Osmoniyə surəon-185

Osmoniyə surəon-185

Nəcmi mıborəkə surə Kərimə-Ğıroni penco seminə mıborəkə surəy,Məkkədə nozil bıə və 62 qılə ayəku iborəte.ın surə çə surəonkuye ki,bəvədə vocibə səjdəon heste.yəni ın nəzədə qətə bıə ayə(çın surə 62-ə ayə)  məsey iyən handey bə insoni səjdə kardey vocib bedə.çın surə mətləbon kulliyə formaədə çımiku iborəte:

Bə astovəon ğəssəm hardey,vəhyi vırə və çəy bə peyğombər(s)-i dıli nozil bıey şivə,peyğombər(s)-i merac,bə bıtpərəstəti iyən bıti pərəstış kardey xoto,mışrikon əğedə mızəmmət kardey,bə qınokor iyən mınhərifon dimi tobə bə oj bıey,ikəsi çı cokəsi qıno bo bəştə duşi nıqətey,bə miadi məsələ ayid bəhson, de həxı deşmınəti kardey iyən bəştə bın deşmınəti isror kardey xoto,çı navkonə ğovmon  dardnokə tale və sərnıvışt,bə pərvərdıqore-aləmi səjdə iyən əy fəğət ibodət kardey əmr.

Nəcmi mıborəkə surə imtiyoznku qıləyni ıme ki,çəy ayə və iborəon kırt və qıləy məxsusə ahənqışon heste.liza,çəy ğiroət vey ğəşənq və vəznine.çın surə məfhumon jıqo bə odəmi təsir kardedə ki,hıtə dıl iyən ğəlbon oğo kardedə.

Nəcmi mıborəkə surə 1-4 ayəonədə jıqo omə:”ğəssəm bıbu bə astovə okuşə zəmoni,ki şımə dust (Muhəmməd(s))nə roş qim kardə və nə mınhərif bıə və nə həvaye-nəfsiku sıxan votedə.çəy sıxan ğərəz bəy nozil bıə vəhyiku co çi ni”.

Nəcmi mıborəkə surə iminə ayədə  çı ğəssəmi bəpeştə,bımi işorə kardedə ki,şımə dust iyən yavər (Muhəmməd(s)) hiçvaxti mınhərif bıəni və ıştə məğsədış qim kardəş ni.əv hejo həxə royədə ğədəmış şodə və və çəy sıxan iyən rəftorədə hiç qıləy inhirof və kəcəti mevcud ni.

Bın iborətədə Xıdovənde-Aləm harcurnə inhirof,zəlolət,cəholət iyən səhvi ıştə vığandə peyğombəriku(s) nəfy iyən inkor kardedə və çəy deşmınon bəy jıə iftiroon ğəbul kardedəni.peşo,bə ın mətləbi təkid iyən ımi isbot  kardero,hamyedə ki,çəy votə çiyon qırd Xıdovəndi tərəfikuye.joqo ki,hamyedə:”əv hiç vaxti ıştə həvaye-nəfsiku sıxan votedəni”.peşo de qırd ğətiyyəti elon kardedə ki,çəy vardə çiyon,fəğət vəhye ki, Xıdovəndi tərəfiku bəçəy səmt vığandə bıə.əv ıştəku hiççi votedəni və Kərimə-Ğıron çəy zehni boftə-pesoxtə çi ni.Kərimə-Ğıroni qırd ayəon Xıdovəndi tərəfikuye və çəy ın iddio çəy daxilədə noey bıə.de Kərimə-Ğıroni ayəon tədğiğ kardey,çoko-çoki sərəseiyən oşko bedə ki,inson çanədə həm alim iyən mıtəfəkkir həm bıbu,hiç vaxti ğadir nibəbe bə çəy ayəon mehtəvo və məzmuni qıləy sıan biyəy.qıləy sıxan ki,de çandə ğərn və əsron dəvardey,bə mıtəfəkkir iyən ağl soybon ilhomış baxş kardə və bə camiyədə salehə şəxson və elitaon  təşkil bıey iyən bə həmonə camiyə ozavziye iyən inkişofi boyis bıə. Vey əcib ıme ki,ın barzə səviyyəninə sıxanon bənə çəmə peyğombəri(s) bıə çı qıləy dərs nıhandə şəxsi zıvoniku beşə ki,çəy jimon kardə muhit de nodonəti iyən dıjdə xorafaton pur be.

Nəcmi mıborəkə surə 5-ə ayəku de tosə 18-ə ayəon,çı peyğombər bə merac şıey iyən osmoniyə səfə məsələ şərh kardedə.qıləy məğam ki,ğərəz həzrəte Muhəmməd(s)-i hiç qıləy məxloğ bə həmonə vırə nayil bıəni.ın ko nışon doydə ki,çəmə peyğombəri(s) əzəmət iyən fəzilət bəsə Xıdo qırd məxloğatisə barz və bəpeye.Xıdo-Rəsul(s)-i bə meraci səfə qıləy şəvədə bino be.qırd bın mıddətədə ki,ə həzrət bə Beytul-Mığəddəsi sərzəmin,bə Məscidul-Əğsa və bə osmonon şe iyən çəyu oqarde,işəvisə qıləy kamə zəmonədə be.joqo ki,ə həzrət sıbi vaxti ıştə kədə be.

Meraci səfə qıləy addi iyən məmuliyə səfə nıbe.səfə əsl.çı peyğombər(s)-i mışohidə kardə çiyon iyən çə həzrəti de Xıdovəndi diyaloq,ımon hiç qıləyni adi qıləy çi nin.çın məsələ barədə doə bıə izohon,qıləy dıjd və əzəmətinə səhnə bəyon kardedə ki,peyğombər(s)-i əvonış mışohidə kardə.həmmə çiyon xariğul-addə surətədə və çəmə zınə məkon iyən zəmoni mığyosi xariciku bə əməl omə.binobərin həni bo təəccıbi vırə mandedəni ki,qırd ın koon deçəmə zəmini dimisə bıə zəmon mığyosi,kıləy kırtə zəmonədə bə əməl omə.