Şiiə yolə alimon-46

İslomi iyən şiyə yolə alim iyən fəğih Şəhid Sani Hicri-Ğəməri 911-ə sori şəvvalə manqi senzədə Livani cənubədə Amili məntəğədə bə dınyo çəşış oj kardə və çı şiyə vey nomdor iyən ixtixorinə fəğih iyən mıştəhidonku be.ım yolə şiyə alim həm bənə Şəhide Əvvəli de təşəyyu iyən şiyə nomi dini royədə bə şəhidət məğami rəse.

Şəhid Sani cəddo-əbo iyən xıyzoni veyni alimə zumrədə bin və bə həmonə dəlili xoto Şəhid Sani xanedani de “silsilətil-zəhəbi” yəni de telıə zəncirə nomi məşhure.şəhidi fərzənd Şeyx Həsən  qıləy yolə alime və usuli fiğhədə məşhurə “Məalimul-Usul” kitobi muəllife ki,bə zəmon həm elmiyyə hovzə dərsi kitobonku bə hisob omeydəbe.bə həmonə cəhəti xoto,bəy  sahibe məalim ya məlaimi soyb votedən.Şəhid Sani kinə nəvə həm de Seyd Muhəmməd Musəvi Amili nomi məşhure,qıləy yolə şiyə alime ki,”Mədarik” kitob həm çəy vey muhimmə kitobonkuye və qıləy fiğhi metəbərə kitobe.Şəhid Sani fərzənd və nəvə bə çın dıqlə kitobi əhəmiyyəti xoto, elmiyyə hovzəonədə elmiyyə hovzəonədə de sahibul-məalim iyən sahibul-mədarik nomi zikr kardey beydə.Şəhid Sani məalimi soyb bıə dıqlə nəvəonku həm çın silsilə dıqlə məşhurə uləmanonkuye.həmçinin bənə Mosə Sədr.Şəhid Seyd Muhəmməd Bağır Sədr  və çəy Şəhidə hovə Bintul-Huda bıə  Sədri xanedan həm  Şəhid Sani nəslikuye…

Şəhid Sani  bənə Şəhid Əvvəli Livani cənub Cəbəl Amili millətikuye və har dıqləyni çı şiyə məşhur,nomdor və istedodinə alim və mıştəhidonku bıən və har dıqləyni de təşəyyu iyən şiyə bıey qıno bə şəhodəti məğami rəsəyn.harçənd ziyodə Əhli-Beyt(ə)-I piyə və şiyə alimon deçəvon deşmınon dasti bə şəhodət məğami rəsəyn.əmmo,Şəhid Əvvəli iyən Şəhid Sani  bəçəy xoto de nomon məşhur bıən ki,əvon çı şiyə ğoymə fəğihonku və ixtifoxoronku bıən və  har dıqləyni berəhm və zolımonə formədə şəhid kardey bıən.Şəhid Sani  ki,Hicri-Ğəməri daminə əsrədə jiyə və deştə ziyodə onoqniyə cəhdon Ali-Muhəmmədi(s) fiğhış bə dınyo co noxtəonış intişor kardeşe.çəyku bın dıjdə aləmədə bə həşto qılə nezi əsəron yəni kitob və risoləon mandə ki,çəvon har qıləyni bə şiyə fəğihon ro nışon doə əsəron bıə.çəy “Ərrovzətul-İlahiyyə” məşhurə kitob ijənən qıləy sabitə kitobe.ım kitob çı şəhide Əvvəli “Lumətul-Dəməşğiyyə” kitobi həxədə nıvıştə bıə qıləy şərhe ki,ısət həm çı donzə imominə şiyə həmməysə nomdor və məşhurə kitobe və elmiyyə hovzəonədə ısət həm təlim doey beydə.Şəhid Sani  coqləyni muhimmə kitob “Məsalikul-Əfham”  kitobe ki,Muhəğğığ Hilli nıvıştə “Şəraye” kitobi həxədə bıə şərhe….

Şəhid Sani  bənə co əksər islomi yolə alimon ıştə elmonış həmə hırdənəti zəmonədə və de Kərimə-Ğıroni omutey binoş karde.çəy iminə mellim çəy əzizə pıə bıə və çəy bədiqə həm ıştə ğovmi yolonku təlimış vinde.çən,ıştə vətənədə  rayic bıə elmon omutey bədiqə Şəhid Sani çı co alimon məhzəriku elmon omuteyro,bə ətrofədə bıə di iyən şəhron səmt şe.Cəbəl Amili məntəğə alim perosnə dıyo be ki,əyo çokə elmiyyə hovzə və mədrəsəon hestebe və bın mədrəsonədə ziyodə və yolə alimon de tədrisi koy məşğul bin.Şəhid Sani  bə Kərək yəni bə Muhəğğığ Kərəki vətəni şe və çın mislış nıbə alimi palu de elmi məşğul be və çəy şoqirdətiş ğəbul karde.bə zəmonədə Muhəğğığ Kərəki hələ bə İron səfəş kardəş nıbe…..