Osmoniyə surəon-183

Osmoniyə surəon-183

Turi mıborəkə surə 11-ə ayədə bə munkir iyən təkzibəkəyon tale və sərnıvışti işorə kardedə və hamyedə: ”çən,vay bıbu həmonə ruji bo təkzibəkəyon”.

Qıləy holədə ki,çı dınyo əvəz bıeyku həmmə kəsi vəhşət iyən iztirob dəbəqəte,əmmo həmməysə dıjdə vəhşət  bə təkzibəkəyon soyəx bome ki,ım ıştən həmonə ilahi əzobe.

Turi mıborəkə surə 12-ə ayədə ın quruh iyən dastə təğdım kardedə və hamyedə:”həmonə(fərdon)ki,de yavə (botılə)sıxanon votey səşon tasb bıə”.

Əvon Kərimə-Ğıroni ayəon du iyən çı peyğombər(s)-i mecuzəon sehr hisob kardedəbin və çəy vardə kəsi həm məcnun iyən səfi zıneydəbin.əvon bə həyğəton məsxərə kardedəbin və bəy istehzo kardedəbin. əvon deştə botıl iyın beməntığə sıxanon bə həxə sıxanon ələyh bə canq şedəbin və bəştə yavə məğsədon rəsyero,har qıləy behton iyən duyə sıxanonku oko doydəbin.

Ayəon dəvomədə çəvon sərquzəşt iyən tale barədə jıqo hamyedə:”həmonə rujədə ki,əvon bə cəhəndımi otəşi səmt tojney bəbeyn(bəvon bəvoteyn:)ım həmonə otəşe ki,(şımə)hejo əy inkor kardedəbiyon”.(13-14).

Turi mıborəkə surə 15 iyən 16-ə ayədə hamyedə:”aya ın(əzob həm)sehre? ya şımə əy vindedəniyon?bə həmonə otəşi varid bıbən və bısutənən.dılon heste səbrkənən ya səbr məkənən,boşımə mısoviye.(farğ kardedəni) zira,fəğət bəşmə kardə koon(xoto) cəzo doey bedon”.

Bəle,ın şımə ıştən əməle ki,bəşmə səmt oqardə və şımə yəxəş qətə.ım bə ğıyoməti ruji insonon cism iyən əməlon  ijən sənibəton bəçəvon səmt oqardey məsələ qıləy tojə təkide və həmçinin bə Xıdovənde-Aləmi ədoləti qıləy təkide.çıro ki, cəhəndımi otəş ğərəz insoni ıştən əməlon nəticə co qıləy çi ni.

Turi mıborəkə surə 17-ə ayəku jəqoşə bə Xıdovəndi bo pərhizkopron nəzədə qətə benəhoyətə mıkofat və səvobi işorə kardedə  və hamyedə:”həyğətən,pərhizkoron(vəhışti)boğonədən və (çəvon əyo)ziyodə nemətonışon heste və çəvon pərvırdıqori bəvon doə çiyon(xoto)əvon şo və xoşholin və çəvon pərvərdıqori əvonış çı cəhəndımi əzobiku oqətəşe”.

Vəhışti əhl çəvon pərvərdıqori bəvon əto kardə çiyonku vey xoşholin və əvon bın barədə bə dılnıştə iyən çokə sıxanon votedən.çəvon dılon  çı harcurnə ğəmo-ğussəku təy bıə və əvon əyo qıləy fovğəladə oroməti hiss kardedən.məxsusən ki, Xıdovəndi çəvon cəzo nıvindey həxədə qıləy xotırcəmətiş baxş kardə və əvonış çı cəhəndımi otəşiku mıhofizəş kardə oqətəşe.vəyo bəvon votey bəbe:”bəştə əncom doə əməlon xoto,bəhənən iyən peşomənən.nuş bıbu boşımə”.

Beşək,vəhışti hardənin iyən peşoməninə çiyon bənə ın dınyo xorəki məhsulon ni və çəvon hiç qıləy bə xoşnıomə nəticəşon ni.çımisə əlovə,vəhışti əhli miyono çın vəhışti neməton bə oxo rəsey iyən təmom bıey xoto həm hiş qıləy norohətçəti və niqəronəti mevcud ni.bə həmonə dəlili xoto həm,vəhışti neməton komilə surətədə nuş kardənin,ləzzətin iyən bə coni nıştə.vəhışti əhli coqlə nemətonku qıləyni həm ım bəbe ki,əvon səfə formadə bıə taxton sape iaynde kəno təkyə bəjen və ıştə peşton bəvon dəbəhaşteyn və deştə dust iyən oşnoon bə ico bıey iyən deəvon unsiyyətədə bıey xoto,ziyodə ləzzətonku bəhrə bəbardeyn.peşonə ayədə hamyedə:”(reçin iyən dıjdə çəşə)Huriyon  çəvon jimoni həmro bəkardemon”.