Osmoniyə surəon-120

Osmoniyə surəon-120

Insoni xılğət iyən çəy xılğəti iminə maddə və ıştə kəmol iyən ozavziye mərhələdə bıə inson,mevzuonkuye ki,Səjdə mıborəkə surə 7 və 9-ə ayəonədə bəy işorə bıə.bın ayəonədə Xıdovənde-Aləm bə harçi çokə xılğəti bə veyçok iyən ğoymə əsos dığğətış doə və bə insoni doə çandə qılə dıjdə nemətonku sıxan votedə.sıftədə bə ın nuktə işorə kardedə ki,Xıdovənd çı insoni xılğətış sıftədə çı tul iyən giliku ofəyəşe.ım çı Xıdovəndi əzəmət iyən ğudrəti nışon doydə ki,bənə insoni bıə qıləy məxloği çı sodə iyən kamə erjış bıə maddəku ofəyəşe.çımisə əlovəbə insoni yod dənoydə ki,tı çı konco oməş və kon vırə bəşeş?

8-ə ayədə bə insoni nəsli ofəyəmonəti və çı Odəmi fərzəndi bə dınyo omey peşonə mərhələ işorə kardedə və hamyedə:peşo Xıdovəndi , çəy nəslış exroc iyən bemiğdorə(beğeymətə) oviku ğərolış doe.-8

Iyo ayə məğsəd çı odəmi nutfəy ki,həyğətədə  çəy qırd vucudi dəparzınə bıə çiye və çı jimoni məbdə iyən fərzəndi təvəllud və çəy nəsli dəvom.

9-ə ayədə bə insoni inə bətni aləmədə çı insoni təkamuli vey mırəkkəbə mərhələ və həmçinin bə mərhələ ki,çı tuliku ofəyə bıə de tobə çəy ozavziyə zəmoni işorə bıə və hamyedə:peşo çı insoni əndomış tənzim karde və ıştə rufiku bəy puş karde və boşmə dıl,çəş iyən quşış ğərolış doe.

Bəşəri ıştə inə ləvədə bıə təkamuli prosesədə çı nutfə bastey bəpeştə, dol və ruşeym sıftədə qıləy nəbati jimonış heste.yəni fəğət de xoərki inkişof kardedə.əmmo bənə heyvoni həyoti nışonəonku bıə hiss iyən hərəkət və bənə insoni  jimoni əlomətonku bıə dərrokəku,bəvədə hiç qıləy xəbə ni.əmmo inə bətnədə çı ruşeymi təkamuli  bə qıləy mərhələ rəseydə ki,bino kardedə bo hərəkət karde və tədricən co qıləy insoniyə ğıvvə bəvədə bəyji bəkarde.ın həmonə mərhələy ki,Kərimə-Ğıron əy de bə rufi dəmey kəlmə təbir kardedə.qıləy boho ğeymətin iyən de şərofəti pur bıə ruf və qıləy ruf ki,Xıdovəndi bə insoni puş kardə.ım çı insoni məğami barz və şərofətin bıey nışon doydə.çən, votey bəbe ki,çun Xıdo ım rufış bə insoni puş kardə,əve çəy ın ğudrətış heste ki,rufi nəzəku ıştəni de reçin iyən ğəşənqə sıfəton iyən aliyə xısləton dərosto.ayə dəvomədə bə ionsoni dıl,quş iyən çəşi xılğəti işorə kardedə ki,ımon bo insoni hissi iyən fiki idrakon qıləy vəsilə və vositəy və Xıdovənd həmım əbzoronış çı bəşəri ixtiyorədə ğərolış qətə.peşo ayə bə yod dənoydə ki,məxloğ bəbe ıştə xalıği mığobilədə şukrko.qıləy holədə ki,şukrəkəyon vey kamin......

Çın surə ayəon bəhsi de insononku dı qrupi vəsfi yəni qınokor iyən muminə insonon bəhsi dəvom doydə və çı mucrim iyən qınokorə fərdon ğıyoməti ruji vey yavə vəzyəti jıləvoni tərsim kardedə.kəşedə: “Və əgər bıvindoş qınokoron ki, ıştə pərvərdıqori palu ıştə səşon saru qətə(və voteydən:) Xıdolim ha!(ıştı və`də doə çiy) vindemone iyən məsemone. çən, əməni(bə dınyo) oqordın ta əmə çokə ko bıkəmon. həyğətən, əmə bə yəğın rəsimon”.-12

Harçənd əvon tələb bəkardeyn ki,bə dınyo jimoni oqardon,əmmo çəvon ın tələb ğəbul bıənin ni.zira,umumən həni bə dınyo jimoni oqardey ro mumkin ni.həni ko çı koyku dəvardə və əvoni qıləy vey yavə sərnıvışt iyən talr çəş kardedə.Kərimə-Ğıroni şivə və metod ıme ki,çı mucrim iyən qınokoron çehrə tərsim iyən kəşə holədə çı muminon nışonə həm bəyon kardedə.Xıdovənde-Aləm de həyğiyə muminon xısləton bəyon kardey,bə həxı nisbətədə çı imon vardəkəson şovğ iyən iştiyoği ziyod kardedə.

Iyo çandə qılə ayəon ğolibədə çı muminon xısusiyyət və xısləti aşmardedə və hamyedə: “Fəğət ə kəson bəçəmə ayəon imonışon heste ki, hafaxti ım ayəon bəçəvon yod vardey bıbu, bə səjdə şedən və deştə pərvərdıqori sıtoyişi təsbih voteydən və əvon təkəbbır kardedənin”.

Çoko ki,zikr kardemone,Səjdə mıborəkə surə 15-ə ayə ki,ehanə ikəs əy bahando ya bıməso.səjdə bəy vocib bəbe.peşonə ayədə bə muminon kali co xısləton işorə kardedə və hamyedə:”  (Muminon şəvi faxti)Iştə vırəonku əyştedən və ıştə pərvərdıqori de tars iyən umu vanq jeydən və çəmə bəvon ruzi kardə çiyon infoğ(baxş) kardedən. Hişkəs zınedəni bəçəvon çəşon ruşinəti boyis bıə kom muhimmə mıkofot boəvon niyon kardə bıə. ım çəvon əncom doə koon mıkofote”.

Bəle,sıbhi vaxti  iyən həmçinin şəvi nimədə bo nımojiro pebey xoto,Xıdovəndi boştə həmonə bandəon vey barzə mıkofotonış nəzədə qətəşe və ğərəz Xıdovəndi ıştən hiç kəs çə həmonə mıkofotonku xəbədo ni.liza vey çoke ki,bi ilahi həmonə behisobə mıkofoti ğəbul kardey xoto,hejo sıbhi zəmondə rə bəsə səpoysə bəyştəmon və de ilahi razo-niyozi məşğul bıbəmon.Məzaci`,Əliflam səjdə və əlif lam tənzil çın surə coqlə nomonku bə hisob omeydə.