Osmonyə surəon-125

Osmonyə surəon-125

Şayiə pevolo kardey iyən psixoloji yavə təblığot sosyal dıjdə dardonkuye ki,Mədinə camiyədə rəvocış pəydu kardəbe.ın zərəlinə təzahur,peyğombər(s)-i vey norohət kardedəbe.bın cəhətədə ayəon millətiku tələb kardedə ki,çın noloyığə koonku dast bıkəşon,bə ilahi təğvo rioyətkon və həxə sıxan bıvoton.çıro ki, təğvo çı zıvoni isloh və həxə kəlmə sərçeşməy və həxə sıxan votey həm ,bo insoni əməli islohiro vey çokə amilonku qıləyniye.

Əhzabi mıborəkə surə 72-ə ayə bə de insoni vositə ilahi əmonəti həml kardey iyən şıkırney işorə kardedə.inson qıləy fovğəladə istedodoş bıə mevcude.joqo ki,əv bə Xıdo zəmini dimisə bıə canışıni məğami həm rəsey zıneydə və de mərıfət,nəfsi təhzib iyən kəmolati barzə məğamon rəseydə.

“Həyğətən, əmə(ilahi) əmonətro bə osmon iyən bandon təklif domone. çən, əvon çəy şıkırneyku tarsin(bə dumo pekırin). əmmo inson əvış bəştə duşış peqəte. şək ni(bə əmonəti rioyət nıkardero) əv sıtəmkor iyən nodone.”-72

In istedodon deçəy ozodəti iyən ixtiyoron bə icoye bə əv ın royku  deştə ixtiyori bə ico dəvardedə.osmon iyən zəmin və bandon inev ilahi mərıfəti soybin.əvon Xıdo zikr iyən təsbih kardedən və Xıdo əzəməti mığobilədə mutin.əmmo qırd ımon təkvini iyən məcburi formədən.inson yeqanə məxloğe ki,deştə irodə və noməhdudə formədə, ğadire ta bə osmoni ğulləon kəmoli tərəf  rost bıbu.zira,Xıdovənde-Aləm bə bəşəri məxsusə xısusiyyət iyən imtiyazonış doə ki,çı osmon iyən zəmini hiç qılə mevcudatonku bə ın xısləti malik nin.ım imtiyozon həmonə ilahi əmonəte və beşək ım bo insoni qıləy məsuliyyıət vardedə. əmmo,məxloği veyni bə Xıdo ın əmonəti xəyonət kardedə və çəyku Xıdo rozi nıbə vırəonədə oko doydə.əvon ıştə ağl iyən irodə botılə roonədə istifodə kardedən və ın ko bə camiyədə zılm iyən beədolətəti pevolo bıey boyis bedə.bə həmonə dəlili xoto,bə bəşəri rəftori cohilonə və zolmonə rəftor nom noey bıə.

Səba mıborəkə surə Kərimə-Ğıroni sivı çominə surəy və Məkkədə nozilı bıə.çun,bın surədə Əsba ğovmi sərquzəştonku qəp jıey bıə,əve bəy ın nomışon noə.bənə co Məkki surəon çın surə məbhəson veyni etığodi məsələon,məxsusən çı məbdə iyən miadi həxədəy.

Səba mıborəkə surə sıftənə ayə bə Xıdovəndi dınyo iyən axırətədə bıə malikiyyət və hakimiyyəti nəzə kardə holədə hamyedə:”sıtoyiş  bə Xido məxsuse ki,osmonon iyən zəminədə bıə çiyon çəy mole(bəy məxsue) və axırətədə(həm) həmdo-sıtoyiş boəye və hikməti soyb iyən aqahe”.

Har dıqlə dınyo hakimiyyət iyən malikiyyət bə Xıdo məxsuse və çı har qıləy nemət iyən har qıləy çoçinə formədə xəlğ bıə məxloğ bəy məxsuse.ehanə məxloğat həm bə həmdo-sıtoyişi loyığin,əvon həm çəy pokə zoti sıfəton iyən felon şuaku bəhrə bardə kəsonin.binobərin qırd həmdon iyən sıtoyişon bəçəy pokə zoti oqardedə.

Bəçəy elm iyən hikməti əsos,bə dınyo hakim bıə ım heyrətamizə nizomədə har qıləy çi ıştə vırədə ğərol qətəşe və çı har qıləy mevcudi ehtiyocon çoko lozıme doey bıə.

Peşonə ayə bə pərvərdıqori benəhoyətə elmi iquşə işorə kardedə və hamyedə:”bə zəmin daxil bıə iyən çəyku xaric bıə çiyon və osmoniku nozil bıə və bəvədə bəpe şıə çiyon,həmməy zıneydə və Əv, mehribon iyən əbaxşe”.

Xıdovənde-Xalığ hestemoni aləmi qırd koon detal və cuziyyatonku xəbədoye.Əv,bə zəmin dəşə iyən çəyku beşə çiyon həmməy zıneydə.Əv,çı voşi qırd ğətrəon bə zəmini nığılə vırə bardedə və və çı zəmini nufuz ğəbul nıkardə ğat iyən layonədə anbo kardə bıə ovonku aqahe.Əv,həmçinin bə zəmin eşə və qıləy ruj bə havz və veytərovətinə doon təbdil bıə beməyon donəonku xəbədoye.həmçinin,zəminiku xaric bı rəsəyon,bə cuş omə iyən çəyku peşoməninə ovon beşə honiyon və mılxəs çı zəmini nığılə vırəku beşə har çiku Əv,xəbədoye və zıneydə.

Əv,çı osmoniku çiç nozil beydə və ya osmon bəpe şeydə xəbədoye və çı həşi həyotbaxş kardə şoləku, fəzoədə sərqərdon qardə və zəmini tərəf omə meteoritonku və həmçinin çı dıyoonku rost bıə  iyən avəon təşkil doə buxaronku və xulosə hestemoni aləmədə bıə qırd çiyonku aqahe.

Aya bəşəri həmmə alimon elmon bə qırd ın məlumaton i quşə və hissə həm əhotəşon heste və ğərəz Xıdo ikəs çın koonku xəbəş heste?...