Şiiə yolə alimon-47

Şəhid Sani  bənə Şəhid Əvvəli Livani cənub Cəbəl Amili millətikuye və har dıqləyni çı şiyə məşhur,nomdor və istedodinə alim və mıştəhidonku bıən və har dıqləyni de təşəyyu iyən şiyə bıey qıno bə şəhodəti məğami rəsəyn.harçənd ziyodə Əhli-Beyt(ə)-I piyə və şiyə alimon deçəvon deşmınon dasti bə şəhodət məğami rəsəyn.əmmo,Şəhid Əvvəli iyən Şəhid Sani  bəçəy xoto de nomon məşhur bıən ki,əvon çı şiyə ğoymə fəğihonku və ixtifoxoronku bıən və  har dıqləyni berəhm və zolımonə formədə şəhid kardey bıən.Şəhid Sani  ki,Hicri-Ğəməri daminə əsrədə jiyə və deştə ziyodə onoqniyə cəhdon Ali-Muhəmmədi(s) fiğhış bə dınyo co noxtəonış intişor kardeşe.çəyku bın dıjdə aləmədə bə həşto qılə nezi əsəron yəni kitob və risoləon mandə ki,çəvon har qıləyni bə şiyə fəğihon ro nışon doə əsəron bıə.çəy “Ərrovzətul-İlahiyyə” məşhurə kitob ijənən qıləy sabitə kitobe.ım kitob çı şəhide Əvvəli “Lumətul-Dəməşğiyyə” kitobi həxədə nıvıştə bıə qıləy şərhe ki,ısət həm çı donzə imominə şiyə həmməysə nomdor və məşhurə kitobe və elmiyyə hovzəonədə ısət həm təlim doey beydə.Şəhid Sani  coqləyni muhimmə kitob “Məsalikul-Əfham”  kitobe ki,Muhəğğığ Hilli nıvıştə “Şəraye” kitobi həxədə bıə şərhe….

Şəhid Sani  bənə co əksər islomi yolə alimon ıştə elmonış həmə hırdənəti zəmonədə və de Kərimə-Ğıroni omutey binoş karde.çəy iminə mellim çəy əzizə pıə bıə və çəy bədiqə həm ıştə ğovmi yolonku təlimış vinde.çən,ıştə vətənədə  rayic bıə elmon omutey bədiqə Şəhid Sani çı co alimon məhzəriku elmon omuteyro,bə ətrofədə bıə di iyən şəhron səmt şe.Cəbəl Amili məntəğə alim perosnə dıyo be ki,əyo çokə elmiyyə hovzə və mədrəsəon hestebe və bın mədrəsonədə ziyodə və yolə alimon de tədrisi koy məşğul bin.Şəhid Sani  bə Kərək yəni bə Muhəğğığ Kərəki vətəni şe və çın mislış nıbə alimi palu de elmi məşğul be və çəy şoqirdətiş ğəbul karde.bə zəmonədə Muhəğğığ Kərəki hələ bə İron səfəş kardəş nıbe….

Şəhid Sani  iqlə mıddət Bələbəykdə çı Livani torıxi iyən muhimmə şəhronədə  mande və çə vıron elmiyyə hovzəon rəyisətiş bəştə ehdəş peqəte.bın zəmon elmi şehrəti sayədə əy mərcəiyyətış pəydu karde və diyori alim və fazilon vey diyəroə vıronku çəy elmiku istifodə kardey xoto,bəçəy məhzəri omeydəbin və çəy elm iyən əxloği bərəkətiku oko doydəbin. Şəhid Sani  islomi mıxtəlifə məmləkətonədə və mıxtəlifə məzhbi alimon palu omutəşbe və bə penc qılə yəni Cəfəri(İmomiyyə),Hənəfi,Şafiyi,Maliki və Hənbəli məzhəbiku çokə aqəhətiş hestebe və komilə surətədə çəvonku xəbədo be.bə həmonə dəlili xoto,Şəhid Sani  çın penc qılə məzhəbiku tədris kardedəbe.əv bo islomi mıxtəlifə məzhəbon tərəfdoron bəçəvon ğəbul kardə əğedə və mənbəon əsos fətvo dodyəbe və bəçəvon sıvolon cəvob doydəbe…..

Şəhid Sani  de jıqo qıləy elmi və fiğhi məğami soyb bıey,deştə tədrisi koyədə ziyodə məşğuliyyəton bə ico,kitobonış təlifış karde,elmiyyə hovzəon idorə kardedəbe və yolə şoqirdonış perosniye və ım təvazukorə yolə şəxsiyyət veyə cəhdonış karde.çəy əhvolatədə nıvıştəşone ki,əv həmçinin deştə xıyzoni həm qırd koon məşğul beyəbe və .joqo ki,həvo toyki beyədə və şəv rəseyədə,əv bə qıləy hə və ulğai suvar beydəbe və şəhriku xaric beydəbe və ezım cəm kardedəbe ta kardey bızıno ıştə aylə ehtiyocon bərtərəfko.həmçinin bəçəy kə veyə şıey-omey hestebe və alim iyən addi camaat dayima çəy mehmon beydəbin ta çəy məhzəriku bəhrə bıbon.ım buzurquvarə şeyx şəxsən əvoni ğəbul kardedəbe və hiçvaxti çın koyku sısıt beydənıbe və oqoneydənıbe.