Yonzəminə Həşi pənohədə

Yonzəminə Həşi pənohədə

Osmonədə məlayikon kəş-pəri avazi həmmə vırəş dəqətə.firiştəon dastə-dastə şı ərşiku bə fərşo nozil beydə.Mədinə şəhri həmmə vırə çı qıləy şovğ və nuri dılədə ğərğ bıə.Hicri-Ğəməri 232-ə sori Rəbiyus-Sani manqi həştminə ruji Mədinə şəhrədə peyğombəri(s) nəvəonku qıləyni vilodəti xəbə bə qırd vırə pevolo be və millət bə şoyvonəti ğərğ be.çın mıborəkə hırdəni sədo Mədinə şəhrış təzyin iyən ziynətinış karde.həmonə hırdən və qədə astovə ğərəz de Əbu Muhəmmədi kunyə bıə İmom Həsən Əskərisə(ə) co kəs nıbe.İslomi əzizə peyğombər həzrəte Muhəmmədi(s) qıləy sıxanədə hamyəşe:”çımı Əhli-Beyt(ə) bənə Nuhi(ə) kəştiye.hakəs ki,bəvon pənoh bıbo, nicot pəydu bəkarde və hakəs çəvonku co bıbu,ğərğ və məhv bəbe”.əmə həm bəpeyğombəri(s) ım sıxani tabe bıə holədə bə çın nicoti kəşti yonzəminə şəxsi yəni bə İmom Həsən Əskəri(ə) pənoh bardedəmon və bəçəy şıə ro tabe beydəmon.təbrik......

 İmom Həsən Əskəri(ə) ıştə de bərəkəti pur bıə 28-ə sornə umrədə bo aləmon qıləy əbədiyə irsış bə ərməğon vardeşe.qıləy holədə ki,əvon vey yavə şərayitədə jimon kardedəbin.ə həzrət ıştə iminə və əsosinə qəmədə həzrəte Muhəmmədi(s) vardə əslə İslomə dinış təbyinış karde və deçəy səhihə şikilədə bə milləti rosney koy məşğul be.peşonə muhimmə ğədəmədə çı İslomi mıxolifon iyən ıştə dini bə dınyo həvatə alimon şubhəon və işkalon cəvob doey be ki,əvon bə İslomi vavriski doə sima qıləy zərbə jıey dumo bin.siyosi fəoliyyəton və bə qıləy plani əsos idorəçəti de qırd təhdidon bə ico,coqlə qəm və ğədəm be ki,İmom Həsən Əskəri(ə) şodoşe və əməli surətədə nışonış doe ki,din iyən siyosət çı iyandeyku co bıənin ni.İmom Həsən Əskəri(ə) əziz-qıramiyə pı İmom Hadi(ə) hamyedə:”çımı zoə Həsəni vey səhihə zotış heste və həmməysə ğoymə huccəte.əv çımı həmməysə yolə fərzənd və çımı canişine.İmoməti sərçeşmə bəy rəseydə.çımıku çiç dəparseydon,çəyku sıvolkənən.zira,əv şımə ehtiycon bıə har çi çəy palu mevcude”....

İmom Həsən Əskəri(ə) ıştə hədəfi bənav bardey koyədə de ziyodə saxtə şərayiton dimbədim ome.Əbbosi xəlifəon siyosəton bə du iyən hiylə əsos be.İmom(ə) jıqo qıləy şərayitədə bəpe çı peyğombəri(s) Əhli-Beyti(ə) tərəfdoron bə sə-səhmon dənoənin be və əvoni bə ayəndə və vəomə umudəvo kardənin be.co tərəfiku çı şiəyon Yonzəminə İmomi(ə) devronədə bıə təşəyyu iyən şiyə zumand və pevolo beıy,boyis be ta Əbbosi sarayi odəmon İmomi(ə) ıştə nəzorəti jiyədə oqəto və bə həzrəti hiç qıləy siyosi fəoliyyət nışon doey icozəşon nıdoe.əmmo,azizə İmom(ə) çı har qıləy fırsətiku çok-çoki istifodə kardedəbe və de milləti rəhbərəti iyən hidoyəti koy məşğul beydəbe.ə həzrət ıştə imoməti kırtə zəmonədə ziyodə koonış bə vırə rosne.min cumlə çı İmomi(ə) elmi səyonku ımbe ki,mıxtəlifə məntəğonədə bıə şiəyon de nımoyəndəon təyin kardey roy vositə qıləy rabitə bərğərol kardedəbe,çəvon miyono qıləy şəbəkəş icod kardəbe və bəvon ıştə xəbəon rosneydəbe.min cumlə ə həzrət deştə məxfiyə siyosi fəoliyyəton məşğul beydəbe və bə şiəyon maliyyə koməkon həm kardedəbe.

Həmçinin ə həzrət milləti miyono umu ruhiyyə icod kardero və ayəndədə məxsusən çə həzrəti fərzənd İmom Məhdi(ə) ğeybəti devronədə umumi fiki hozzı kardero cəhdon kardedəbe ta hiçvaxti millət bə şək-şubhə iyən məyusəti dıço nıbon və yəğınışon bıbu ki,İlahi həyğiyə vədə real və əməli bəbe.həmonə şoyə xəbə və mıjdəvoni Yolə Xıdo çəy barədə hamyəşe:”əmə irodəmon karde ki,bə zəmini mustəzəfon iyən məzlumon mınnət bınəmon və əvoni (bəşəri camiyədə) rəhbərəti məğamədə və varison ğərol bıdəmon.(Ğısəsi mıborəkə surə,5-ə şərifə ayə).....

 İmom Həsən Əskəri(ə) bəştə çokə rəftori xoto,çı milləti dılonış bəştə səmt cəzbış kardəbe.Hicri-Ğəməri nəvminə əsrədə jiyə əhlı-sınnəti alimonku qıləyni ”Əlfusul-Muhimmə” kitobi soyb İbn Səbbağ Maliki İmom Həsən Əskəri(ə) həxədə jıqo nıvışteydə:”Bəvədə barzə vəsf.xıslət iyən fəziləton qırdə bıə be.Əv bo imomət iyən rəhbərətiro lozım və zəruri bıə har çı qıləy xısusiyyəti soybe və elm iyən zuhd,ağli kəmoli,ismət və şucoəti,kərəm iyən buzurquvarəti nəzəku və insoni bə Xıdo rosnə veyə əməl və rəftoronku bəsə həmməysə bənav be.yəni xilofət.İmomət və canişinəti barədə çəy buzurquvarədə pı de oşkoə holi mıjdəvoniş doəbe”.