Ilahi Rəhbəron-64

Ilahi Rəhbəron-64

Bın vey saxtə zəmonədə qıləy kamə dastə yəni təğribən da nəfər çı peyğombəri(s) kənoyədə mandin və çə həzrəti conışon hıriye ki,çəvon həmməysə çı həzrəte Əli(ə) rol vey barz be.ə həzrət bənə şami pərvonə çı peyğombəri(s) qırdo qardeydəbe və bə peyğombəri(s) coni ğəsdış bıə iyən bə ə həzrəti həmlə kardə kəson volo-volo kardedəbe.həzrəte Əli(ə) bın beəmonə canqədə bıə şucoət və ğəhrəmonəti vey bəçəş çiyedəbe.ə həzrət coyli çı Həvəzani dumo yənde həmlə kardə çıl qılə canqəvarış bə cəhənnım vosilış karde.nəhoyətən,deçəvon Əbu Cəruli nomi bıə qıləy yolə sərkərdə kıştə bıey,çı Həvazani ləşkəri dəboxtey zəminə hozzı be.çımi bədiqə qədə-qədə islomi ləşkər bəştə ome və qıləy nəzmı-intizomış pəydu karde və çəvon Tayifədə bıə ğaləşon mıhosirə kardeşone.bın həssosə ləzədə Əli(ə) çı kufri ləşkəri Nafi ibn Ğeylan nomo sərkərdəş həm kışteşe və çoko ki,əv kıştey be,mışrikonku idastə fəroloşon karde və çəvon kali qıləyniyon həm islomışon ğəbul karde.çımisə əlovə Əli(ə) həmonə ğalə mıhosirə zəmonədə Peyğombəri(s) tərəfiku məmur be ki,çı Tayifi şəhri ətrofədə bıə bıton barışto və məhfko.İslomi yolə alimonku qıləyni bıə Şeyx Mufid çın canqi barədə jıqo nıvışteydə:”bə Əmirəl-Muminin Əli(ə) fəziləton bın canqədə diyəkə və çəy həyğəti həxədə əndişə və təfəkkurkə.bın zəmon səbərəseyş ki,bın canqədə bə həmmə fəziləton dast pəydu kardey bəbe və hiçkəs çəvon miyono deəy dimbədim nibome və bəvədə hiç qıləy səhmış nibəbe”........ Təbuk həmməysə diyəroə məntəğə be ki,peyğombər(s) bo İslomi pevolo kardero bə həmonə vırə hərəkətış kardəbe.islomi ləşkəri bə Təbuki səmt hərəkət kardey astanədə,mınofiğon kardə koon və bə əməl omə hodisəon,oşko nışonış doe ki,əvon bə Xıdo-Rəsuli(s) tojə bınəş qətə hukuməti zərbə jeıyro,çı qıləy mınosibə fırsəton dumo bin və əvon hissışon karde ki,peyğombəri(s) Mədinəku bə diyəro mandey və bə Təbuku canqi səmt hərəkət kardey,ısət boçəvon məkrinə planon icro kardero vey çokə zəmone.həni əvon zıneydə nıbin ki,islomi azizə peyğombər(s) bə ğərol omə ki,ə həzrət Mədinədə nıbə zəmonədə Əli(ə) ıştə canişin ğərol bədoe.bə həmonə dəlili xoto,peyğombər(s) bə ə həzrəti hamyeşe: ”həni co çorə ni.Mədinədə bəpe ya az bımandom yaanki,tı”. De Əli(ə) Mədinədə mandey,çı mınofiğon məkrinə planon bə hədər şe və əvon bəştə yavə tələbon rəsey nıznin.əmmo,əvon de qıləy co şəytoniyə hərəkəti,şayiəşon pevolo karde ki,deməkə ki,peyğombəri(s) dıl və iştiyoğış hestebeki,Əli(ə) bın canqədə iştirokko,əmmo ə həzrət bə peyğombəri(s) əmri pemandəni və bə canqi meydoni şıəni.Əli(ə) bilofosilə bə Xıdo-Rəsuli(s) huzuri şərəfyob be və çı mınofiğon ım pesoxtə bıə şayiəş bə ə həzrəti rosneşe.Xıdo-Rəsuli(s) de “Mənzilət Hədisi”məşhur bıə qıləy rəvoyətış nəğlış karde və hamyeşe:”aya piyedəni ki,tı bomı bənə Haruni bo Mosə bıə nisbətədə bıbuş,ğərəz ımi ki,çımı bəpeştə həni peyğombər ni”.demiyən çı mınofiğon ım məkrinə plani vəy qətey be və çı həzrət Əli(ə)-i mənağib iyən fəziləton islomi torıxi səyfəonədə bənə qıləy dəvəşə səyfə baği mande.... Xıdo-Rəsuli(s) Hicrətiku nəv sor dəvardedəbe və bın mıddətədə bə tohid iyən vohidə Xıdo səmt dəvət və şırki nəfy iyən inkor kardey barədə İslomi zumandə nido,bə Ərəbıstoni Niməcəzirə mışrikon quşi rəsəbe, əmmo ijən idastə nodonəti və cohiləti xoto,ıştə mışrikəti iyən bıtpərəstətiku dast peqəteydə nıbin.bə həmonə dəlili xoto,çəy zəmon oməbe rəsəbe ki,peyğombər(s) harçənd bəçəvon xoş həm nıvo,çı şırk iyən bıtpərəstəti rınə dəparçıno və komilə surətədə əvoni çə sərzəminiku təmizko.co tərəfiku İslomi Dınyo yolə Konqres və həmən çı tohid iyən vohidə Xıdo pərəstəti məzhər bıə Həcci mərosim bərpo bıənin be və çı cohiliyyəti səri inhirof iyən xorafatonku bə diyəro qıləy əzəmətinə mərosim bə mısılmınon təlim doənin be.bəçəy xoto Xıdo-Rəsul(s) tohidi Həcci bərpo kardeyədə bı zərurətış komilə formədə hissış karde.əmmo,İlahi əmnə hərəmi çı mırdolə bıton vucudiku pok kardey,Ğureyşi əyon-əşrof iyən yolon dastədə bıə vositəon və deçəvon vositə milləti nokə kardey və bəvon sultə kardey və çəvon ıştə şırkamizə iyən anti-insoni mənfəəton dumo bıə vositəon dəparçıney mənoədə be.