Ilahi Rəhbəron-59

Ilahi Rəhbəron-59

Peyğombəri(s) bə Mədinə Şəhri hicrətiku i mıddət dəvardə nıbe ki,İslomi deşmınon və kufr iyən şırki yolon ki,çı islomi rujbəruj ziyod bıə nufuzi vəy qəteyışon nızıne,Hicrəti dıminə sori Bədri məntəğədə iminə canqi şuləşon rost karde və deştə maksimum hərbi iyən silohi ğıvvonbə canqi ərsə və meydoni poşon noe.mısılmınon ğıvvə və hərbi imkonaton mığdori nəzəku kam bin və de deşmıni ləşkəri mığoyisə kardəninə həddədə nıbe.beşək,ehanə ilahi imdod və koməkon bıə nıəbe, mısılmınon hiçvaxti səbarz və ğalib niəbiin.Kərimə-Ğıron ın həyğəti jıqo bə təsvir kəşeydə: ”Yəğınən Xıdovənd bəşmə (Bədri)canqədə şımə zəyif bıə holədə koməkış karde.çən,bə ilahi təğva rioyətkənən ğasbu ki,Xıdovəndi lutfi mığobilədə şukrkon.həmonə zəmon ki,bə muminon votedəbiş aya boşımə vəs kardedəni ki,şımə pərvərdıqor bəşməş de se həzo firiştə koməkış karde”.(Ali-İmran-4-123)…

Bədri canqi sıftədə ərəbə merdonku se nəfər bə meydon omin və mıborizışon tələb karde.bın ləzədə Peyğombəri(s)  həm se nəfərış yəni Həmzə iyən Əli(ə) bo təkbətəbəkə mıborizəro bə canqi meydonış vığande.əvon har seqlə bəştə deşmıni səbarz bin.həmonə deşmınon ki,canqi meydonədə de barzə vanqi boştə mıboriz tələb kardedəbin.əmmo Əli(ə) deməkə ki,qıləy cıvonə zoə be,bəsə cokəsonsə vey hiss kardey beydəbe və ə həzrəti de ilahi mədəd iyən koməki çı  Peyğombəri(s) dıqlə yavə deşmınonış bə cəhənnım vosil kardeşe.çəvonku qıləyni həm ibn Nofəl be ki,Xıdo-Rəsuli(s) çəy barədə nifinış və Xıdoku çəy şərri dəf kardeyış tələbış karde və çoko ki,məseşe əv de Əli(ə) məhv kardey bıə,jıləvoni dıvoş karde:”şık bə Xıdo ki,çımı çəy baərədə bıə nifinış icobətış karde”. məcmuən Bədri canqədə deməkə ki,deşmıni ləşkər zumand bə nəzə çiyedəbe,əmmo deçəvon 70 nəfəri kıştə bıey və 70 nəfəri əsir bıey,əvon bın canqədə məğlub bin və mısılmınon çı Xıdovəndi imdod və koməki şua jiyədə ğolib iyən bə səbarzəti noil bin. …

Hicri-Ğəməri dıminə sori veymuhimmə hodisəonku qıləyni həm həzrət Əli(ə) de həzrəte Zəhro(s) izdivaci məsələ be.həzrəte Zəhro(s) jimoni təğdım kardeyədə votemone ki,bə zəmoni bənə Umər iyən Əbu Bəkri bıə məşhurə şəxson bo ə həzrəti ha peqəteyro bə Xıdo-Rəsul(s) xıdmət rəsin və ə həzrəti bəvon həmmə mənfiyə cəvobış doe.bə həmonə dəlili xoto, həmməkəsi hissış karde ki,ehanə Əli(ə) peyğombəriku ım tələbi bıko,ə həzrət əy ğəbul bəkarde. əve,Rəsuli-Əkrəmi(s) səhobə və dustonku idastə de Əli(ə) vindemon kardeşone və əvışon bo ım ko təşviğ kardeşone ta ə həzrət de həzrəte Zəhro(s) izdivocko. çəvon kardə isror boyis be ta Əli(ə) de ın koy məğsədi bə Xıdo-Rəsuli(s) xıdmət rəse.həmonə ruji Xıdo-Rəsuli(s) çı Ummu Sələmə kəyədə istirohət kardedəbe.Əli(ə) peyğombəri kəy kuyədə,ə həzrəti bəştə jimoni həmro voteşe ki,kəybə ojko.çunki,kəybə kuyəkəs qıləy şəxse ki,Xıdo iyən çəy Rəsuli əvış piyedə və əv həm Xıdo iyən çəy Rəsulış piyedə.Ummu Sələmə ərzış karde:ha Xıdo-Rəsul ha! Çımı pı-mo bətı fido ,əv kom kəse ki,tı əy nıvinde,çəy həxədə jıləvoni ray doydəş? Xıdo-Rəsuli(s) hamyeşe:Ummu Sələmə lıski səbrkə və çəşkə.əv qıləy şucoətin iyən delavərə merde. Əv,çımı bıvə,amyuəzo iyən çımı plau milləti miyono həmməysə mahbubə şəxse.Ummu Sələmə rəyrə ıştə vırəku əhışte və bəş oj karde ta bıvindo peyğombəri mədh iyən tarif kardə ın şəxs kiye? çoko ki,Ummu Sələmə bəş oj karde de Əli(ə) nuroniyə çehrə dimbədim ome və ə həzrətiku daxil bıeyış tələbış karde.Əli(ə) de səlom doey daxil bıey bədiqə ijən bə ədəb-ərkoni rioyətış karde və çı peyğombəri(s) məhzərədə nışte.ə həzrət bəştə şiddətinə həyo xoto,ıştə səş saru eğandəbe,ıştə omey hədəfış bəyon karde nızıəne və de tosə I middəti əvon har dıqləyni tamışon je və sakit mandin…..

