Bə Həzrəte Əbbas(ə)-i vilodəti məxsus bıə bərnomə
Bə Həzrəte Əbbas(ə)-i vilodəti məxsus bıə bərnomə
Əzizə əməson səlom, şımə ruj bə xəyr bıbu, əzizon şəbanə manqədəmon və ım rujonədə de vey mınosibəton dim bə dimon, ımruj ım bərəkətinə manqi 4 minnə ruje və de Həzrəte Əbulfəzle Əbbas(ə)-i milad ruji sorəqardışi bərobəre, həmçınin ınşanqonə İmom Səccad(ə)-i milad şəvi sorəqardışe ki ım mınosibəton bə şımə xıdmət təbrik ərz kardəm.
Həzrəte Əbulfəzle Əbbas(ə) bə çokə xusiyəton iyən fəziləton xoto, Əbulfəzl yəni fəzli soy bıə şəxs nom qətəşe.ə Həzrəte İmom Əli(ə)-i zumand və ğeyrətmandə hırdən be, torixədə Əbbos(ə)-i nom de bəfodori və isari bə icoe.
Imruj ım yolə şəxsiyəti barədə sıhbət kardedəmon, şıməni dəvət kardəm dəmə bə ico bımandən.
Mehribonon, hırdəni prosniyeədə, xıyzoni, xususi dədə və inə rol vey muhimmin. Həzrəte Əbbas(ə) tovfiğış be ki qıləy dədə bənə İmom Əli(ə) və qıləy inə bənə ummul Bənin(s) soyb bıbu.
Torixədə nəğl bıə ki İmom Əli(ə) bəştə bıvə “Əğil İbne Əbitaleb” hamiyəşe: “bo mı qıləy jeni peydo bıkə ki Ərəb ciqəmandə nəsliku bıbu, ta dəy vəyə bıkəm və əv bo mı qıləy şuca və ciqəmandə zoə bə dınyo bəvardo” və Əğil həm Umul bənin(s) bə İmom elanış karde.
Vote bəbe ki faxti Umul bənini dədəku, çəy kinə tələb kardeşone, çəy dədə bəştə həyot həmro və kinə soyağ omə və vindeşe ki çəy həyot həmro ıştə kinə mu şonə jey holədəy, kinə yəni Umul bənin(s) dəvardə şəvi hani ıştə inəro şərh doey holədəy.
Umul bənin(s) voteydə be:” çıme inə, az hanədə videme ki qıləy havzə doonış bıə boğədəm. Həmonə vırədə vey mivəon və qıləy ru heste. astovəon və ovşum dəvəşedə bin və az bə əvon diyə iyən Xıdo əzəmət və xalğəkəyon barədə fik kardedə bim, həminə fikonədə osmoniku ovşum, nozil bıə və çıme dovmənədə ğəror qətəşe və çəyku qıləy nur dəvəşe ki çəşon diğğəti bəştə tərəf cəlb əki, qıləy holədə ki təəccubədə bim, 3 qılə co nuraniyə astovəon çıme dovmənədə vindeme. Çəvon nuriku həm təəccub kardə bim, həminə hol-həvoədə bim ki xəbə vardə mələk vanq kardeşe və mıni xətob doşe, az çəy vanqi məsedə bim əmmo əy nıvindeme, əv votışe: “Fatemə, bə nuraniyəti iyən yoliyəti xoto, bətı mıjdəvonəti bıbu”.
Həzrəte Əbbasi bo çımi xoto Əbolfəzl nom noəşone ki xusiyətoni bənə şucaət, yol bey və ciqəmandəti de kəromət və mehriboni bə ico soyb be. Həzrəte Əbbas(ə)-i fəziləton həmmə çəy Zəmonə İmomi muğəddəsə nuron şua be ki bəy viriski doə be və əv bənə şəffofə ovəynə, həmmə əvon ıştə vucudədə qırdə və peşo reflaksiya əki. Kali arifon ə Həzrət(ə)-i Şəmsi Surə 2 minnə ayə nımunəonku zıneydən ki həmişə ruşinə həşi dumoədə hərəkətədəy. Xıdo Şəmsi surə 1 və 2 minnə ayəonədə hamiyəşe:
“ğəssəm bıbu bə həşi, və bəçəy ruşnə (nur) baxş kardə zəmoni, və ğəssəm bıbu bə ovşumi, bəçəy çı həşi dumo hərəkət kardə zəmoni”
Həzrəte Əbbas(ə) ıştə həmmə rəftoron və əməlonədə ıştə İmomiku itoət əki. əv hiç faxt ıştə bıvəku nəvəjən nıbe. Hətto milad rujədə. ki çəy milad ruj, İmom Huseyn(ə)-i milad rujiku 1 ruj bənave. Hicri Ğəməri 4 minnə sori Şəbanə manqi 3 minnə rujədə, İmom Huseyn(ə) və Hicri Ğəməri 26 minnə sori, Şəbanə manqi 4 minnə rujədə, Həzrəte Əbbas(ə) bə dınyo omə.
