Ilahi Rəhbəron-85

Ilahi Rəhbəron-85

Əli(ə) de qıləy nomə vositə çı muaviyəku beyətış tələb karde.əmmo,əv bın zəminədə nəyinki,qıləy meylış nışon nıdoe,bəlkəm bənə Cəməli odəmon osmani ğətlış bəhonəş ğərol doe və elonış karde çanədə ki,çı osmani ğatilonku intiğom nıstənom,orom və sakit nibəmandem.çımisə əlovə əv həmməysə bənav səy kardedəbe de milləti torsıney,çəvonku boştə beytəş se və co tərəfiku həm  de qıləy zumandə ləşkəri dılış hestebe Ələvi hukuməti məhfko və ıştən bə xilofəti kursi bınışto.əv boştə ım hədəfi bə həyğət rosnero,sufyan ğamidiş de şəş həzo sərboz iyın fədaiyon bə Furati ru kəno vığandeşe.əvon Furatu ru dəvardey bədiqə,de tosə Ənabri şəhri marzi omin rəsin və çanədə zuşon vışkiye,çə vırə bemıdofiyə millətışon ğətlı-am və ğarətışon karde.....

Həzrət Əli(ə) çın macəraku aqah bıey bədiqə,bə Kufə məçit ome və qıləy aqahəti baxş kardə  və həyoconinə xutbəş irod karde və hamyeşe:”aqah bıbənən ha millət ha!çı zılmət iyən şəri ləşkər bə Ənbari şəhri hucumış kardə və çə vırə fərmondor şımə bıvə bıə Bukraşon əsir qətə.əv ıştə zu vışkiye ğədərədə çəvon hucumon mığobilədə mığovimətış nışon doə və çı Xıdovəndi roziyətiş bəsə dınyo jimoni zəro-bərği cozibəsə bəpeş qətə.şıməku piyedəme ki,rəyrə bəsə səpoysə bəhıştiyon və de qıləy vohidə ləşkəri bə deşmıni qıləy dərs bıdənən ki,həni bəşmə marzon təcavuz kardey curəti pəydu nıko və dayimi surətədə bəşmə təzavuz kardeyku dast bıkəşon”. (Nəhcul-Bəlağə,səyfə-27)...

Əmmo,de milləti çı həzrət Əli(ə) mığobilədə bıə sıstəti iyən səhlənkorəti,muaviyə de qıləy ğəddorə fərd bıə busr ibn ərtah vositə coqlə ləşkərış boştə mıxolifon etosniyero vığandışe.əvon həm Yəmən iyən Hicozədə bə Əli(ə) hukuməti jiyədə bıə məntəğəon təcavuz kardeşone və ziyodə insononış kışte.çoko ki,ım ğəmənqiz iyən  telə hodisəon xəbə bə Əli(ə) rəse,ə həzrət ijən de qıləy xutbə vositə çı milləti sıstəti iyən bə itoəti nıpemandey koyış tənğıdış karde və əvonış bə cihodi səmt vaqış je.əmmo,ijən çəvonku qıləy mısbətə cəvobış nıməse.....

Əli(ə) ləşkəri afiyət tələbəti iyən sabit ğədəm nıbey muaviyə mışohidə kardey bədiqə,ın dəfə bə ğərol ome ki,i dastə ləşkəri bə İrağ bıvğando ta de vəhşət iyən tars icod kardey,əvoni bə muaviyə beyət kardey vodorko.əvon həm de milləti ğətlı-am iyən ğarət kardey koy məşğul bin.

Əli(ə) de ın xəbə məsey, de şiddəti norohət be.məcbur be ijən milləti vanq bıjəno və bəvon xitob kardə holədə hamyeşe:”...mı şımə sıst himmətə milləti miyono bə sıtəm iyən təcavuzi zidd ğıyomım kardə  və bə dodi rəsey fəryod jeydəm və şıməku komək tələb kardedəm,şıməku komək tələb kardedəm.əmmo,şımə bəçımı sıxani quş doydəniyon və çımı bərnoməon himoyə kardedəniyon və çımı fərmonon mığobilədə sıstəti nışonon doe.əfsus ki,nə deşmə çı xuni intiğomi sıey beydə və nə deşmə koməki bə barzı hədəfon dast pəydu kardey beydə”.(Nəhcul-Bəlağə-39-ə xutbə)....

Çın hodisəonku əlovə çı həzrət Əli(ə) de muaviyə miyono noməon nıvıştə be və har dı tərəfiku bo mızokirə kardeyro nımoyəndəon vığandey be.həzrət Əli(ə) qırd səy və cəhdon bımi sərf be ki, çı qıləy dıjdə canqi vəy bıqəto.əmmo,məələsəf çə həzrəti qırd hərəkəton benəticə mande və çı canqi zəminəş hozzı karde.

Həyğət ıme ki,həzrət Əli(ə) deməkə ki,bənə Malik Əştər iyən Əmmar Yasiri bıə şucoətinə əshobonış hestebe,əmmo de qıləy afiyət və rohətəti tələb kardə və bəsirətışon nıbə milləti dimbədim be ki,bo bə həzrəti komək kardey iyən dıl sutuney fikışon nıbe.Kufəvıjon ki,çı ğədimə zəmoniku de Şami qıləy rəğobətışon hestebebə zəmon bo canq kardey hozzı bin ki,həni çı neziku canqi xətər iyən təhlukəşon hiss karde.

Həzrət Əli(ə) de muaviyə miyono caqni ləşkrə səfədə mandə holədə,ə həzrət bəştə ləşkəri hamyeşe:”şımə canqi sıftədə bino məkənən.illa ki,əvon canqi binokon.bın surətədə  həx deşməy.ehanə məğlub bin,fərori iyən vitəkəson məkıştənən.ikəs ki,ıştəni mıdofiyə kardey zıneydəni,bəy ziyon mərosnənən və məcruh iyən yarə jə bıə kəson məkıştənən”.