənə pandədə ki,çın surə 13-ə ayədə omə,hamyedə:” Və(bə yod dənə) ə zəmoni ki, Loğman bəşt zoə moyizə kardə holədə votışe: ha baləmə ha! bo Xıdo şərik ğərol mədə ki, bərosti, şırk qıləy dıjdə zılme”.

Təbiiyə formədə çı pıon vəzifə de məntığ iyən dəlili bə ico bəştə fərzəndon nəsyət doeye.qıləy ko ki, loğman bəy tıəkid kardedə.bədihiye moyizə iyən pandi koyədə bəbe bə əsliyə məsləon xısusi dığğət bıbu. bəçəy xotoye ki,loğman ıştə sıxani de tohid iyən şırki nəfy iyən inkor kardey bino kardedə.