Ilahi Rəhbəron-86

Ilahi Rəhbəron-86

Əli(ə) de ın xəbə məsey, de şiddəti norohət be.məcbur be ijən milləti vanq bıjəno və bəvon xitob kardə holədə hamyeşe:”...mı şımə sıst himmətə milləti miyono bə sıtəm iyən təcavuzi zidd ğıyomım kardə  və bə dodi rəsey fəryod jeydəm və şıməku komək tələb kardedəm,şıməku komək tələb kardedəm.əmmo,şımə bəçımı sıxani quş doydəniyon və çımı bərnoməon himoyə kardedəniyon və çımı fərmonon mığobilədə sıstəti nışonon doe.əfsus ki,nə deşmə çı xuni intiğomi sıey beydə və nə deşmə koməki bə barzı hədəfon dast pəydu kardey beydə”.(Nəhcul-Bəlağə-39-ə xutbə)....

Çın hodisəonku əlovə çı həzrət Əli(ə) de muaviyə miyono noməon nıvıştə be və har dı tərəfiku bo mızokirə kardeyro nımoyəndəon vığandey be.həzrət Əli(ə) qırd səy və cəhdon bımi sərf be ki, çı qıləy dıjdə canqi vəy bıqəto.əmmo,məələsəf çə həzrəti qırd hərəkəton benəticə mande və çı canqi zəminəş hozzı karde.

Həyğət ıme ki,həzrət Əli(ə) deməkə ki,bənə Malik Əştər iyən Əmmar Yasiri bıə şucoətinə əshobonış hestebe,əmmo de qıləy afiyət və rohətəti tələb kardə və bəsirətışon nıbə milləti dimbədim be ki,bo bə həzrəti komək kardey iyən dıl sutuney fikışon nıbe.Kufəvıjon ki,çı ğədimə zəmoniku de Şami qıləy rəğobətışon hestebebə zəmon bo canq kardey hozzı bin ki,həni çı neziku canqi xətər iyən təhlukəşon hiss karde.

Həzrət Əli(ə) de muaviyə miyono caqni ləşkər səfədə mandə holədə,ə həzrət bəştə ləşkəri hamyeşe:”şımə canqi sıftədə bino məkənən.illa ki,əvon canqi binokon.bın surətədə  həx deşməy.ehanə məğlub bin,fərori iyən vitəkəson məkıştənən.ikəs ki,ıştəni mıdofiyə kardey zıneydəni,bəy ziyon mərosnənən və məcruh iyən yarə jə bıə kəson məkıştənən”.

Həzrət Əli(ə) çın cıvonmerdəti iyən alicənobəti mığobilədə çı muaviyə kardə iminə hərəkət ım be ki,bəştə ləşkəri fərmonış doe ta çı Furati ruy ovi bə Əli(ə) ləşkəri dimi dəbaston.əmmo,Əli(ə) bəştə ləşkəri əmrış karde ki,çı muaviyə ləşkəri bə dumo pekırnon və əvi bəştə ixtiyor biyon. əmmo Əli(ə) Furati ruy ovış bə Şami ləşkəri dimi nıdəvastışe.

Çın ləzəku dıqlə ləşkəri miyono canq bino be.qahi idastə odəmon formədə,qıləy zəmon həm təkbətək bə iyande həmləonışon karde.canq Hicri-Ğəməri sıvi şəşminə sori Zilhiccə manqi bino be.çokonə ki,manq bə oxo rəse və Məhərrəmə manq bino be,canq bə bə çın manqi hərom bıey xoto,əve bın manqədə canq kardey oqətey be.əmmo imanqnə zəmon bə canqi sənibəton bino bıey mane nıbe və Səfə manqi ijən canqi otəş şuləvər be.həzrət Əli(ə) dahiyonə iyən mudəbbironə rəhbərəti jiyədə iyən de ə həzrəti bəfodorə yaro-yavəron ıştə coniku dəvardey, tədricən həzrət Əli(ə) səbarzəti nışonəon oşko be və muaviyə ləşkər çı məğlubiyyəti astanədə ğərolış qəte.bın həssos iyən tale həlləkə ləzədə əmr as ki.qıləy hiyləgərə odəm be,bo muaviyə ləşkəri dəboxtey vəy qəteyro,qıləy məkrinə planış one və əmrış karde ki,ləşkəri odəmon çı Kərimə-Ğıroni vərəğəon bə nizə səy bıjənon və iddiokon ki,əmə bə Ğıroni tabemon.bın zəmon həzrət Əli(ə) ləşkəri miyono qıləy şəkko-tərdid icod bəbe və çı həzrət Əli(ə) ləşkəri ğələbə və səbarzəti vəy qətey bəbe......