Xosə Tolışon, Canqi zəmonədə boydəğdoron səyo cəhd ıme ki çəvon boydəğ rost bıbu, boçiki boydəğ bənə muhimmə mehvər, fərmondə stabiləti nışonə və həmçınin canqəkəyon oroməti bə hisob omeydə və tosə bə zəmon ki boydəğ rost bıbu, ləşqər bəştə canq idomə dodə.çən boydəğdor ə kəse ki de şucaət tosə ıştə oxonə xuni muğavimət kardə ta çəvon boydəğ bə deşmonon dast ğəror nırəso. Aşura rujədə zəmoni ki İmom Huseyn(ə) ıştə əshabon canqiro hozzo əki, ləşqəri boydəği bə Həzrəte Əbbas(ə)-i dast doşe. ə kəs ki karde zınəş be ashabi şəhodət, hırdənon nolə, kinəon be vanqə arsi və deşməni kudurəti vinde zəmonədə həmçınan ğoyim və mıhkəm bımando, iyən de i qılə dasti boydəğ və co qılə dasti həxi şəmşi oqəto, fəğət Əbbas be. Həzrəte Əbulfəzle Əbbas həmmə insonon heyrəti bois be, bə çəy xotoe ki torixədə çəyku bənə əbədiyə boydəğdor yod bıdə.
Əzizon, ov həyot və jimoni illət iyən amil heste, torixədə omə ki qıləy rujədə, Roma hakim bo muaviyə qıləy şişə vığandışe və çəyku tələb kardəşe dıştə dıli piye ki əy pur ko, Muaviyə sərqərdon bıə ki bəpe şişədə çiç ekardəm, nəhayətədə Həzrəte Əli(ə)-i şaqirdonku qıləyniku komək tələb kardışe və əv həm votışe: şişədə ov ekə, buçiki Xıdo, Ənbiya surə 31 minnə ayədə hamiyəşe:
” har qıləy coninə çi çı oviku bə əməl vardemone.”
Ruma hakim ım fırasətiku vey təəcub kardışe və votışe: əv çanədə ağılmande. islamədə ov vey əhəmiyyətışe. İmom Sadiğ(ə)-iku qıləy rəvoyət heste ki: “ qıləy vırədə ki ov heste, əqə i kəs bə co kəson ov bıdə, bənə i kəse ki qıləy bəndə ozod kardəşe və əqə qıləy vırədə ki ov ni, ov bıdə, bənə i kəse ki bə qıləy inson jimon baxşıdə və bə kəsi nəfs dodə, quya bə həmmə millət jimon baxşıdə.”
Həzrəte Əbbas(ə) Kərbəlo macəraədə ıştə səfəri əvvəliku, Mədinəku tosə Məkkə və Məkkəku tosə Kərbəlo, İmom Huseyn(ə)-i kərvoni ovi təminəkə iyən səğğo be. De diğğət bə ım ki Yəzidi ləşqər bə İmom Huseyn(ə) və çəy əshobon ovi roy bastəş be, Həzrəte əbulfəzl deşmənon miyonku dəvardə və bə İmom Huseyn kərvoni ov doşe və səğğo bey ləğəbi soyb be. əmmo vey saxtə mərhələ, canqi oxonə ləzzəon be ki ə Həzrət muvəffəğ be ıştəni bə Forati ru nezi bırosno. əv ın kərə həm deştə hışkə ləvon iyən otəşinə cıqə, ıştə zəmonə İmomi bənav, ovi peşomeyku imtinoş karde.
Əbbas deştə eşğ və imoni, ovi məşki pur və bə xeyməon səmti hərəkət kardeşe. ə Həzrət bə ım erjinə toşə bə xeyməon rosniye xoto, həmçınan canq və de şəmşi vositə məşkiku mudafiə əki. Im ovi məşk, bəyro vey muhimm be, hətto çəy coniku. Jəqo ki məşki oqəteyro ıştə har 2 qılə dasti fido kardeşe, fəğət bə ım umid ki ıştə mardey bənav bəştə urzo yəni bə xeyməon ov rosniye, bırəsi, əmmo vaxti ti bə ovi məşk qıniyə və ov bə zəmin ekardə be, ğəmiku Əbbosi con həm bışə. Bəle, jıqoe ki Əbbos, bəştə fəzl və kərəmi xoto, “Əbulfəzl” ləğəbi soyb be, və İmom Huseyn(ə)-i nomi kənoədə, çəy nom bənə “Səğğa” və “boydəğdor” əbədi bıə.
Mehribonon bə ım bərnomə quş doe xoto şıməku təşəkkur kardedəm. Dəvət kardəm bə co bərnoməon quş bıdənən ki koy həmron bə şımə xıdmət təğdim kardedən.
