Şiyə dınyo yolə alimon-98

Əllomə Vəhid Behbəhani  ki,İslomi elmonədə qıləy mohirə alim be,fiğh iyən usuli elmon zəminədə ziyodə kəşfonış bə yodiqor haşteşe və çı Şiyə elmiyyə hovzədə qıləy nuyə ufuğış təsisiış karde.Əllomə Vəhid Behbəhani  nəyinki,fəğət usuli-fiğhi zəminədə qıləy nuyə elmış icod karde,bəlkəm bənə kəlom,rical iyən hədisi elmonədə həm bə barzə elmi dərəcəon dastış pəydu karde.çun fiğhi iyən usuli bəhson çı alimon palu qıləy barzə vırəş hestebe,mərhum Əllomə Vəhid Behbəhani  icod kardə fevğaladə elmi kəşfon ki,qıləy dıjdə təhəvvulış bə əməl vardəşbe, ğafil mande və ya kam məlum be.mərhum Vəhid Behbəhani ricali iyən dirayə bəhsonədə ziyodə kəşfonış həm bə vucudış varde....

Əllomə Məhəmməd Bağır Vəhid Behbəhani zəmonədə  usuli fiğhi elm ki,iştihodədə əsosə rolış heste,bə tənəzzuli dıçoş kardə be və elmi əhl həm bəy kamə dığğətış kardəbe.əllomə bəçəy himoyə iyən mıdofiyə əyşte və usuli elmış sənibəton bəyji və bərpoş karde.usuli fiğh qıləy elme ki,bəvədə çə ğaydəonku bəhs beydə ki,şəri hukmon istinbotədə mıştəhidon çəyku istifodə kardedən və oko doydən.bəçəy xoto,fiğh usuli elm  qıləy əbzori elme ki,fiğh deçəy vositə fəri şəri hukmon  çəvon əsli mənbəonku yəni kitob,sınnət,icmo iyən ağliku istinbot kardedən.Əllomə Məhəmməd Bağır Vəhid Behbəhani qıləy inğılobış icod karde ki,çəy səmərə mıxtəlifə sahəonədə çandə da qılə iminə dərəcədə bıə fəğih iyən usuli alimon perəsey be.mərhum Əllomə Vəhid Behbəhani ustod mərhum seyd Sədruddin Rəzəvi Ğummi votedəbe:çəmə zəmonədə iqlə usuli mevcud ni.əmmo qıləy kırtə zəmonədə çəy bəpeştə bə Əllomə Vəhid Behbəhani  cəhdon təsiri xoto,usuli fiğhi elmədə qıləy nığılə təhəvvul iyən əvəzon bə əməl ome və çəy şoqirdon çı Şiyə usuli fiğhi bəhsonışon vey nva bardeşone.....

Əllomə Vəhid Behbəhani  de əxborgərəti nomi məşhur be.əxbariyyyun bə alimon idastə votey beydə ki,bəçəvon əğedə əsos bo dini dəstur v əmron fameyro fəğət zohir kifoyət kardedə.əvon çı Şiyə rivoyi əsliyə çoqlə kitobi həmmə rəvoyəton səhih hisob kardedən və jıqo zıneydən hakəs de bə ın mənbəonədə rəsə hədison ovard və muraciyət kardey,ıştə dini təklif iyən vəzifəon bızıno və həni ehtiyoc ni bə qıləy mıştəhidi təğlidko.həyğətədə,Əxbariyyun iştihod iyən mıştəhidiku təğlid kardey cayiz zıneydənin.çımon mığobilədə usuliyyun ğərolışon qətə ki, bəçəvon etığodi əsos bo dini mənbəon kifoyət ğədərədə təsəllut pəydu kardey və elmi iyən ağli dəğiğə metodon oko doey,dini hukmon mıxtəlifə vıronədə istinbot kardedən.sayir kəson ki,çın ixtisosiku bəhrə bardedənin,bəpe bə ım ko mıtəxəssison ovardkon.ğeyri mıtəxəssion bə mıtəxəssisi muraciyət kardey məsələ çı əğloniyyəti miyono qıləy ğəbul bıə əğloni ğaydəye və usuliyyun bın bovədəy ki,ım ğaydə dini hukmi təyin kardeyədə həm cariye......