Osmoniyə surəon-177
Osmoniyə surəon-177
Ğafi mıborəkə surə 5-ə ayədə bə ın muhimmə nuktə dığğət kardedə ki,əvon çoko ki,həx bəçəvon soyəx omeydə,əy rəyrə təkzib kardedən.həyğətədə,ın ayə ımi rosneydə ki,əvon həxı zıne-zıne inkor kardedən. qıləy holədə ki,həx boəvon oşko bıəbe iyən bəvədə hiç qıləy şəkko-şubhə mandəni.ayədə oxoyədə hamyedə:çun əvon həxışon təkzib karde,əve hejo ıştə sə qin kardə və sərqərdonə holədən.
Peşonə ayəonədə bə Xıdovəndi benəhoyətə ğudrəti işorə kardedə və hamyedə:”aya əvon bəştə səy sape bıə osmoni diyə kardedən ki,çokonə əmə əvımon bina kardəmone və(de astovəon) ziynət baxş kardəmone və bəvədə hiç qıləy tək ni?(6).
Ğafi mıborəkə surə 8-ə ayədə hamyedə ki,əmə ımonımon bo bandəon bəsirət iyən pandiro ğərol domone ki,oqardon iyən tobəkon.aya ikəs ki,bo insonon,zəmin iyən osmoni xılğəti deştə qırd əzəməti ofəyəşe,bımyon ijən sənibəton bəyji kardey nibəzıne?
Ğafi mıborəkə surə 11-ə ayədə hamyedə:”və osmoniku de bərkəti pur bıə ovımon nozil karde.çən,deçəy vositə boğon iyən dıvey bıəninə donəon perosnemone.və barzə xımo donəonki,(çəvon) bəyənde dəçıkə xıçəonış heste.(ımon) bo bandəon ruziye və de voşi mardə sərzəminon bəyji kardemone.(bəyji bıə bımyon və ğəbonku) xaric bıey həm jıləvoniye....
De ın tərtibi Xıdovənde-Aləm bəştə bandəon ıştə neməton bə yod dənoə holədə,hamyedə ki,şımə çı miadi nımunəonku ha sor bın dınyoədə mışohidə kardedon.mardə iyən hışk bıə sərzəminon de voşi ğətrəon voye təsiri bə hərəkət omeydə və bəyji bedə.ın bə jimoni tərəf cınbə-cuşəti iyən hərəkət,ın həyğəti bəyon kardedə ki,aləmi ofəyə Xıdovənd ıştə mardə bandəon ijən sənibəton bəyji karde iyən bə jimon vardey bəzıne.
Ğafi mıborəkə surə 11-ayəku de tosə 14-ə ayəonədə bə peyğombər(s)-i dılsandi doydə ki,fəğət tı nişki,çı kofiron tərəfiku təkzib kardey bıəş,bəlkəm navkonə ğovmon həm ıştə peyğombəronışon inkor kardə. liza,Xıdovənde-Aləmi çəvon barədə doə bıə və`dəon bə həyğət rəse və əvon bə qıləy dardnokə tale və sərnıvışti dıço bin......
Ğafi mıborəkə surə 19-ə ayədə bə maqi təzahuri işorə kardedə və hamyedə:”maqi səkərot həxədə bome bərəse (bəy bəvoteyn)ım həmonə çiye ki,çəyku fərol kardedəbiyon”.
Maqi səkərot qıləy holəte ki,bə məstəti iyən sərxoşəti mandedə ki,bə mardey mığəddimə və vəsə əsəron rəsey xoto,bə insoni və beşedə və əv qıləy şiddətinə iztirob iyən noroməti dılədə bedə.maq,həyğətədə qıləy muhimmə intiğali və ovaştey mərhələy ki,çı insoni de dınyo bıə qırd rabitəon bırniye bedə və əv bə qıləy aləmi ğədəm noydə ki,ın aləm boəy komilə surətədə noməlum və boəy tojəye.inson maqi ləzədə qıləy tojə vindemon pəydu kardedə,çın dınyo dayimi nıbey dərəseydə vıə maqi bəpeştə bıə hodisəon qədə-qədə mışohidə bedə.iyoe ki,çəy bədəmi qırd vıron dəhşət iyən vəhşət dəqətedə və bənə qıləy mastəti formə boəy bəvə omeydə,əmmo əv həyğətədə məst ni.
Maq iyən mardey bo qıləy muminə insoni çın dınyoku bə de ilahi neməton pur bıə qıləy co aləmi intiğal və ovaştey mənoədəy və ım intiğal bo hiç kəsi hoston ni.çıro ki,insoni ruh dırozə soronədə bəçəy bədəmi pemujiyə və deəy qıləy rabitəş bıə.
İmom Sadığ(ə)-iku dəparseyşone ki,çıro insoni ruf çəy bədəmiku xaric beyədə,əv norohəti hiss kardedə.həzrəti hamyeşe:bəçəy xotoye ki,əv deəy ruşdış kardə perəsə.dırıst və səhih bənə ıme ki,qıləy pıxə dandoni insoni qəviku kəşedən bekardedən.təbiiye ki,əv peşo oroməti hiss kardedə.əmmo,co bıey ləzə və an vey dardnok və dıjış veye.
