Osmoniyə surəon-186
Osmoniyə surəon-186
Nəcmi mıborəkə surə 5-ə ayəku de tosə 18-ə ayəon,çı peyğombər bə merac şıey iyən osmoniyə səfə məsələ şərh kardedə. qıləy məğam ki,ğərəz həzrəte Muhəmməd(s)-i hiç qıləy məxloğ bə həmonə vırə nayil bıəni.ın ko nışon doydə ki,çəmə peyğombəri(s) əzəmət iyən fəzilət bəsə Xıdo qırd məxloğatisə barz və bəpeye.Xıdo-Rəsul(s)-i bə meraci səfə qıləy şəvədə bino be.qırd bın mıddətədə ki,ə həzrət bə Beytul-Mığəddəsi sərzəmin,bə Məscidul-Əğsa və bə osmonon şe iyən çəyu oqarde,işəvisə qıləy kamə zəmonədə be.joqo ki,ə həzrət sıbi vaxti ıştə kədə be.
Meraci səfə qıləy addi iyən məmuliyə səfə nıbe.səfə əsl.çı peyğombər(s)-i mışohidə kardə çiyon iyən çə həzrəti de Xıdovəndi diyaloq,ımon hiç qıləyni adi qıləy çi nin.çın məsələ barədə doə bıə izohon,qıləy dıjd və əzəmətinə səhnə bəyon kardedə ki,peyğombər(s)-i əvonış mışohidə kardə.həmmə çiyon xariğul-addə surətədə və çəmə zınə məkon iyən zəmoni mığyosi xariciku bə əməl omə.binobərin həni bo təəccıbi vırə mandedəni ki,qırd ın koon deçəmə zəmini dimisə bıə zəmon mığyosi,qıləy kırtə zəmonədə bə əməl omə.
Rəvoyətədə omə ki,Cəbrəyil-Əmin(ə) meraci şəvi çı həzrəte peyğombər(s)-i palu ome və bo ə həzrəti qıləy mərkəb vardeşe.Xıdo-Rəsul(s) bəy suvar be və bə Beytul-Mığəddəsi səmt hərəkətış karde.ə həzrət ıştə səfə zəmoni roysə çandə qılə vırədə mande və nımojış vote.peşo bə Məscidul-Əğsa varid be.ə həzrət Məscidul-Əğsadə de bənə İbreym(ə),Mosə(ə) iyən İsa(ə)-i yolə peyğombəron rufi iştiroki qıləy holədə nımojış vote ki,ə həzrət imom cəmoət be.çə vırəku çı peyğombər(s) osomoniyə səfəon bino be ə həzrət haft qılə osmonon həmməyku dəvarde və har qıləy osmonədə həm mıxtəlifə səhnəonış mışohidə karde. peyğombəron,firiştəon,cəhəndım iyən çəy əhl və vəhışt iyən çəy sakinon.peyğombər(s)-i mışohidə kardə əcib-ğəribə çiyon har qıləyni hestemoni aləmi sırronku qıləyni be.ə hzərət meraciku oqardey bəpeştə, qıləy mınosibə fırsətədə ıştə mışohidə kardə çiyon bo umməti aqah bəey xoto şərh kardedəbe və çəvonku bo milləti təlim-tərbiyə xoto istifodə kardedəbe.ım ıştən ımi nışon doydə ki,çın osmoniyə səfə hədəfonku qıləyni çəy dıjdə tərbiyəvi iyən maarifiyə noliyyətonku oko doey bıə.peyğombər(s) ıştə meraci səfədə botıni şoydətiyədə Xıdovənde-Aləmış mışohidə kardəşe və de qıləy co təbiri Xıdovənde-Xalığ bəçəy pokə ğəlbi nozil bıə və şuhud bə həyğət rəsə.qıləy vırə ki,çı bandəon tərəfiku bə ilahi ğorbi oxonə məğame və çı “sidrətul-muntəha” kəno.qıləy holədə ki, “sidrətul-muntəha” çı nuriku bıə hicob və pardəon əvış puşniyə.
“Sidrətul-Muntəha” çı vəhışti nezi qıləy məkone ki,de ilahi lutfon pur və lıb-bə lıbe.peyğombər(s) sər ta po de nur iyən ruşnə pur bıə bə dınyoədə,bə ilahi ğorbi pik noxtə rəse.əyo pərvərdıqore-aləm bəy xitobış karde və muhimmə əmr iyən tovsiyəon bə həzrəti hamyeşe ki,çəy məcmuə de “Hədisul-Ğudsi” ya Ğudsi hədison konteks boəmə yodiqar mandə....