Rəsuli-Əkrəmi(s) peso sukutış darışte və hamyeşe:ha Əli ha!jıqo bızın bo qıləy ko məğsədi oməş çımı palu,əmmo xəcolət kəşeydəş?tı hiç qıləy xəcolət nıkəşə holədə ıştə sıxani oşko bıvot iyən xotırcəm bıbi ki,ıştı qırd tələbon bə vırə rosney bəbe.Əli(ə) ki,çın fırsəti dumo be,əve ərzış karde:ha Xıdo-Rəsul ha!,çımı pı-mo bətı fido bıbu.mı şımə kədə yol bıəm və şımə bəmı ziyodə lutfonon kardə.şımə çımı pı-mosə vey bəmı çokə tərbiyəon doə və deşmə vucudi bərəkəti hejo hırdənətiku hidoyətım pəydu karde.ha Xıdo-Rəsul ha! Bə Xıdo ğəssəm bıbu ki,çımı dınyo iyən axırəti …şıməyon.ısət çəy zəmon omə rəsə ki,boştə qıləy jimoni həmro bıvıjnom və xıyzon təşkil bıdom ta deəy mənus bıbum və çəy kəno qıləy oroməti pəydukom.ehanə şımə məsləhət bızınon,ıştə kinə Fatmə bəçımı əğdi biyənən ta bəmı qıləy yolə hərəbaxtəti iyən iftixor nəsib bıbu.Xıdo-Rəsul(s) ki,jıqo bızın ın ləzə və zəmoni çəş kardedəbe,vey xoşhol iyən şo be.əve,həzrəte Fatmə(s) palu şe və hamyeşe ki,tı Əli ibn Əbi Tolıbi çok zıneydəş.əv boşıt ha peqəteyro oməbe.aya tı icozə doydəş ki,tıni bəçəy əğdi biyəm?.Fatmə(s) xəcolətış kəşe və  ıştə səş saru eğande və peyğombər(s) ımış çı roziyəti əlomətış hisob karde və peso çı Əli(ə) tono ome və hamyeşe:aya bətı qıləy bəşorət bıdom və botı foşkəm?Əli(ə) voteşe:bəle,ha Xıdo-Rəsul(s),şımə hejo çok iyən xoşə xəbə doydon? Peyğöombəri(s) hamyeşe:ıştı çımı palu omey bənav Cəbrəyil nozil be və voteşe:ha Muhəmməd ha!Xıdovəndi tış ıştə məxloğati miyono vıjniyeşe və bə risoləti məğami məbusış karde.Əliş(ə) səçın karde və ıştı bıvə və vəzirış ğərol doe.tı bəpe ıştə kinə Fatmə kəbıni deəy bıbırnoş.çəvon izdivaci məclis barzə aləmədə və çı firiştə və mələkon məhzərədə bərpo bəbe.Xıdovənd bəvon pok iyən çokə fərzəndon əto bəkarde.ha Əli ha!hələ Cəbrəyil bəpe şıə nıəbe ki, tı çəmə kə və mənzıli bə kuye və boçımi kinə Fatmə ha peqəteyro omiş…