Ilahi Rəhbəron-84

Ilahi Rəhbəron-84

Osmani ki,vindeşeş ğərəz canq və muharibə həni co hiç qıləy çorə ro mandəni,deəvon canq kardeyro ıştə ləşkərış hozzı karde.Cəməli odəmon çoko ki,zəyfəti hiss kardeşone,Bəsrə ləşkəriku sulh tələb kardeşonevə voteşone ki,de tobə Əli(ə) Mədinəku omey və ın məsələ həll kardey,canqi oqətəmon və dəvom mədəmon. həmçinin əvon təklifışon doe ki,fəğət bəvon icozə doey bıbu ki,bə Bəsrə şəhri daxil bıbon və bəvon bə ostandori iqomətqo,məçit iyən xəzonə nez mandey icozə doey nıbe.Osman bin Huneyf ki,hiçvaxti təsəvvır kardedə nıbe təlhə iyən zubeyr ki,Xıdo-Rəsuli(s) səhobən,xəyonət nibəkardeyn və ijən ıştə əhdi nidəbarışteyn,əve çəvon təklifış ğəbul karde və əvonış bə Bəsrə dılə vadoşe.əmmo,əvon ijən bədəhdişon karde,bə Bəsrə və bə məçiti hucum kardeşone və de Bəsrə ostandori vositə camaat nımoji votey vəyışon qəte və çı milləti miyono tars iyən vəhşət icod kardero, əmrışon karde ki,tosə çı Osman bin Huneyfi coni beşe bəy de taziyonə ğırmənci bıjənon.çəy səşon toşe və çəy rişışon oroxne və çəy vırəku bekardeşone.əvon beytul-molışon ğarət karde,hafto nəfər hıvoskə iyən sərbozonışon kışte və şəhrışon bəştə təsərruf iyən işğali ji vardeşone.....

Əli(ə) ki,çı Bəsrə işğal iyən çəy odəmi norohət kardə hodisəonku xəbədo be de qıləy hozzı bıə ləşkəri bə Bəsrə nezi ome rəse.Cəməli odəmon ijən deştə beməxəti bə Əli(ə) ləşkəri həmlə kardedən.Əli(ə) həni çımisə vey səbr kardeyış rəvo iyən cayiziış nıvinde,çı peyğombəri(s) canqi zirehış bəştə tanış karde və həmməysə bənav bəştə əhd-peymoni darıştə kəson həmləş karde və çəvon rınəş pəle.məələsəf bın daxili canqədə həzrət Əli(ə) ləşkəriku 5 həzo nəfər və çımisə həm vey çı Cəməli ləşkəriku kıştə be.Əli(ə) canq bə oxo rəsey iyən təlhə və zubeyr kıştey bədiqə,ayişəş de ziyodə izzəti bə Mədinə səmt vığandeşe və ə həzrət ıştən həm de tosə qıləy vırə əvış dəvone.demiyən bə həzrət Əli(ə) xilofəti zidd bıə məkrinə planon vəy qətey bıə.Əli(ə) noçor mande və həni bə Mədinə onıqarde və çı Bəsrəku bə Kufə şe ki,bə muaviyə Şamədə bıə hərbi mərkəzi nez be.həzrət Əli(ə) əyo istiğrarış pəydu karde və ıştə xilofətış ğoym karde ta neziku bəy beyət nıkardə çı muaviyə kardə hərəkəton rəsədko və bəy nəzorətko....

Ə həzrət sıftədə bə muaviyəş qıləy nomə nıvışte və çəyku beyətış tələb karde.nomə məzmun jıqobe: “ həmdo-səno bə Xıdo məxsuse.bərosti ki,osmanışon demı hiç qıləy məşvərət nıkardə və nəzə xəbə nıstənə holədə bə ğətl rosneşone  və peşo deştə məşvərət və iştimo (bəçımı səmt hucum vardeşone) və demı beyət kardeşone.havaxti ki,çımı nomə bətı rəse tı beyətkə və ıştə paluku çı Şami yolə nımoyəndəon çımı palui bıvğand”.(İbn Əbil-Hədidi bə Nəhcul-Bəloğə bıə şərh-1,230)...

Muaviyə bın zəminədə nəyinki,qıləy meylış nışon nıdoe,bəlkəm bənə Cəməli odəmon osmani ğətlış bəhonəş ğərol doe və elonış karde çanədə ki,çı osmani ğatilonku intiğom nıstənom,orom və sakit nibəmandem.çımisə əlovə əv həmməysə bənav səy kardedəbe de milləti torsıney,çəvonku boştə beytəş se və co tərəfiku həm  de qıləy zumandə ləşkəri dılış hestebe Ələvi hukuməti məhfko və ıştən bə xilofəti kursi bınışto.əv boştə ım hədəfi bə həyğət rosnero,sufyan ğamidiş de şəş həzo sərboz iyın fədaiyon bə Furati ru kəno vığandeşe.əvon Furatu ru dəvardey bədiqə,de tosə Ənabri şəhri marzi omin rəsin və çanədə zuşon vışkiye,çə vırə bemıdofiyə millətışon ğətlı-am və ğarətışon karde.....

Həzrət Əli(ə) çın macəraku aqah bıey bədiqə,bə Kufə məçit ome və qıləy aqahəti baxş kardə  və həyoconinə xutbəş irod karde və hamyeşe:”aqh bıbənən ha millət ha!çı zılmət iyən şəri ləşkər bə Ənbari şəhri hucumış kardə və çə vırə fərmondor şımə bıvə bıə Bukraşon əsir qətə.əv ıştə zu vışkiye ğədərədə çəvon hucumon mığobilədə mığovimətış nışon doə və çı Xıdovəndi roziyətiş bəsə dınyo jimoni zəro-bərği cozibəsə bəpeş qətə.şıməku piyedəme ki,rəyrə bəsə səpoysə bəhıştiyon və de qıləy vohidə ləşkəri bə deşmıni qıləy dərs bıdənən ki,həni bəşmə marzon təcavuz kardey curəti pəydu nıko və dayimi surətədə bəşmə təzavuz kardeyku dast bıkəşon”. (Nəhcul-Bəlağə,səyfə-27).....