Osmoniyə surəon-118

Osmoniyə surəon-118

(Ha çımı zoə)Ehanə (ıştı əməl)xardali donə vəznədə bıbu və çı taxtə sanqi(tavi) dılədə ya osmononədə ya zəmini(nığılə) vırədə bıbu, Xıdovənd əy(ğıyoməti ruji) bəvarde. boçiki, Xıdovənd lətif iyən aqahe.16

Loğman de Xıdovəndi  əhotəninə elmi iyən çəy dəğiğ hisobi bə yod dənoey,bəştə fərzəndi çəşnavi doydə ki,çı har qıləy insoni çok iyən bədə əməlon çanədə həm hırd iyən qədə həm bıbu,hətto çı zəmini nığılə vırədə bıə xardali donə ğədərədə həm bıbu və ya çı osmoni məxfiyə quşəonədə həm bıbu,lətif iyən xəbirə Xıdo bəvon cəzo iyən mıkofot doeyro,əvoni  bə ivrə cəm bəkarde.liza,hestemoni aləmi  sistemədə hiç qıləy çi qin nibəbe.

Insoni bə ğıyoməti ruji çəy əməlon hozzı bey iyən Xıdovəndi bəçəy rəftor iyən əməlon aqahəti bıə dığğət, ıştən çı qırd fərdi iyən iştimayi islohoton sərçəşməy.ım zumandə stimulinə ğıvvə,insoni bə çokə koon tərəf hərkət doydə və çı bədə koonku oqəteyədə həm vey təsirine.

Loğman ıştə nəsyəton dəvomədə,bə həmməysə muhimmə əməl,yəni bə nımoji işorə kardedə və ıştə fərzəndi piyedəşe ki,nımoj bərpoko.zira nımoj çı insoni deştə Xıdo bıə həmməysə muhimmə rabitə və peyvənde.nımoj çı insoni dıl və ğəlbi oğo,çəy rufi səfonin iyən çəy jimoni ruşin kardedə..

Ha(şinə) zoə! nımoj bıvot iyən əmr be məruf və nəhy əz munkərkə və saxtəti faxti bətı rəsə çiyon vədə mığovimətkə ki, ın(səbr) vocib iyən muhimmə koonkuye.17

Nımoji əhəmiyyət  iyən çəy  təsirinə roli həxədə dəvardə bərnomonədə ərz kardemone.əmmo,əmr be məruf iyən nəhy əz munkər həm çı Loğmani bəştə fərzəndi kardə nəsyətonku qıləyni be.əmr be məruf yəni bə çokətiyon tərəf  dəvət və nəhy əz munkər yəni çı bevəcə koonku nəhy kardey və oqətey.ın ko inev bə camiyə qıləy umumiyə nəzorəte və çı cəmyəti muhutu pok kardey iyən iştimayi rabitəon çok kardeyədə qıləy bemislə rolış heste.çun,Kərimə-Ğıron çı bəşəri tərbiyə iyən  hidoyəti kitobe,milləti bə ın muhimmə fərizə əncom doey tərəf dəvət kardedə və məsuliyyət ğəbul kardey hissi bəvonədə bəyjiko. ehanə cokəson  bə çokəti iyən dırıstkoəti təşviğkəmon,di ya rə ıştə təsiron bə cəmyəti oşkoə formədə bənoe.əmmo,əgər  çı fəsod iyən inhirofi mığobilədə tam bıjənəmon iyən sakit bınıştəmon,fəsod bə həmmə vırəon rəğ və rişə bəğande və camiyə vırto-volo bəbe bəmande.çı Loğmani nəsyəton ğalibədə Kərimə-Ğıroni ın mesajon ımi rosneydə ki,bəbe bə cəmyəti umumi formədə nəzorət bıbu,iştimayi rabitəon solim,çokə ko soybon təşviğ və həmməkəs bo məasi və qınon tərk kardeyro,tərğib və təşviğ bıbon.

Və ıştə dimi(de təkəbbıri) millətiku məqordon iyən zəminisə de məğrurəti ro məpo. zira Xıdovənd hiç qıləy təkəbbırin, fəxr kardə kəsış piyedəni.və bə ro pıyədə(ıştə rəftorədə) motədil(miyonəro şıəkəs) bıbi və ıştə sədo bəkamkə(rost məkə) zira, həmməysə bə xoş nıomə sədo, çı hə(ulaği) sədoe.18-19

Təvozukorəti iyən sodəti ,de camaati sırə diməti və koonədə etıdol çı Loğman bəştə fərzəndi doə co pandonku qıləyniye.çı təkəbbır iyən eqositəti simvolonku qıləyni,məst iyən məğrurə formədə bə ro şıeye ki, ım həm çı insoni daxili yoləşəxt iyən xudbinəti nışon doydə.islomi muaşirə ədəbon bə ionsoni icozə doydəni ki,de təkəbbırəti iyən məğrurə formə çı insonon kənoyku dəvardo.jıqo qıləy əhvol-ruhiyyə ki,çı təkəbbır iyən xudpəsəndətiku nəşət seydə,bə iştimayi robitəon iyən əloğəon sardəti boyis bedə.jıqo bə roy pıye boyis bedə ki,inson bə Xıdo bandəon nisbətədə  təkəbbırətiko və ıştəni bəpe bıqəto iyən çı əslə kəmoliku bımando..