Ilahi Rəhbəron-71

Ilahi Rəhbəron-71

Bə Ğədiri xutbə qıləy kulliyə nəzə kardeyədə,məlum beydə ki,Ğədir fəğət qıləy hodisə bıəni,bəlkəm qıləy cərəyone ki,bəşəri torıxi dırozi dəvomış heste.çıro ki,çı insonon oxonə tale və sərnıvışt de imomət iyən de camiyə rəhbərəti mevzu qıləy rabitəş heste.beşək ehanə Əli(ə) Xıdovəndi boə ə həzrəti təğdır kardə barzə məğamədə ğərolış qətəbe və həzrət İslomi azizə peyğombəri(s) rehləti bəpeştə çı camiyə rəhbərəti iyən hidoyəti məsuliyyətış bəştə ehdə peqətəbe,nəyinki,İslomi ummət,bəlkəm qırd dınyo milləton de siratəl mustəğim iyən rostə royədə hərəkət kardey,haruj hərəbaxtəti iyən kəmoli royədə ğədəm şoədin.

Əli(ə) Xıdo iyən Peyğombəri(s) palu jıqo qıləy barzə məğamış hestebe ki,Peyğombəri(s) Ğədiri xutbə coqlə hissəonədə və çoko ki,əmə navnə bərnoməonədə bəyon kardemone,hamyeşe:”ha millət ha! Beşək Xıdovəndi Əli ibn Əbi Tolıbış bəsə qırd millətisə barzış qətə və çanədə ki,Xıdovənd ruzi bəsə zəminisə nozil kardedə və xəlğiku inəfər bağiye,əv çımı bədiqə milləti har qıləy jenı-merdi miyono həmməysə fəzilətinə şəxse. Ha məxloğ ha! Çəy şıə royku beməşənən və bəy dim məqordınən və çəy viloyətiku beməşənən.zira,əv bə həxı səmt ro nışon doydə və bəy əməl kardedə və botıli məhf kardedə və çəyku oqəteydə.əve ki,Xıdo royədə çı hiç qıləy məlomət iyən mızəmmətiku tarsış ni.əv iminə kəse ki, bə Xıdo iyən bəçəy peyğombəri imonış vardə və hiç kəs bəmı imon vardeyədə çəyku bənav dəşəni.əve ki,deştə coni bo Xıdo-Rəsuli(s) nicotiro fədokorətiş karde və qırd etat-petatonədə de Xıdo-Rəsuli(s) bə ico iyən çə həzrəti kənoyədə be və hiçkəs merdonku ğərəz əv de Xıdo vığandə kəsi bə Xıdoş ibodət nıkarde.çən,ha millət ha! əy bəsə həmməkəsisə bəpe bızınən.zira,Xıdovəndbəy fəzilətış baxş kardə.çəy viloyəti ğəbulkənən ki,Xıdovəndi əvış bə ın məğami mənsubış kardə”....

Xıdo-Rəsuli(s) bo həzrət Əli(ə) zikr kardə məxsusə xısusiyyətonku əlovə,çə həzrəti həxədə bə qıləy əsosə nuktə həm işorə kardedə və hamyedə:”qırd ım fəzilət iyən barzətiyon boəy Xıdovəndi inoyətış kardə və Xıdovəndi əvış bə imomət iyən vilioyəti məğami mənsubış kardə”. Xıdo-Rəsuli(s) sıxani məno ıme ki, cokəson bə ın barzə fəziləton soyb nin və ım iftixoraton fəğət bə həzrət Əli(ə) məxsuse və çımikusə həm əlovə imoməti barzə məğam Xıdovəndi tərəfiku təyin beydə və cokəson bın zəminədə hiç qıləy rol ifo kardey nibəzıne və har co qıləy hərəkət bə Xıdovəndi irodə iyən məşiyyəti əkse.

Xıdo-Rəsul(s) ıştə xutbə dəvomədə bə dıqlə barzə xısləton yəni bə elm iyən təğva xısusiyyəton işorəş karde.ə xısləton ki,bəpe çı camiyə hidoyət iyən rəhbərəti ko bəştə ehdə peqətə çokə şəxsi vucudədə mevcud bıbu.peyğombəri(s) hamyeşe:”ha məxloğ ha! Har qıləy elm ki,heste Xıdovəndi əvış çı vucudədə cəmış kardə və mı çəy bəmı omutə qrıd elmon bə Əli(ə) iyən bəçəy təğvaninə fərzəndon omutəme və  əve Mubinə İmom ki,Xıdovəndi Yasini mıborəkə surədə əvış bə yod dənoə və hamyedə:”əmə har qıləy çi mubinə imomədə aşmardəmone”. ...

Ğədiri xutbə bın hissədə dığğət kardəninə coqlə nuktə ıme ki,imoməti elm iktisabi və bə kəsb kardənin ni,bəlkəm qıləy elme ki,əv ilahi elmiku nəşət seydə və ğərəz peyğombəron iyən şiyə imomon cokəson çəvonku məhrumin ki,Xıdovənd həm de “kullu şəyin......” təbiri bəy işorə kardedə.çımisə əlovə xəto iyən qınonku əmonədə mandey iyən pokəti qıləy ilahi və elmu-lədunnəti ğabiliyyət və ləyoğəti tələb kardedə ki,Xıdo-Rəsul(s) bə ən məno işorə kardedə və hamyedə:”Xıdovəndi bəmı omutə qırd elmonım bə Əli(ə) iyən bəçəy təğvaninə fərzəndonım omutə”.