Ilahi Rəhbəron-82

Ilahi Rəhbəron-82

Jıləvoni həzrət Əli(ə) bə siyosi hay-huyon iyən məxfi iyən punhonə mıxolifəton nəzə nıkardə holədə,de milləti koon məşğul be və de noloyığə fərdon çı koyku bekardey və çəvon əvəzi ko bələd iyən salehə şəxson noey,ıştə usuli iyən əsosə planonı bərnoməş bino karde.bə Ələvi hukumətiqırd məsul şəxson elonış karde ki,əvon bəştə tojə məsuliyyət və vəzifəon bənə qıləy əbzori nəzə məkənən,bəlkəm əy qıləy əmonət bızınən ki,bəpe çəy mığobilədə məsuliyyət hisskon və qıləy ləyoğətinə əmonotdor bıbənən.ə həzrət həmçinin bəştə qırd karquzar və koəvonon sıfarışış karde ki,xəyonətkoron bə vəzifə nınon,sodə jimonkon,bə bo tənğıdəkəyon ojkon və  çı çaplus iyən yaltağon vəy bıqəton.əvon bəpe de umum milləti sərostə holətədə irtibatışon bıbu və şuar nıdoə holədə çəvon muşkilaton həlkon.bəpe məzlumon həxon mıdofiyəkon və bə zolım iyən sıtəmkoron ələyh beşon.bəpe de milləti miyono təfrığə eğandə kəson şiddətinə rəftor bıbu və çı İslomi camiyə vohidəti və ibemoni hifzkənən,oqətənən.qırd ğəzovət iyən mıhokimə koonədə ədoləti usul iyən prinsipon nəzədə bıqətənən və hiç qıləy farğ nınoə holədə məhkəməon bərpokənən.həxı mıdofiyəkən.daxili iyən xarici deşmınon canq icod kardə zəmonədə de təcavuzkoron cohodkənən,canqi meydoniku fərol məkənən.səbarzəti zəmonədə de əsiron humansitə formədə rəftorkon və məğlub iyən zəxmin bıə kəson təğib  nıkon,canqi sıftə binoəkə nıbon və çı ədoləti marz və dayirəku xaric nıbon......

Imon Ələvi hukuməti iqlə baxşikuye ki,çı peyğombəri(s) bəpeştə de navnə xəlifəon min cumlə seminə xəlifə siysosəton  hiç qıləy nezətiş və şəbohətış nıbe.bın zəmon çı zər iyən zu soybon çın vəzyəti dəvomi bəştə nəf iyən xeyri vindedə nıbin,orom iyən sakit nımandin və səyışon karde ki,ıştə de həzrət Əli(ə) vindemonədə ə həzrəti bo ıştə nəzə əvəz kardero vodorkon.əmmo,çoko ki,vindeşone ə həzrət de hiç vəchi ıştə usuli iyən prinsipial mevğıyyətiku,ıştə həxtələbti iyən ədolət tələbətiku dast nipebəqəte və hiç qıləy şərayiti jiyədə bo sazış kardero hozzı ni,əve əvon ıştə siyosi,hərbi iyən təcavuzkoronə hiyləonışon bino karde.bın miyono bebəsirət iyən ıştəni mığəddəs nışon doə dastəon bə iqlə vırə cəm bin və çı zər,zu iyən təzviri se kıncişon təkmilışon karde.nəğl bıə ki,İslomi əzizə Peyğombər(s) ki,ıştəni zohirədə İslomışon vardəbe və bənə mısılmoni nışon doə kali səhobə və mınofiğon mohiyyətiku çok-çoki xəbədo be,de qıləy nığılə nəzə Əli(ə) xilofəti devroni telə hodisəonku çı naviku xəbədo be və hamyeşe:”bə Xıdo ğəssəm Əli de Ğasitin (tuğyongəron),Nakisin(ıştə beyəton darıştəkəson) iyən Mariğin(dıniku mınhərif bıə kəson) canq kardə kəse”......

Muhim iyən əsosinə nuktə ıme ki,de ım seqlə cərəyoni canq kardey ki,çəvon miyono İslomi əzizə peyğombər(s) kali səhobəonku hestebe və əvon ıştəni bənə mığəddəsə odəmon nışon doydəbin,əve ko jəqo həm sodə və hoston nıbe.ısət həm canqi sıftəku ım telə hodisəon təhğığ kardeydəmon.qıləy canq ki, peyğombəri(s) jimoni həmro ayişə bəvədə qıləy yolə rolış hestebe.əv əbu bəkr iyən uməri xilofəti zəmonədə bəy ziyodə ehtırom noydəbin,əmmo osman çəy ım şən və etıborış bəkam karde.bə həmonə dəlili xoto,çəvon miyono şiddətinə ixtilof buruzış pəydu karde.joqo ki,ayişə voteşe:ım nodonə piyəmerdi bıkıştənən ki,kofir bıə.əv həmçinin de bə mıxtəlifə ğəbiləon nomə nıvıştey,əvoni təşviğ kardeydəbe ta osmani bıkışton.çoko ki,ayişə çı osmani kıştə bıey xəbəş məse və hələ de milləti vositə həzrət Əli(ə) xəlifə vıjniye məsələku xəbəş nıbe,çı osmani barədə jıqoş vote:osman boştə xıyzoni(yəni bo bəni-uməyyə) qıləy yavə ağıbət baği bəhaşte.əmmo,çı həzrət Əli(ə) xəlifə bıey xəbə məsey bədiqə,ıştə nəzəş qordıne və çı osmani ğatilonku intiğom sıey tələbış karde.həyğətədə ayişə bə təlhə iyən zubeyri xilofəti umuş hestebe, əmmo qıləy zəmon ki,məlumatış pəydu karde ki,Əli(ə) bə xilofəti rəsə,Məkkə de Mədinə miyono nimə royədə bə Məkkə oqarde və çı osmani məzlumiyyəti  pərçəmış rost karde və çəy xuni bəhoş tələb karde. təlhə və zubeyr ki,çok-çoki zıneydəbe çəvon bə xilofəti rəsey royədə səbarzəti həmməysə dıjdə əbzor,çı islomi camiyədə ayişə mevğıyyətiku oko doey be ta əvon çın fırsətiku istifodəkon və milləti bə Əli(ə) əks təhrikkon,rostkon.