Sıə irfon-1

Sıə irfon-1

Şəhodət,insoni bə qıləy dayimi və mıtləğə hestemoni rəseyro fani bıeye.eşği bə məşuği vusoli vey çokə şikilədə rəsey nışon doydə.Şəhid aqahanə və zıne-zıne və bə qıləy ilahi və mığəddəsə hədəfi xoto,bə şəhodət məğami rəseydə.Peyğombəre-Əkrəm(s) jıqo qıləy maqi həmməysə şərofətinə mardey iyən İmom Əli(ə) əy həmməysə qiromiyə maq hisob kardedə.həyğətədə,luğətədə şəhid  şoydi mənoədəy və istiloh iyən termonoloji mənoədə bə kəsi votey beydə ki,Xıdo royədə iyən İlahi erjon xoto,kıştey beydə və bə şuhud iyən şoydəti məğami rəseydə və ğıyoməti ruji şı şoydon iyən zumrə iyən bə insoni əməlon şoydonku bə hisob bome ki,ımon ıştən çı Xıdo peyğombəron xıslətonku məhsub beydə.....

Kərimə-Ğıron,insoni inson kardə mubinə islomi dini ım kitob ki,çı bəşəriyyəti hərəbaxtəti nusxəş bo qırd bəşəriyyəti bə ərməğonış vardə,çandə qılə ayəonədə bə şəhidon barzə vırə və məğami işorə kardedə. Bərosti,həxə əğedəşon bıə kəson iyən həyğəton royədə qəm şodə kəson və hejo bın holədə çı dınyoku şıə kəson,şı şəhidon zumrədə ğərol bəqəteyn və Xıdovəndi benəhoyətə əcr iyən nuriku bəhrə bəbardeyn. çoko ki,Xıdovənde-Mutəal Hədidi mıborəkə surə 19-ə şərifə ayədə hamyedə:”vəlləzinə amənu......və əkəson ki,bə Xıdo iyən bəçəy rəsulon imonış vardə,həyğətən əvon aləmi rostəvıjonin və boəvon Xıdovəndi palu şəhidon əcre heste,(əvon)ıştə əməlon mıkofoti və imoni nuri (vəhıştədə) bəvindeyn”.....

İslomi dınyo vindemoni nəzəku,şəhodət həyğətədə maq ni,bəlkəm əbədiyə jimoniku bıə qıləy sıfəte və çəy bədiqə inson əbədiyyət iyən fəno nıbey ərsə daxil beydə.binobərin şəhid hejo bəyjiye və çəy jimon iyən maq Xıdovəndi bo təyyib,xos və əbədiyə jimoniro bəy baxş kardə, qıləy dayimi sıfəte.şəhidon həyot iyən çəvon bəyji bıey,qıləy hərəbaxtətiye ki,həmmə muminon çəyku bəhrə bəbardeyn.şəhidon dayima bəyjin və çəy maq həyğətədə cariyə jimoniku bə təbyəti səviyyəku bə mavəra və ya təbyəti fevğədə bıə həyoti intiğal və ovoştıney mənoədəy.

Çoko ki,Xıdovənde-Xalığ Ali-İmrani mıborəkə surə 169-ə şərifə ayədə hamyedə:”və la təhsəbənnə.......və qımon məkə əvon ki,Xıdo royədə kıştey beydən,mardən.bəlkəm,əvon bəyjin və ıştə pərvərdıqori dərqoyədə bəhrə bardedən”.Xıdovənde-Kərim həmçinin Bəğərə mıborəkə surə 154-ə şərifə ayədə hamyedə:”və la təttəğu....və bəvon ki,Xıdo royədə kıştey beydə,mardə məvotənən.bəlkəm,əvon bəyjin. əmmo,şımə sərəseydəniyon”. In ayə qıləy cəvobe bə ə kəson ki,jıqo təsəvvır kardedən ki,Xıdo royədə kıştə bıə və bə şəhodəti məğami rəsə kəson,məhf bıən şıən və çı miyoniku şıən.ımruj həm milləti veyni əndişə və fik ki,de dınyo nezə rabitəş heste və  jimoni ıştə dınyo jimoni və çəy məhdudə zəmon iyən məkoni çərçivədə fik kardedə.ın ayəon tələb kardedə ki,jıqo əndişə və fikon bəpe mısılmınon ıştə məğz və zehniku təmzikəyn ta bə islomi nəz əsos,çı maq iyən jimoni barədə de qıləy hevuj iyən nığılə nəzə və vindemoni fik-fam və təfəkkurkon.....