Ilahi Rəhbəron-33
Ilahi Rəhbəron-33
Qıləy inson ki,ilahi ruf bəy pu kardey beydə,əv bə ilahi barzə xəlifə məğami oruc və rost bıey və çı Xıdovəndi cəmol sıfəton nışon doə ovəynə bıey bəzıne.jıqo qıləy inson çun Xıdovəndi ıştə mailk iyən soyb zıneydə,bəştə icozə doydə ki,boştə vucudi harcurnə soybətiko.əv xudxah və eqosit ni,Xıdoxah və Xıdotərəfdore.qıləy Xıdo pərəstış kardedə ki,aləmon ofəyə Xalığe və həmmə koon tədbiri vindedə. əmmo,bə mərıfəti ım mərhələ rəseyro,bə təzkiyə və ıştə nəfsi pok kardey ehtiyociş heste. həyğətədə, ıştəni zıney və ıştə nəfsi sape koy kardey çı insoni de Xıdovəndi bıə rabitə parde.peyğombər(s) və ilahi co ovliyaon de ın royku dəvarde bə Xıdovəndi pokə zoti marzi roşon pəydu kardə və ıştənışon ıştə nəfsi zindonədə həbsışon kardəni….
Kərimə-Ğıron qıləy osmoniyə kitobe ki,Xıdo tərəfiku bo insoni bə Xıdo həxə roy səbəro kardero,bə ilahi oxonə peyğombəri yəni bə həzrəte Muhəmməd(s)ibn Əbdullah nozil kardəşe.Ğıron,çı islomi-peyğombəri(s) əbədiyə mecuzəy.ım kitob 23 sori ərzədə de vəhyi roy vositə tədrici surətədə bə Xıdo-Rəsul(s)-I enovniyə bıə.peyğombəre-əkrəm(s) Ğıroni ayəon bo milləti handedəbe və çın ayəon cozibə fərdon bə islomi səmt sovğ doydəbe.Kərimə-Ğıron çı islom iyən peyğombər(s)-I həmməysə yol iyən əbədiyə mecuzəy…..
De Xıdo-Rəsul(s)-I təbiri Kərimə-Ğıroni qıləy zohir və botınış heste və de həmonə xısusiyyəton vey təsirine.Ğıroni peyğom və mesajon mehtəvo iyən məzmuni cəhəto,mışrikon çı bə imon,əxloğ iyən çokə əməlon dəvəti mığobilədə tərkı-siloh kardedəbe və zohirədə həm çı Ğıroni ahənqinə nəzm,çəy həyəcon iyən reçinəti,zumandə ədəbiyyot və fəsohət bə Kərimə-Ğıoni peyğom və mesajon qıləy cəzzobiyyət izofə kardedə.Suveyd ibn Samit ki,əy bənə qıləy mahirə şayiri zıneydəbin,bo Ğıroni nufuz vəy qətey iyən qıləy çorə pəydu kardey xoto,voteşe:”Muhəmməd nə sehrboze,nə şayir və nə kahin.bə Xıdo ğəssəm çəy kəlom qıləy məxsusə şinətiş heste.çəy kəlomi rəğ-rişə bərəkətin iyən çəy şoxə və xıçəon de miyvə pure, çəy sıxanonsə qıləy barzə sıxan mevcud ni”….
Kərimə-Ğıroni cozibə jıqo be ki,əbu sufyan iyən əbu cəhl və co mışrikə fərdon məxfiyonə və bəşəvnəy peyğombər(s)-I kəy ətrofədə niyon beydəbin və bə ə həzrəti Ğıroni tilovəti quş doydəbin.əvon çə həzrəti handə Ğıroni reçinə iborə və tilovətiku ləzzət bardedəbin,əmmo çəy mığobilədə de qıləy məxsusə təəssıbi mandedəbin və çəy mehtəvo iyən məzmuni ğəbul kardedəbin.əvon nəyinki,əy ğəbul kardedə nıbin,bəlkəm bə cokəson çəy bə odəmi təsirəkə ayəon məsey koy mane beydəbin və bın koyədə ıştə dasto omə har koy əncom doydəbin.Ğıron deştə təsirinə təlimon bo mısılmınon fik və əndişə bəpe bardero qıləy təsiəkə rolış hestebe və ım osmoniyə kitob insonon bo təhğiğ,təfəkkur iyən fik-fam kardero dəvət kardedə.Ğıroni ayəon bo kulliyə şikilədə vey çokə formədə fik-fam iyən omuteyro,milləti dumo yənde bə təfəkkur iyən ıştə ağliku oko doey səmt təşviğ iyən dəvət kardedə və nodonəti iyən cəholəti mızəmmət kardedə və millətiku tələb kardedə ki,ku,kor iyən loli nıbon və çı çolınqə heyvonon bə hisob nıvon.Ğıroni həmmə vıronədə elm,hikmət,mərıfət,bəsirət,şuur,ağl iyən tədbiri maddəku kəlməon vey omə.
Xıdovənde-Aləm çı qırd insononku tələbış kardə ki,Xıdo doə ağli nemətiku çok-çoki bəhrə bıbon və çı cəholət və kur-kuronə təğlidonku bə diyəro bımandon.
