Ilahi Rəhbəron-98

Ilahi Rəhbəron-98

Həzrət Əli(ə) məzlumonə və ğəmənqizə şəhodəti bəpeştə,İmom Həsən Mujtəbo(ə) qıləy qonə məsuliyyətış yəni çı İslomi camiyə rəhbərəti koş bəştə ehdəş peqəte və bə İlahi məşiyyəti əsos de qıləy vey saxtə şərayiti dimbədim ome.qıləy zəmon ki,İslomi camiyə  dumo yənde bənə Cəməl, Siffeyn iyən Nəhrivani bıə canqon şoyd be  ki,çandə həzo nəfər kıştə və yarajə bin.İslomi camiyə təhrif bıəbe və Muhəmmədi(s) vardə əslə İslomi əvəzi əməvi din mevcud be və İslomi sıftənə soronədə bıə sodə jimon kardey əhvol-ruhiyyə ısət de dəbdəbəninə sarayon əvəz bıəbe.həni nə çı peyğombəri(s) zəmonədə bıə navkonə bıvəti iyən bərobərətiku əsər-əlomət hestebe. bəlkəm, təbəğavari fosilə və irğçiyəti dodı-bidod kardedəbe.bənə Əbuzəri bıə İslomi sıftənə soronədə bıə yolə əshobon ki,çı peyğombəri(s) mahbubə şəxson bin,ıştə kə-bəonku dərbədər bin və bənə Meysəm Təmmari bıə şəxson həm darədə ehaştey bin.İslomi ğıvvon ki,bəçəvon siyosəton zidd bin,ya de şini doey vositə bə dast sıey beydəbin və ya de təhdidi etosniyey beydəbin.de muaviyə məluni vositə həzrət Əli(ə) şiəyon iyən tərəfdoron nomon bəçəy əmron əsos şəy dəftəriku pok və moley beydəbin və  ehanə əvon qıləy vəzifə və postədə həm bıəbin,ıştə koyku ixroc beydəbin…..

Jıqo qıləy şərayitədə İmom Həsən(ə) ki,ıştə əzizə pı usuli iyən mıştərəkə siyosəton cəhətədə məsuliyyətış hissış karde və ə həzrət çın təhrif iyən iştimoyi,fərhənqi iyən siyosi nobərobərtiyon mığobilədə orom nınışte.İmom Həsən(ə) bə jıqo zılımon və dodı-bidodon tov vardey nıəzıni labud be ki,ə həzrət bi Muhəmmədi(s) vardə əslə dini hifz kardero ğıyomko və etırozko.bə həmonə dəlili xoto,çı muttəğiyon mevla həzrət Əli(ə) şəhodəti bəpeştə əmrış karde ta millət Kufə məçitədə bo cihodiro cəm bıbon.əmmo çəy bənav çı İmom Həsəni(ə) de muaviyə miyono noməon nıvıştəy be ki,ısət həmonə nomə bəşmə xıdmət rosnedəmon:

Bismillahir-Rəhmanir-Rəhim.Xıdo bandə Həsən ibn Əmirəlmuminin Əliku(ə) bə muaviyə ibn əbi sufyan.səlom bıbu bətı.mı bə İlahi dərqo bə həmonə vohidə Xıdo ki,ğərəz əv co qıləy məbud ni.ıştə zıvoni de həmdo-şukri bino kardedəm.əmmo,bəəd.Yolə Xıdo Muhəmmədış(s) vıjniye.əv bo qırd aləmon rəhmət be və İlahi xəbəon komilə surətədə ibloğış karde,rosne ta qıləy zəmon ki, conış bə con ofəyə Xıdo təslimış karde.əmmo,peyğombəri(s) mələkutiyə rehləti bədiqə ərəbon bəsə ğudrətisə de iyande canqışon bino karde.və çun əmə çı Muhəmmədi(s) Əhli-Beyt və çəy xanedan çəvonku insofımon tələb karde,həmmə kəs çəmə ətrofiku pərokəndə bin və de bo əmə  deşmınəti iyən canq kardero I bin.həlbəttə,əmə deəvon canqo-cidol kardeyku dastımon kəşe. zira,əmə çı islomi hifz kardey iyən umməti vəhdətiku norohət bimon və çəyku tarsımon hestebe ki,mınofiğon,kufr və şırki dastə çı macəra dumo bıbon və bo İslıomi məhf kardero hərəkətkon. əmmo,ımruj təəccıbədəm tı qıləy mevzu barədə iddio kardedəş ki,hiç qıləy kamə həx həm bəvədə ni.tı nə çı dindorəti nəzəku qıləy ruşinə torıxı heste və nə islomədə qıləy bə tarifi loyığ məğamı heste.tı çı Ğureyşi yolonku bə Xıdo-Rəsuli(s) nisbətədə bıə həmməysə kin-kudurətinə kəsi fərzəndiş.bızın ki,bın nıvıştə nomədə çımı niyyət bətı huccəti təmom kardeye ta maşkinə ğıyoməti ruji ilahi ədolətinə məhkəmədə həni hiç qılıy uzrı nıbu. Çən,çı sıtəmiku dast bıkəş və çı mısılmınon xuni rubeyku bə diyəro bımand.əmmo,bızın ki,ehanə tı ıştə zəlolətədə bımandoş,mı de mısılmınon ləşkəri bəştı səmt bomem və detı muharibə bəkardem ta Xıdo çəmə miyono mıhokiməko ki,əv çı hakimon həmməysə çokə qıləy….

Muaviyə çı İmom Həsən Mujtəbo(ə) nomə ğəbul kardey bədiqə,bo ə həzrəti qıləy noməş nıvışte və bəvədə səyış karde ıştə iyən ıştə xıyzoni mənfiyə cəhəton nəfy və inkorko.əv ki,çok-çoki zıneydəbe çı Əhli-Beyti(ə) Xıdo bvon əto kardə əxloği,siyosi iyən dini diroyət de hiç kəsi mığoyisə bıənin ni.əve ıştə nomədə bə İmom Həsən Mujtəbo(ə) xitobən nıvışteşe:ıştı noməm ğəbul karde və Xıdo-Rəsuli(s) iyən çəy fəzilıəton həxədə bəyon kardə çiyon dərəsim və zıneydəm ki,əv çı insonon sıftənəku de tosə oxonə qıləyni miyono həmməysə ləyoğətinə şəxs be.ın ummət Xıdo-peyğombəri(s) canişinəti barədə bə ixtilof eqınin.hiçvaxti şımə fəzilət və de Xıdo-Rəsuli(s) nezəti iyən şımə kanə torıxışon çı yodo bekardəni və şımə İslomədə bıə məğamışon inkor kardəni.əmmo,demiyən bə İmomi(ə) dıqlə nımoyəndə voteşe:oqardənən ki, çımı deşmə miyono fəğət şımşi hakiməti bəkarde. ….