Ilahi Rəhbəron-80

Ilahi Rəhbəron-80

Hətto osman ıştə hukuməti zəmonədə ikərə həzrət Əli(ə) tələbış karde ki,Mədinəku xaric bıbu. əmmo,i mıddəti bəpeştə çə həzrəti Mədinədə nıbeyış hissış karde,ijən ə həzrətiku tələbış karde ki,bə ın şəhr oqardo.əmmo,çandə mıddət bədiqə ibn Əbbosış vığande ki,Əli(ə) ijən Mədinə şəhriku xaric bıbu.Əli(ə) çəy çın bemənoə koyku norohət be və hamyeşe:”Əbbosi zoə,osman çımıku tələb kardedə ki,mı bənə ov kırnə şatıri bıbum ki,iqlə royədə bışom-boom.əv bəmış ikərə vote Mədinəku xaric bıbum,peşo tələbış karde ki.ijən oqardım.ısət həm ijən tış vığandə ki,Mədinəkui  xaric bıbum.bə Xıdo ğəssəm mı anədə osmanım mıdofiyəm karde ki,tarseydəm oxoyədə qınokor bıbum”.(Bə Nəhcul-Bəlağə qıləyu seyr-174-ə səyfə)....

De peyğombəri siyrə və şıə ro beytul-moli ğarət kardey,bə dəvardə xəlifəon ğərolon zidd ğanun bekardey,ləyoğətinə insonon çı koyku bekardey və çəvon əvəzi ıştə noloyığə nezə odəmon bə vəzifə vardey,bənə Əbuz Zəri bıə peyğombəri(s) yolə səhobəon bəçəvon sərvəton cəm kardey koy ifşo kardey xoto bə Rəbəzə dərbədər kardey,çı İslomi peyğombəri(s) bəfodorə səhobə Əmmar Yasiri de tosə çəy mardey jıe-kuey və coqlə ziyodə beədolətinə koon boyis be ki,mıxtəlifə şəhronədə millət bə osmani hukuməti ələyh bəsə sapoysə beheşton və bə Əli(ə) punhon iyən oşkoə mıxolifəton rəğmən,həmonə etırozəkəyon osmani kə çıl ruj mıhosirə bəpeştə,nəhoyətən osmanışon bə ğətl rosne. çı inhirofon,kəcə rəftoron,bəştə əhdi bəfo nıkardey və zılmiku oqonə millət,həzrəte Əli(ə) oxoyədə vistı penc sor hədəfin iyən əzobdoə sukuti bədiqə,yeqanə ro ımışon vinde ki,bə ə həzrəti səmt bışon və deəy beyətkon.Əli(ə) ıştən bın barədə jıqo hamyedə:”ğəflətən de təəccıbi vindeme ki,millət har tərəfiku bəmı hucum vardəşone.çoko ki,kam mandəbe Həsən iyən Huseyn poymol bıbon və çımı əbo dı tərəf dıriyəbe və millət çımı qırdo qardedəbin”.....

Həlbəttə,çı milləti ım hucum vardey,bəçəvon ıştə kardə əməlonku peşmonəti xoto nıbe,bəlkəm boştə mənfəəton oqətey iyən ğudrəti bəştə çanq vardey xoto jıqo confışonəti kardedəbin.əmirəl-muminin ki, çın mevzuku aqah be,jıqo hamyedə:” çoko ki,az çəvon beyətım ğəbul karde və boçəvon koon islohiro ğıyomım karde,iqlə dastə ıştə əhd-peymonış darışte,iqləyni diniku xaric bin və coqləyni həm de sıtəmi məşğul bin.jıqo bızın çı Xıdovəndi ım sıxanışon məsənıbe ki,hamyedə:”ım axırəti dınyo bəkəson məxsuse ki,çı barzəti dumo nin və cinoyətkorə ro şeydənin və çokə ağıbət bə təğvaninə şəxson məxsuse”. Ğısəs.83.

Peşo ə həzrəti hamyeşe:”bəle bə Xıdo ğəssəməvışon məse və famin(dərəsin),lakin dınyo çəvon nəzədə cilvəş pəydu karde və çəy rızğo-bərğ və cəh-cəlol iyən cazibə çəvon nəzəonədə dəvəşe.bə Xıdo ğəssəm ki,donəş poə karde və insonış ofəye,əgər çı beyətkəyon ziyodə cəm və duston vucud bıə nəbe,huccətış bəmı təmom nıəkəy və Xıdovənd çı alimonku əhd-peymonış sıənəbe ki,çı sıtəmkoron vey hardey iyən məzlumon vəşyanəti mığobilədə orom nımando və betafut nıbu,çı xilofəti nıxtə saru əğandim  və çəy oxo bənə sıftə i vindeme və bə zəmon əvindin ki,şımə dınyo çımı palu jıqo exroc və bemığdore ki,bənə bızi efışney həm erj və ğeymətış ni.(Nəhcul-Bəlağə-3-ə xutbə)......

Əli(ə) ki,çok zıneydəbe əvon həmonə millətin ki,bə Ğədiri ğəhrəmonəti etıno kardəşon ni və Səğifədə bekardə bıə ğərolışon səhih zınə,ın torıxi iyən əbədi mandə sıxanon votey bənav hamyeşe:”ehanə mı boşımə   vəzir iyən himoyədor bıbum,vey çoke ki,boşımə əmir ya hukmdor bıbum”.hətto hamyeşe:”əgər şımə ijən mıro vadoon və cokəsi bıvıjnon,de əy mıxolifət nibəkardem”.əmmo,mığdorış ziyod bıə millət beəmonə formədə tələb kardedəbin və İmomi(ə) ğərəz bəçəvon tələbon cəvob doey co çorəş nımande və xilofətış ğəbul karde.Əli(ə) ıştən bın barədə jıqo hamyedə:”şımə çımı daston oj karde və mı əvım bastıme və şımə əvın kəşeyone və az cəmım karde.peşo bənə axuron daxil bıə təşnə şatıron çımı qırdo izdihom kardeyone.joqo ki,çımı məşo çımı poku beşe və çımı əbo çımı duşiku eqıne və zəyifon po bıno mandin.milləti demı bıə beyəti şoyvonəti bəvırə rəse ki,hırdənon həm şo bin və yolə sinnədə bıə kəson həm larze-larze bəçımı səmt rəvonə bin,omin”.