Təkfiri cərəyonon

Təkfiri cərəyonon

Torıxi fakton çı dini şəxsiyyət və hoviyyəti bə formə dəşeyədə çı məzhəbi mərosimon təsiriku hikoyət kardedə.çoko ki,peyğombəri(s) nəvəonku iyən çı şiəyon çominərəhbər bıə İmom Səccod(ə) bəştə əshobonku qıləyni Şibli votedə:”fəhiinə.....yəni aya qıləy vəxt ki,İbreymi məğami peştono dı rıxət Təvafi nımoj hande və vote,aya tı ğəsdı karde bənə İbreymi nımoj bıvotoş?votey bəbe ki,İmom Səccod(ə) Şibli   bə tohidi mədəniyyəti səmt roy nışon doydə.İmom Səccod(ə) de İbreymi(ə) məğami bə yod dənoey və de İbreymi(ə) vositə xəlğ bıə erjon dığəət kardey zəruriyyət ki,tohidi dinon silsiləon sə və sıftəy,həcci mədəniyyəti dəvardə soron bəy nışon doydə və de ın koy vositə əv ıştə mədəni şəxsiyyəti iyən əy zumand kardey koy çok zıneydə.Təkfiri dastəon de islomi binaon xərob kardey  inev de islomi mədəniyyəti hoviyyət və ki bıey canqo-cidol kardey mənoədəy.əvon deştə ım koon ...

Təkfiri dastəon terroristə hərəkəton və çəvon torıxi iyən məzhəbi məkonon təxrib kardey bəçəvon iddion əks və Xıdovəndi  bəştə oxonə peyğombər həzrəte Muhəmmədi(s) vığandə Kərimə-Ğıroni oşkoə nəssi əkse.joqo ki,Rumi mıborəkə surə 42-ə şərifə ayədə Xıdovənde-Xalığ bəştə peyğombəri(s) əmr kardedə :”ğul......siyru.....zəminisə seyrkənən və diyəkən (bıvinədənən)şımə bənav bıə kəson ağıbət çokonə be. çəvon veyni muşrik be”.həmçinin Nəmli mıborəkə surə 51-52-ə şərifə ayədə bə dəvardə nəslonku  baği mandə bina və əsəronku ibrət peqətey təkid kardedə.joqo ki,hamyedə:”fənzur keyfə kanə........çən, diyəkə ki,çəvon hiyləon oxo çokonə be.əmə əvon iyən çəvon ğovmımon həlok kardemone.çən,ım çəvon kəonin ki,bəçəvon kardə sıtəmi xoto  təy mandə.hukmən bın(cəzoəyədə)bo zınə milləti qıləy ibrət heste”.Xıdovənd Kərimə-Ğıronədə millətiku tələb kardedə ta bə ıştəku bənav bıə dəvardə insonon sərquzəşton nəzəkon və çəvon hol-əhvolonku xəbədo bıbon.Xıdovəndi ım tələb de əmri  feli omə və jıqo qıləy əmri nəticə ilahi həyğəton təkzibəkə kəson ağıbətiku aqah bıeye.həmçinin Ğıron ə kəson mızəmmət kardedə ki,torıxi xərobə bıə binon kənoyku dəvardeyədə fik-fam iyən təfəkkur kardedəni....

Kərimə-Ğıroni məntığ ıme ki,inson ıştə fik iyən zehni ıştə haruj vində jimon iyən bəştə ətrofədə bıə çiyon məhdud nıko,bəlkəm bəpe ıştə vindey ufuği hevujko və coqlə ğovmon tale və sərnıvştədə de ağılmandəti təfəkkurko.torıx İslomi nəzəku ıştən çı zıney iyən mərıfəti mənbəonku qıləyniye.zira,de navkonə ğovmon əsəron mışohidə kardey və dəvardə hodisəon həxədə analiz kardey və əy omutey,ayəndə və vəomə roy tərsim kardey bəbe.Ğıroni insononku zəmini dimisə seyr kardey  və bə dəvardə ğovmon tale nəzə kardey şərt ıme ki,bəpe ım əsəron baği bımando və çı insoni dast bəy bırəs ta əv çəvonku ibrəti dərsi peqətey bızıno.bə Ğıroni ım məntıği əsos dəvardə ğovmon erjinə əsəron bo  ısətnə və ayəndə nəsli  oqətey qıləy zəruriyə koye.liza de təkfiri terroriston vositə antik binon iyən navnə milləton mədəniyyət və əsəron viron kardey ,boçəvon çı islomi dini təlimonku bexəbəti qıləy sənəd bə hisob omeydə. Kərimə-Ğıronədə Yunisi mıborəkə surə 90-92-ə şərifə ayədə çı fironi de həzrəte Mosə(ə) iyən Bəni-İsrayili bıə canqi oxonə mərhələ  izoh doydə.bın ayəonədə omə ki,firon iyən çəy ləşkər Bəni-İsrayli təğib kardedəbin ta oxoyədə bə dıyo omin rəsin.Bəni-İsrayl çı dıyoku dəvardedən və nicot pəydu kardedən.fironıjon həm çəvon dumo bə ovi dılə daxil beydən.ğəflətən qıləy sanqinə ov əvonış har tərəfiku dəqəteşe.əmmo,fironi macəra dəvomədə Yunisi mıborəkə surə 90-92-ə şərifə ayədə jıqo omə:”fəlyəvmə.....çən,ımruj ıştı bədəmi (oviku)nicot bədomon ta bo ıştı dumo oməkəson qıləy ibrət bıbu.beşək milləti veyni  çəmə ayəon(və nışonəonku) ğafilin”.fironi beconə bədəmışon oviku pəydu kardeşone,əvışon mumiya kardeşone və ısət həm əy muzəyədə oqəteydən.Xıdovənd bın ayədə bə fironi xitob kardedə və hamyedə ki,əmə ıştı bədənımon oviku nicot domone ta bo omə nəsli qıləy ibrət iyən nışonə bıbu,bın mənoədəy ki,çəy bədəm bəpe oqətey bıbu ta ayəndə nəsl əy mışohidəkon və qıləy diktator iyən xunpeşomə kəs bıə  fironi sərquzəştiku ibrət peqəton.əgər DaiŞ terroristə dastəon bə fironi mumiyə cəsədi həm dast pəydukon,əy həm  de şırki məzhəri bəhonə de bombə ətıpnin.qıləy holədə ki,bə Yunisi mıborəkə surə 92-ə şərifə ayə əsos  Xıdovəndi irodə ım bıə ki,fironi bədəm oviku nicot pəyduko və vəomə nəslon çəyku ibrəti dərsi peqəton.çən,əvoni nığo doey iyən oqətey qıləy zəruriyə koye.....