Ilahi Rəhbəron-107

Ilahi Rəhbəron-107

Əli(ə) Nəhcul-Bəlağə kitobi pencominə xutbədə jıqo qıləy zəmoni şərhədə hamyedə:”çı fitnəon zuhur və buruz pəydu kardə zəmon,qıləy zəmone ki,bə nəfsani həvo-həvəson tabe beydən və hukmon çı bidəti çehrədə ıştəni nışon doydə.bın zəmonədə həxı çı botıliku co kardey vey saxt və çətine.qıləy holədə ki,ehanə həx çı botıliku co kardey və şəffof nıbu,həxı sima puşniyə bəbe və məxfi bəmande və əgər həx çı botıli soğnədə nımando,yavə sıxan votə deşmıni zıvon ğət və bırniyə əbi.əmmo,bəzi vaxt həxı ibaxş de botıli umuj qıniyedə.şeyton bəştə duston iyən tərəfdoron təsəllut pəydu kardedə(və fəğət)ə kəson ki,bə İlahi lutf və inoyəti şomil beydə(çı botıli rıjiku suğut bıeyku)nicot pəydu kardedə......

Səthi nəzə soyb bıə kali dindoron çı coskəon dini ruf və botınədən,dayima bə dini zohiron bovə kardedəbin.bın zəmonədə həm əvon İlahi rəhbəron va doydən və bə muaviyə anqıl qıniyedən. əmmo,bəsirətinə dindoron ki,Xıdovəndi lutf bəvon şomil beydə,hətto iləzə həm İlahi sıratəl mustəğimku xaric beydənin və de nığlə əndişə və fiki çı bəni-uməyyə palnon rəsəd kardedəbin və de tosə jimoni iyən şəhodəti oxonə ləzə,ıştə məktəbi usulədə sabitğədəm mandin.muaviyə de şiddəti çın qrip ki,çəvon dəvəşə rəyis  Hucr ibn Ədi Kindi be,çəyku tarsış hestebe və bəy həssos be,əve bə həmonə dəlili xoto,əv iyən çandə nəfər bəfodorə şəxsonışon bə şəhodəti məğam rosneşone.İmom Huseyn(ə) çı tel iyən dardnokə hodisəon mığobilədə hni tam jıey və sakit mandeyış cayiz nızıne və ıştə etırozi zıvonış oj karde.çın hərəkəti bəpeştə xəbərçin iyən casuson muaviyəşon vodor karde ta bə ə həzrəti hərəkəton nisbətədə qıləy nomə bınışvto.İmom Huseyn(ə) çın nomə cəvobədə jıləvoni nıvışteşe.

“Əmmo bəəd.qıləy nomə bəçımı dast rəse və əyo zikr kardə bıə ki,çəmə barədə bə xoşnıomə məlumaton ğəbulon kardə və votəyone ki,jıqo əməlon bomı loyığ vindeeəniyon…bızın bəşmə məlumon rosnə kəson,casuson iyən sıxançinonin ki,milləti miyono təfrığə donə peşandedən.mı nə bəştı ələyh canqi tədaruk vindedəm və nə bəştı ələyh ğıyomi fikədəm…əmmo məbodə xəyolkoş az ıştə sukutiku və ıştı botılə hukuməti mığobilədə sukutiku iyən cihod və ğıyomi tərk kardeyku xoşom omeydə,bəlkəm ıştə Xıdoku tarseydəm və ısət hətto qıləy uzr ki,bın barədə botı iyən boştı kofir iyən inhirofə tərəfdoron vardəme,çı qoniku vey bevəc qıləy uzre”.peşo İmom Huseyn(ə) bə Hucr ibn Ədi Kindi şəhodəti mevzu işorə kardedə və nıvışteydə:”bəqəm tı Hucr ibn Ədi ğatil niiş?bəqəm tı çəy nımojəvot iyən təğvaninə duston çı şımşi tıkiku nıdəvordıne?həmonə pokə insonon ki,bidəton məhkum iyən  və əmr be məruf iyən nəhy əz munkər kardedəbin və Xıdo royədə çı hiç qıləy mızəmmət kardə kəsiku sə-sıxaniku tarsışon nəbe.əmmo deəvon qırd ə ğəssəmon və ğoymə əhd-peymonon bastey və əmon doey bəpeştə,IN POKƏ MERDON DASTQİRI KARDE,Xıdoku nıtarsiş və de qırd xəsorəton əvonı bə ğətl rosne?”...

 İmom Huseyn(ə) coqlə vırədə bə muaviyə xitob kardə holədə nıvışteydə:”qıləy nomədə votəbe ki,ehanə boştə coni iyən bo Muhəmmədi(s) din və umməti xoto orom bıbıştom,vey çoke ki,bəştı ələyh ğıyomkom. əmmo bızın ki,əgər bəştı ələyh bəhıştom Xıdovəndi palu qıləy barzə məğami soyb bəbem.və əgər detı cihodi tərkım kardə və sakit mandəm,zıneydəm ki,hərəbaxtəti iyən dıjdə feyz çımı dasto xaric bıə və bəpe mı məğfırət tələbkom və İlahi dərqoyku bıpyom ki,çımı ko bə səhmon dəno və mıni bə xoşbəxtəti səmt səbəroko”.nomə oxonə baxşədə  İmom Huseyn(ə) bə muaviyə hamyedə:”tı ıştəni bo İlahi intiğomi hozzıkə və bızın ki,Xıdo ıştə ədolətinə məhkəmədə tıni mıhokimə bəkarde.həmonə məhkəmə ki,tıni dəbəqəte,ıştı qırd bə inson iyən dini zidd bıə hərəkətonış ğeydış kardə”.....