Ilahi Rəhbəron-79

Ilahi Rəhbəron-79

 Bəzi fərdon bın bovədə bin ki,çı uməri təyin kardın çın şura tərkib jıqo be ki,nəhoyətən de osmani vıjniye bə oxo rəse.zira,bə İmom Əli(ə) çı naviku doə xəbə əsos,sə`d  deştə amyuəzo əbdurrəhmoni mıxolifət nibəkarde və əbdurrəhmon çı osmani hovə şuyə be,əve bəy ray ədəy.bın surətədə ehanə təlhə və zubeyr həm de Əli(ə) mıvofiğ bıəbin,hiç qıləy foydəş nıəbi.boçi ki,əbdurrəhmon çı osmani tərəfdor bıə dastədə be.həyğətən həm jıqo be.sə`d hejo çı sıftəku bə əbdurrəhmoni nəf və xeyri bə kəno mande.Zubeyr həm bə Əli(ə) tərəf mande və ıştə nomizədətiku bə kəno mande.əbdurrəhmoni elonış karde ki,mı xilofət dumo nim və əy tələb kardedənim.təlhə ki,çı əbu bəkri amuyəzo və de ƏLİ(ə) mıxolif be,bə osmani tərəf və xeyri bə kəno mande.binobərin fəğət Əli(ə) iyən osman bo xilofəti nomizəd mandin.liza,çı əbdurrəhmoni ray və nəzə ziyodə əhəmiyyət kəsb kardedəbe.əbdurrəhmon ibn ovf sıftədə Əliku(ə) tələbış karde ta bəştə ehdə peqəto ki,bə Ğıron,bə peyğombəri(s) siyrə və bə navnə dıqlə xəlifə yəni bə əbu bəkr iyən uməri şivə əməl bəkardeyş.Əli(ə) həm cəvobədə voteşe:”az çəu umum heste ki,ıştə elmi məhdudədə ıştə ğudrət iyən iştihodi ğədərədə bə Ğıron iyən peyğombəri(s) sınnəti  əməl bəkardem.peşo əbdurrəhman ıştə ım şərtış bə osmani həm voteşe və əv bilofosilə çəy ım təklifış ğəbul karde.bə həmonə cəhəti xoto,ibn ovfi de osmani beyətış karde.

Kali mənbəonədə omə ki,Əli(ə) çı əbdurrəhmon ibn ovfi ım şərtış inev hiyləgərətiş zıne və bəy hamyeşe:” tı osmanı vıjniye ta bətı oqardo.ım iminə kərə ni ki,tı de əmə Əhli-Beyti mıxolifətədə icma kardedəş və əməni çəmə həxıku oqəteydəş.ım ko bəçəmə zidd qıləy sınnət və adəti təbdil bıə”.....

Ha holədə osman bə xilofəti kursi nışte və hukuməti koonış bəştə dast qəte.əv ki,bəştə ehdəş peqətə be ki,bə Xıdo-Rəsuli(s) sınnəti əməl bəkarde,əmmo əv nəyinki,bə peyğombəri(s) sınnəti,bəlkəm bə əbu bəkr iyən uməri hukuməti şivəon həm əməlış nıkarde.osman bə Islomi erjon iyən usulon veyni əməlış nıkarde və ğərol bekardey koyədə ıştəku zəyfətiş nışon doe. bənə mərvan iyən çəy pı ki,har dıqləyni de islomi peyğombəri(s) vositə çı Mədinəku dərbədər bıəbin,Osmani ıştə nezə odəmonış bə Mədinəş varde.qıləy ko ki,bə osmani tələbon rəğmən,əbu bəkr iyən uməri ıştə xilofəti zəmonədə əvış nıkarde.osman çımisə əlovə deştə amyuəzo mərvan ibn həkəmio bə Mədinə vardey,çəy dastış bo mısılmınon iştimoyi iyən siyosi ğərolon bekardey koyədə ojış oqəte və mərvan şe-şe bə osmani vəziri məğami həm rəse və de har roy vositə ıştə tələbon bə vırə rosneydəbe.coqləyni nımunə vəlid ibn uğbə be ki,əv həm çı osmani nezə odəmonku be və osmani əvış çı Kufə fərmondor və rəyisış təyin karde.vəlid hətto bə islomi zohiri həm əməl və rioyət kardedə nıbe.əv ikərə sıbhi nımojış bə məst bıey xotom ço rıxətış vote və bə məçitədə bıə kəson voteşe:ehanə şımə dılon hestebu,az tiki həm vey bıvotom.çı vəlidi ım şərobxorəti bə həmmə kəsi quş rəse,əmmo osmani bəçəy şərobxorəti xoto bəy hiç qıləy cəzoş nıdoe.vəlid əkəs be ki,peyğombəre-əkrəmi(s) zəmonədə çəy barədə qıləy ayə nozil bıə.bın ayədə əv de fosiğ nomi təğdım kardey bıə.....

Hətto osman ıştə hukuməti zəmonədə ikərə həzrət Əli(ə) tələbış karde ki,Mədinəku xaric bıbu. əmmo,i mıddəti bəpeştə çə həzrəti Mədinədə nıbeyış hissış karde,ijən ə həzrətiku tələbış karde ki,bə ın şəhr oqardo.əmmo,çandə mıddət bədiqə ibn Əbbosış vığande ki,Əli(ə) ijən Mədinə şəhriku xaric bıbu.Əli(ə) çəy çın bemənoə koyku norohət be və hamyeşe:”Əbbosi zoə,osman çımıku tələb kardedə ki,mı bənə ov kırnə şatıri bıbum ki,iqlə royədə bışom-boom.əv bəmış ikərə vote Mədinəku xaric bıbum,peşo tələbış karde ki.ijən oqardım.ısət həm ijən tış vığandə ki,Mədinəkui  xaric bıbum.bə Xıdo ğəssəm mı anədə osmanım mıdofiyəm karde ki,tarseydəm oxoyədə qınokor bıbum”.(Bə Nəhcul-Bəlağə qıləyu seyr-174-ə səyfə)....