Osmoniyə surəon-166

Osmoniyə surəon-166

Əmmo çı muminon mığobil noxtədə beimon iyən həx-hisob nızınə fərdonin ki,əvon həmçinin bəştə pı-om həxon həm rioyət kardedənin.joqo ki,hamyedə:ə kəson ki,bəştə pı-mo voteşone:uff bəşmə!aya bəmı və`də doydon ki,(maqi bəpeştə) məbus(cəm kardey) bəbemon?qıləy holədə ki,çımı bənav ziyodə ğovmon dəvardən(və hiç qıləyni bəyji bıənin) və ədıqlə hejo(boştə fərzəndon oqardeyro)Xıdoku komək tələb kardedən.(və bəştə fərzəndon votedən)vay bıbu bətı!imon biyə ki,Xıdo və`də həxe.əmmo,əv (de təkəbbır iyən yoləşəxti)votedə:ımon ğərəz əfsonə co qıləy çi ni”.de ın tərtibi,əv hejo jəqo həm bəştə kufri isror kardə iyən əy idomə doydə.

Iyo Kərimə-Ğıron de qıləy bəyoni bə Ad ğovmi macəra işorə kardedə.ın ğovm bə Xıdovəndi bəvon əto kardə ziyodə neməton dılədə ğərğ bıəbin tainki,bıtpərəstəti çəvon miyono rişəş ğande.bəçəvon ın inhirofəti xoto,Xıdovəndi çəvon miyono həzrəte Hud(ə)-ış məbus karde ta əvoni bə rostə roy səm dəvətko.Hud(ə) bəvonış vote ki,Vahidə Xıdo pərəstışkənən və sıvoy əv co pesoxtə bıə mə`budon sıtoyiş məkənən.peşo əvonış təhdidış karde və voteşe ki,mı boşımə omə dıjdə ruji əzobiku tarsım heste.əvon cəvobədə voteşone:aya tı oməş ki,əməni deştə duyə sıxanon çəmə xıdoonku cokoş?ehanə tı rost votedəşbu,bəmə və`də doə əzobi boəmə biyə.əmmo,Hud(ə) çəvon beməno və beməxə sıxanon cəvobədə hamyeşe:elm iyən aqahəti fəğət Xıdo nəzdədəy.əve ki,zıneydə kon zəmonədə əzob nozil bəbe. peşo əlovəş karde ki,çımı vəzifə ıme ki,bomı vığandə bıə çiyon bəşmə bırosnom.əmmo,mı şıməni qıləy dastə vindedəm ki,hejo ıştə nodonəti iyən cəholətədə mandəyon və bəy isror kardedəyon.

Hud(ə) de ziyodə pand iyən nəsyəton rostə roş bəovon təbyin kardeşe və hiç qıləy uzr iyən bəhonə vırəş bəovon nıhaşteşe.

Əhğafi mıborəkə surə 35-ə ayə peyğombər(s)-i bə səbr iyən sabitğədəməti dəvət kardedə və hamyedə ki, fəğət tı niş ki,de ın ğovmi mıxolifət iyən deşmınətiyon dimbədim mandəş.həmmə “ulul-əzm” yəni şəryəti soyb bıə peyğombəron de jıqo muşkilaton dimbədim omən və əvon səbr iyən istiğamətışon nışon doə.

Xıdo dıjdə peyğombəron jimon məxsusən islomi peyğombəri(s) jimon çı ziyodə muşkilaton mığobilədə benəhoyətə və behəddə mığoviməti bəyon kardedə.çə həzrəti deşmınon çəy mığobilədə mandin və de ə həzrəti veyə mıborizəşon barde.peyğombər(s) ıştə risoləti iyən milləti bə islomi tərəf dəvət kardey xoto bə Taif şəhri omə zəmonədə,çəvrə camaati bə ə həzrəti anədə sığışon je ki, xun çə həzrəti lınqonku cari bedəbe.nodononku idastə hətto bə ə həzrəti yavə sıxan iyən dojmonışon həm doe.əve ə həzrət noçor mande ki,bə qıləy boğı tərəf pənoh bıbu dəvito və çı qıləy do soğnədə nışte.ə həzrət əyo de Xıdo razo-niyozi zəmonədə çə həmonə nodonə millətiku bə Xıdovəndi şikoyətış karde.peyğombər(s) bın şərayitədə bəştə səbr,istiğomət  iyən tov vardeyış dəvom doe tainki,oxoyədə islomi ıştə səmərə və barış doe.çə həzrəti ayin nəinki,Hicoz iyən Ərəbıstonədə pevolo be,bəlkə çəy nur bə dınyo ğərğ iyən ğərbi səmt dətıve və ımruj həm dıyo ço tərəfədə insonon de tohid iyən vahidə Xıdo pərəstəti şuari sıbh iyən şəvədə jimon kardedən.....

Muhəmməd(s) surə Kərimə-Ğıroni çılo-haftminə surəy  və surə nom həm çın sur dıminə ayədə omə ki, əyo islomi peyğombər(s) həzrəte Muhəmməd(s)-i nom əyo zikr bıə.de islomi deşmınon cihod kardey,vey muhimmə mevzuye ki,bın surədə çəyku bəhs bıə.ın surə sivı həşt qılə ayəku iborəte və Mədinədə nozil bıə.bın surədə bəhs bıə co mətləbon çımiku iborəte:İmon və kufr və çı muminon de kofiron vəzyəti mığoyisə,de islomi deşmınon cihod iyən mıborizə bardey və bə canqi əsiron ayid bıə nuktəon,mınofiğon kardə əməlon,zəminisə seyr karde iyən navkonə ğovmon tale,bə infoğ iyən ıştə moli baxş kardey inev cihod zıney və bə de kofiron sulh iyən aşişəti aqyid bıə bəhson.