Şiiə yolə alimon-10-Seyyid Rəzi

Əbulhəsən Muhəmməd bin Musa Musəvi Bəğdadi və de Seyyid Rəzi nomi məşhur bıə şiyə yolə alim Hicri-Ğəməri 359-ə sori Bəğdadədə bə dınyo ome.çəy nəsəb dədə tərəfiku bə İmom Mosə Kazım(ə)-I və inə tərəfiku həm bə İmom Zeynul Abidin(ə)-I rəseydəbe.çəy pı Əbu Əhməd Huseyn de Tahir və Zulmənğəbəteyn ləğəbi məşhur be və ıştə zəmonə məşhurə odəmonku qıləyni be.Əv,çı seydon yol,bə milləti şikoyəton rəsə məsul şəxs iyən Həcci əmir be.Seyyid Rəzi mo Əbu Məhəmmədi kinə Fatimə qıləy təğvanin iyən alimə jen be və şeyx Mufid “Əhkamun-Nisa” ktobış bəçəy tələbi əsos nıvışteşe.işəv şeyx Mufid (r) həzrəte Fatimeye-Zəhro(s)  hanədə vindedə ki,İmom Həsən(ə) iyən İmom Huseyn(ə)-I dastonış qıləy holədə ki,əvon hırdən bin,qətə və çəy palu vardeşe və hamyeşe:ha şeyx ha! bə ın dıqlə fərzəndi fiğhi elmi omut!.şeyx Mufid ıştə vində ın haniku bə heyrət dəşəbe.həmonə ruji sıbi zəmonədə Seyd Rəzi iyən Seyd Murtəzo inə çəvon daston qətə holədə çəy palu vardşe və voteşe:ha şeyx ha! bə ın dılqə fərzəndi fiğhi elmi omut.şeyx Mufidi hol çın hodisəku əvəz be,bəme və ıştə hanış boəvon bəyon kardışe və çın dıqlə seydon təlim-tərbiyə koş bəştə ehdəş peqəte.

Seyyid Rəzi hejo ıştə elmi təhsili sıftəku cəhdon bə ostadon iyən şoqirdon heyrəti boyis be və çandədə ə həzrət çı yolyəti sırdiku bəpe şedəbe,çı alimon tərəfiku de təhsin iyən təşviği iyən çı deşmınon tərəfiku de həsodət iyən pəxıləti dimbədim omeydəbe.məşhure ki,əv nəv sinnədə beyədə bə “Nəhvi” elmi ostadi sıvoli jıqo dəğiğ iyən zumandə jəvobış doe ki,əyo bıə kəson çəy hozzı cəvobətiku bə heyrət eqıniyəbin.Seyyid Rəzi Şeyx Mufidisə əlovə çı ziyodə dini alim iyən elmi şəxsiyyəton məhzəriku bəhrəş bardə və dini dərsonış omutə.əv Bağdadədə jiyə ıştə zəmonə məşhurə alimonku bənə sərf.nəhv,bəlağət,təfsir,hədis,fiğh,usul iyən kəlami bıə mıxtəlifə elmonış bə dast varde və çəvon har qıləyniku lozım bıə bəhrəş barde.de ın tərtibi ıştə əsri elm və fənnon  məlumatonış təkmil kardeşe.Seyyid Rəzi bo elmon bə dast vardero ziyodə şovğış hestebe və şiyə alimonku əlovə,çı əhli-sınnəti alimonku həm istifodəş karde ta bə mıxtəlifə məzhəbon hədis iyən fiğhi kitobon qıləy komilə təsəllıtış bıbu.bə həmonə dəlili xoto,çəy bo mınozirə və debat kardero zumandə elmi ğudrətış hestebe və de qırd mənbəon çok-çoki zıney və zumandə istidlolon vardey,ıştə həx iyən səhih  zınə çi isbot kardedəbe.