Osmoniyə surəon-184

Osmoniyə surəon-184

Turi mıborəkə surə 17-ə ayəku jəqoşə bə Xıdovəndi bo pərhizkopron nəzədə qətə benəhoyətə mıkofat və səvobi işorə kardedə və hamyedə:”həyğətən,pərhizkoron(vəhışti)boğonədən və (çəvon əyo)ziyodə nemətonışon heste və çəvon pərvırdıqori bəvon doə çiyon(xoto)əvon şo və xoşholin və çəvon pərvərdıqori əvonış çı cəhəndımi əzobiku oqətəşe”.

Vəhışti əhl çəvon pərvərdıqori bəvon əto kardə çiyonku vey xoşholin və əvon bın barədə bə dılnıştə iyən çokə sıxanon votedən.çəvon dılon  çı harcurnə ğəmo-ğussəku təy bıə və əvon əyo qıləy fovğəladə oroməti hiss kardedən.məxsusən ki,Xıdovəndi çəvon cəzo nıvindey həxədə qıləy xotırcəmətiş baxş kardə və əvonış çı cəhəndımi otəşiku mıhofizəş kardə oqətəşe.vəyo bəvon votey bəbe:”bəştə əncom doə əməlon xoto,bəhənən iyən peşomənən.nuş bıbu boşımə”.

Beşək,vəhışti hardənin iyən peşoməninə çiyon bənə ın dınyo xorəki məhsulon ni və çəvon hiç qıləy bə xoşnıomə nəticəşon ni.çımisə əlovə,vəhışti əhli miyono çın vəhışti neməton bə oxo rəsey iyən təmom bıey xoto həm hiş qıləy norohətçəti və niqəronəti mevcud ni.bə həmonə dəlili xoto həm,vəhışti neməton komilə surətədə nuş kardənin,ləzzətin iyən bə coni nıştə.vəhışti əhli coqlə nemətonku qıləyni həm ım bəbe ki,əvon səfə formadə bıə taxton sape iaynde kəno təkyə bəjen və ıştə peşton bəvon dəbəhaşteyn və deştə dust iyən oşnoon bə ico bıey iyən deəvon unsiyyətədə bıey xoto,ziyodə ləzzətonku bəhrə bəbardeyn.peşonə ayədə hamyedə:”(reçin iyən dıjdə çəşə)Huriyon  çəvon jimoni həmro bəkardemon”.

Vəhışti əhli barədə oko doə bıə ayəon məcmuəku çok-çoki fame bedə ki,əyo bo insoni oroməti iyən asayişiro lozım bıə har çi hozzı kardə bıə.ayəon peşo bə vəhışti dayimiyə miyvə və ləl-qılon işorə kardedə və hamyedə:”və hejo çəvon dıli piyə çandə nev miyvə və qujdon(əyo)bəvon doey bəbe.əvon vəhıştədə  iyande dastiku bəvədə nə bihudə(ləğvə) sıxan və nə qınoş bıə şərov bəstəneyn.və hejo(boçəvon xıdmətiro) bənə sədəfədə bı mirvari nevcıvonon çəvon qırdo bəqardeyn.vəhışti əhli kali sakinon bə iyənde dim bəqəteyn və dəbəparseyn(çın komyabi iyən ləzzət bardey rəmz çiçe?)(bəvoteyn:)əmə çımiku bənav (dınyo jimonədə) ıştə xıyzoni dılədə(ımrujnə əzobiku)tarsedəbimon.çən,Xıdovəndi bəmə mınnətış noe(və əməş bəştə rəhməti şomil kardeşe)və əməş ıştə sutunə əzobiku hifzış karde oqəteşe.”.......

Inkor iyən təkzibəkəyon idastə Kərimə-Ğıroni  çı peyğombər(s)-i ıştəku pesoxtə çi zıneydəbin və votedəbin ki,əv ım Ğıronış ıştən pesoxtəşe və bə Xıdo iftiro ğandedə.həyğətədə,çəvon imonışon ni.çı inodkor iyən mutəəssıbə mışrikon bə Kərimə-Ğıroni tabe nıbey bəhonəonku qıləyni həm ım be ki,çandə kərə Ğıronədə bəy işorə bıə.əmmo,Turi mıborəkə surə 34-ə ayədə bəvon qıləy danon arıştə cəvob doydə və hamyedə:”çən,ehanə rost votedənbu,bənə əy(Ğıroni) qıləy sıxan biyəyn”.

Əgər ım kəlom və sıxan  çı insoni fik iyən əndişə bıəbe,çən,əvon həm bənə əvon jıqo qıləy kitob biyəyn. ehanə ım Ğıron çı bəşəri ya bənə co kəlomon bıəbe,nəticədə bəpe milləti həm kardeyış zınəbe bənə çəy sıxanon sıxan biyəyn.

Ha holədə ın kəlməon çə ayəonkuon ki,çı Kərimə-Ğıroni mecuzə bıey ruşin kardedə və ım fəğət bə peyğombər(s)-i zəmoni məxsus ni.bəlkəm,ım bə har qıləy zəmonə bıə har qıləy fərdi xitob kardedə ki, ehanə rost votedon,bənə ın Kərimə-Ğıroni sıxanon qıləy kəlmə biyənən.Ğıroni ım nido hejo de barzəvo bıə iyən çı peyğombər(s)-i besətiku çordə əsri dəvardey bəpeştə həm de tobə ısət hiçkəsi bəy qıləy mısbətə cəvobış doey zınəni.ım qıləy holədəy ki,islomi deşmınon bə ın pok iyən osmoniyə dini zidd təbilğaton xoto,ziyodə xarcon sərf kardedən.ım kulliyə surətədə bıə ocizəti,bə çın kitobiku osomoniyə vəhy bıey iyən çəyu sərçeşmə sıey dəlolət kardedə.

Turi mıborəkə surə oxonə ayəon bə peyğombər(s)-i xitob kardə holədə hamyedə ki,çı səbr iyən istiğoməti roy bıvıjno və ıştə ruf iyən vucudi de Xıdovəndi həmd iyən təsbihi sofko və əy ziyod zikrko.