Ilahi Rəhbəron-63
Ilahi Rəhbəron-63
Ilahi Rəhbəron-63
Peyğombər(s) Məkkə fəthi bədiqə de Məkkə əhali iyən de İslomi ğəddorə deşmınon nəyinki, bənə rəsmi fatehon əməlış nıkarde,bəlkəm qıləy umumi əfvış elon karde və de humanist iyən insondustə hərəkəti,çı Məkkə milləti ğəlbonış həm fəthış karde.çoko ki,peyğombər(s) bə Kəbə kəno rəse,deştə dastədə bıə dırozə çu bə Hubəl,Əsaf və Nailə bıtonış je və əvonış məhf karde. peşo Kəbə pentono bıə bıtış vinde və bə həzrət Əli(ə) hamyeşe:”mı mandəm tı pedat çımı kulisə və həmonə bıti eğand bəsə zəminisə”.demiyən Kəbə ijən sənibəton bə vohidə Xıdo pərəstəti mərkəzi təbdil be və Məkkə sakinon ıştə əsorəti jiyədə oqətə və çı nokəti amil bıə mırdolə bıtonku təmiz kardey be.....
Məkkə fəth kardey çı mışrikon dılonış lorzıne və və bəçəvon conon qıləy tarsış eğandə.liza Tayifi dıqlə muhimmə ğəbilə yəni Həvəzan iyən Səğif,de coqlə kali ğəbiləon mızokirə bədiqə bə ın nəticə rəsin ki,İslomi ləşkər bəçəvon səmt hərəkət nıkarde,de İslomi ləşkəri canq kardero hozzı bıbon.de ın hədəfi əvon qıləy dıjdə ləşkərışon cəm karde və çın ləşkəri sərkərdəti bə qıləy canqəkə iyən nıtarsə fərd bıə Malik ibn Ofv Nəsri aspardışone və de İslomi ləşkəri dimbədim omeyro bə ın ləşkəri səmt hərəkətışon karde.
Co tərəfiku həm peyğombər(s) deştə dıjdə donzə nəfərinə ləşkəri ki,əvon çı da həzo nəfərinə Yəsribi iyən dı həzoynə Ğureyşi tojə mısılmınonku təşkilışon pəydu kardəbe,bəçəvon səmt hərəkətışon karde.İslomi ləşkəri əzəmət və mısılmınon mığdori ziyodəti kali şəxsonış bə ın duyə fik dənoşe ki,əmə hiçvaxti məğlub nibəbemon və əmə hejo səbarz bəbemon.ım səhfə təsəvvır və deşmıni zəyif hisob kardey və rufi iyən mənəvi ğudrəti nəzədə nıqətey,çı mısılmınon odəmi təkon doə dəboxtey zəminəş hozzı karde.məxsusən Malik ibn Ofvi əmrış karde çəy ləşkər bə Huneyni səmt bıə də oxoyədə qıləy dəvardəcoyədə bıçamndon və çı sığ iyən tavon peştono niyon bıbon və de barzə vıron iyən bandon səpe mandey çı mısılmınon ratədə mandin.çoko ki,islomi ləşkər çəyo dəvardeyışon piyedəbe,əvon mısılmınonışon tiy-baron kardeşone və əvonışon məğlub karde.ım bəhisobi əsos bıə plan jıqo bə islomi ləşkəri ruhiyyə təsirış noe ki,çəvon əksəriyyət və veyni çı tarsi şiddətiku binoşon karde bo vite. ....
Bın vey saxtə zəmonədə qıləy kamə dastə yəni təğribən da nəfər çı peyğombəri(s) kənoyədə mandin və çə həzrəti conışon hıriye ki,çəvon həmməysə çı həzrəte Əli(ə) rol vey barz be.ə həzrət bənə şami pərvonə çı peyğombəri(s) qırdo qardeydəbe və bə peyğombəri(s) coni ğəsdış bıə iyən bə ə həzrəti həmlə kardə kəson volo-volo kardedəbe.həzrəte Əli(ə) bın beəmonə canqədə bıə şucoət və ğəhrəmonəti vey bəçəş çiyedəbe.ə həzrət coyli çı Həvəzani dumo yənde həmlə kardə çıl qılə canqəvarış bə cəhənnım vosilış karde.nəhoyətən,deçəvon Əbu Cəruli nomi bıə qıləy yolə sərkərdə kıştə bıey,çı Həvazani ləşkəri dəboxtey zəminə hozzı be.çımi bədiqə qədə-qədə islomi ləşkər bəştə ome və qıləy nəzmı-intizomış pəydu karde və çəvon Tayifədə bıə ğaləşon mıhosirə kardeşone.bın həssosə ləzədə Əli(ə) çı kufri ləşkəri Nafi ibn Ğeylan nomo sərkərdəş həm kışteşe və çoko ki,əv kıştey be,mışrikonku idastə fəroloşon karde və çəvon kali qıləyniyon həm islomışon ğəbul karde.çımisə əlovə Əli(ə) həmonə ğalə mıhosirə zəmonədə Peyğombəri(s) tərəfiku məmur be ki,çı Tayifi şəhri ətrofədə bıə bıton barışto və məhfko.İslomi yolə alimonku qıləyni bıə Şeyx Mufid çın canqi barədə jıqo nıvışteydə:”bə Əmirəl-Muminin Əli(ə) fəziləton bın canqədə diyəkə və çəy həyğəti həxədə əndişə və təfəkkurkə.bın zəmon səbərəseyş ki,bın canqədə bə həmmə fəziləton dast pəydu kardey bəbe və hiçkəs çəvon miyono deəy dimbədim nibome və bəvədə hiç qıləy səhmış nibəbe”.........
