Şiiə yolə alimon-63

Peyğəmbəri(s) nəsliku bıə oxonə məsum İmom Zəmon(əc) ğeybəti devronədə təşəyyu torıx və şiyə alimon jimon,de etat-petati pur bıə torıx bıə.əmmo,de macəra pur bıə torıxi dırozi  şiyə məktəbi de mıxtəlif nev fiki iyən ideoloji nizomon dimbədim omyədə bənə qıləy mıstəğil iyən bəyjiyə məktəbi nomi ıştə əsolət və orijinələtiş hifz  kardey iyən oqəteyış zınə.ım ğudrət bo qıləy məktəbi ki,çandə əsr dumo yənde çı islomi iyən ğeyri-islomi kişvəron hakimon ğəzəbi jiyədə ğərolışon qətə,bə şiyə əsliyə təfəkkuri yəni bə imomət iyən viloyəti sutunon ğarzıxoye.şiyə təfəkkuri de ğərbi fəlsəfə təfəkkuri dimbədim omə ciddiyə devronədə bıə xısusiyyəonku qıləyni, Şiyə fəlsəfi məktəbon zumandə devr bıə.bın devronədə islomi dınyo iyən şiyə alimon vavriski doə alimonku qıləyni,de Mirdamad nomi məşhur bıə Muhəmməd Bağır Əstərabadi bıə…

Mirdamad çı şiyə məşhurə  filosof,mutəkəllim,fəğih iyən şayir bıə.əv islomi elmon zəminədə xısusən fiğh,Ğıroni təfsir iyən hədisi nəzə soyb be və qıləy mıstəğilə rayış hestebe.lakin çəy elmi şəxsiyyətədə dəvəşə sahə çəy hikmət iyən fəlsəfə zəminədə bıə mahirəti iyən zumandəti bıə.əv çı Səfəvi zəmoni həmməysə dıjdə həkim be ki,İsfəhani fiki hovzədə deştə zuhur və bə meydon omey,fəlsəfəş əvəz karde.bəçəy xoto,əv de muəllime-salis nomi məşhur be.çəy bənav Ərəstu ya Aristotel de muəllime əvvəl aya iminə mellimi nomi,Farabi de muəllime –sani yəni dıminə mellimi nomi məşhur be.Mirdamad jıqo hisob kardedəbe ki,navnə fəlsəfi cərəyonon vey ibtidoyiye və bə həmonə dəlili xoto,səy kardedəbe çı yunani fəlsəfə usulon de irfoni cilvəon umujko və de şiyə etığodi təlimon islomi fəlsəfə nizomi nışon bıdo ki,ıştən bəy yunani hikməti nomış noe….

De Mirdamad nomi məşhur bıə Muhəmməd Bağır Əstərabadi Səfəvi zəmoni çı şiyə həmməysə dıjdə filosof,mutəkəllim,fəğih iyən şayir be və çı İsfəhani fiki iyən ideoloji məktəbi sutunonku qıləyni bə hisob omeydəbe.çəy həmməysə vey muhimmə fəlsəfi əsər,”Ğəbəsat” kitobe və çəy həmməysə məşhurə şoqird həm Molla Sədra bıə.Mir Muhəmməd Hicri-Ğəməri 969-ə sori bə dınyo ərsə ğədəmış noe.çəy pı seyd Muhəmməd Huseyn Əstərabadi və çəy inə həm çı Muhəğğiğ Kərəki ya həmonə Muhəğğiğ Sani kinə bıə.demiyən Mirdamad ıştə hırdənəti soronış ıştə fazil,təğvanin iyən elmpərvər xıyzoniku iborət bıə pı-mo tərbiyə jiyədə dəvordıne.Mir Muhəmməd ıştə mığəddimə təhsilon dəvordıney bədiqə bə Məşhəd şəhri şe və çə həmonə elmiyyə hovzə yolə alimonku bəhrəş barde.peşo təhğiğ iyən bəhsi koyədə deştə aliyə hədəfon bənav bardero,bə Ğəzvin,Hərat və çə devri həmməysə muhimmə elmi mərkəzonku bıə bə İsfəhan şəhron səfəş karde və ıştə umri çandə soronış həmonə şəhronədə dəvordınışe….

Mirdamadi həmməysə muhimmə ustodonku qıləyni  Seyd Əli Musəvi Amili,çəy buzurquvarə dayi İbadul Ali Amili və çı Şey Bəhayi pı Şeyx İzzuddin Huseyn Amili bıə.bə nəzə rəseydə ki, Mirdamadi bə Ğəzvin,Hərat iyən Məşhəd şəhron bıə səfəon,bəştə ustod Şeyx İzzuddin Huseyn Amili tabe bıey xoto bıə ki,ım yolə alim bə siyosi iyən iştimoyi şərayiti xoto ıştə mandə vıron əvəz kardedəbe.Şey Bəhayi çı Şeyx İzzuddin Huseyn Amili fərzənd be ki,navnə bərnoməonədə bəy işorəmon karde.