Şiiə yolə alimon-24 Seyd ibn Tavus

Harçənd İbn Tavus fiğhi elmədə nəzə soybonku be,əmmo əv bə fətvo sadir kardey vadi daxil nıbe və bə nımoji hukmon ayid fəğət iqlə kitobış nıvıştə.əv bəsə har qıləy mevzusə vey bə əxloği və mənəvi məsələon dığğət doydəbe və çəy əsəron veyni həm bın mevzuədə be.min cumlə “Misbahul-Mutəhəccid”,”Muhasibətun-Nəfs”,”İğbalul-Ə`mal” və “Kəşful-Muhcə”  əsəron.çı İbn Tavusi həmməysə məşhurə əsər “Əlluhuf əla ğətlit-Tufuf”  yəni “bə biyoboni kıştə bıə kəson sutunə ahon”  mənoədə bıə qıləy kitobe ki,de”Luhuf” nomi məşhure.bə Seyd ibn Tavusi təlif kardə co kitobon əks ki,əvon dıvo iyən ziyorəti babədə bıən,çın kitobi qıləy torıxi cəhətonış heste.əv,dılış hestebe qıləy mıxtəsər və bəloğətinə kitob tədvin və tərtibko ki,Əba Əbdullah İmom Huseyn(ə)-i zayiron Aşurə ruji ziyorəti zəmonədə deştə bınovnon və Aşurə vağeyə həxədə həni bə co torıxi mənbəon mutaliyə kardey ehtiyocişon nıbu……

Seyd ibn Tavus çın kitobi mıxtəsər nıvıştey barədə jıqo nıvıştedə:”deməkə ki,zayiron kamə fırsətışon heste.sıxanım kırt karde və ixtisorə formadə bəyonım karde və həmonə əndozə kifoyət kardedə ki,ğəmi bəon bə handəkəson dimi oj və imoninə fərdon peroxno ki,çın ləfzon ğolıbədə ğeymətinə həyğəton noəme”.bo bə ixtisori rioyət kardero kitobədə zikr bıə rəvoyəton sənədon silsilə həzf və şodey bıə və fəğət oxonə ravi ya rəvoyət bəvədə nəğl bıə mərcə kitob omə.

In kitob İmom Huseyn(ə)-I ğıyomi Mədinə hərəkətiku de tobə usəra və əsiron bə vətən oqardemoni şərh kardedə.ın kitob dastoni tərzədə tənzim bıə və ım xısusiyyət Luhufi kitobış  bə tərtib iyən formə tərzi cəhəti xoto,çı co rəvoyəti kitobonku co bedə.İbn Tavusi kitob ziyodə tərəfdorış pəydu karde.çandə kərə tərcumə,şərh,təlxis və hətto nəzmi formaədə bekardəşone və de tosə ımrujnə ruji bənə qıləy metəbərə məğtəli zıney bedə…..

Hicri-Ğəməri haftminə əsrədə İslomi dınyo siyosi,məzhəbi iyən fərhənqi vəzyət,nışon doydə ki,ım devron islomi tale və sərnıvıştədə təsir noə hodisəon pure.monğolon dumo yənde bə islomi sərzəminon həmlə kardey və Əbbosi xilofəti suğut.çın devrə torxıi həmməysə muhimmə qıləyni bıə ki,islomi dınyoədə fiki,fərhənqi iyən əxloği behronon bə vucud omey boyis be.bın şərayitədə şiyə alimon ki,çandə dırozə soron çı təzyiğ iyən fişaron jiyədə bin,bo islomi əğedə və fərhənqi marzon nığo doeyro ziyodə koonışon bə vırə rosne və çı monğolon tərəfiku bə islomi səmt bıə təhdidonışon de Xıdovəndi koməki,qıləy fırsət icod be və ımışon bə islomi mədəniyyəti sutunon ğoym bıey təbdilışon karde.de ın tərtibi şiəyon Hicri-Ğəməri haftminə əsrədə məxsusən Bəğdadədə mədəni iyən iştimoyi cəhəto bə qıləy məxsusə məğami rəsin.ım yolə alim de mıxtəlif nev mevzuon barədə kitobon tərtib və nəşr kardey,Əhli-Beyt(ə) məğtəli rəvoc doey və de islomi co məzhəbon tərəfdoron mınozirə və debat məclison bərpo kardey və məhdəviyyəi əndişə və nicotədə zuhur məxsusən dıvo mədəniyyəti tərvic doey,çı şiəyon iştimoyi və mədəni vəzyəti ozavziyədə bemislə rolışon ifo kardə….