İlahi əsma iyən nomon

İlahi əsma iyən nomon

Xıdovənde-Aləm Ənami mıborəkə surə 83-ə şərifə ayədə jıqo hamyedə:”və həmonə(tevhidi dəlilon) çəmə huccət iyən burhon be ki,bə İbreymi(ə) çəy ğovmi mığobilədə əto kardemone.əmə harkəsi bıpyimone bə barzə dərəcəon bərosnomon ki,ıştı Xıdo hikməti soyb iyən əzıne”.bəçəy xoto həzrəte İbreym(ə) oxoyədə Ənami mıborəkə surə 79-ə şərifə ayədə de ğətiyyəti ıştə vıjniyə həmməysə çokə royku votedə:”beşək mı bə ikəsi dim qəteydəm ki,osmonon iyən zəminış bə vucud varde iyən və az bə ğərəz əv meyl pəydu nibəkardem iyən çı mışrikonku nibəbem”.de ın tərtibi çın ayəonku vey çok dərəsey beydə ki,ehanə İbreym(ə) çı peyğombərəti məğami bəpeştə bə vey barzə məğam ki,həmonə viloyəti məğame,rəse,bə seyri iləlllahədə bıə qıləy ruşdi dəlili xoto be.Əv Rəşid be və millətış bə vohidə Xıdo pərəstışi səmt hidoyət kardeşe.çımi mığobilədə Xıdovənde-Xalıığ Hudi mıborəkə surə 96-97-ə şərifə ayəonədə çı fironi qətə roy barədə jıqo hamyedə:”və ləğəd ərsəlna Mosə....əmə Mosəmon deştə ayəon iyən de oşkoə dəlion vığandemone.bə firon iyən bəçəy ətrofi səmt.əmmo əvon bəy tabe bin.qıləy holədə ki,fironi fərmon bə ruşd iyən nicoti boyis nıbe”.çoko ki,mılohizə kardedon Xıdovənd çı fironi ğovmi bəçəy əmron itoət kardeyış bə fironi əmri rəşid nıbey dəlili xoto,rədd və ğəbul kardedəni.binobərin əmə həm bəpe bə kəson tabe bıbəmon iyən pemandəmon ki,kifoyət ğədərədə qıləy ruşdi soyb bıbu....

Qıləy muminə şəxsi nəzəku Rəşid əkəse ki,çəy qırd sıxan,rəftor,mevğıyyət,vıjniyə ro,ibodət iyən mıomiləon çı din iyən Ğıroni royədə və bəştə bəsirət iyən hikməti əsos bə cokəson xıdmət kardeyədə bıbu.əkəs ıştəni de Rəşidi nomi dərostey bəzıne ki,çok iyən bədə koon çok-çoki bızıno.jıqo qıləy şəxs bə Xıdovəndi Kərimə-Ğıronədə bıə rahnumaəkə təlimon iyən peyğombəri sıxanon dığğət kardedə və Xıdovəndiku təmənno iyən tələb kardedə ki,həm əy bə İlahi itoət iyən məhəbbəti səmt hidoyətko və həmən əv kardey bızıno coqlə bandəon bə tevhidi roy tərəf hidoyətko.çın şəxson həmməysə çokə nımunəonku qıləyni İmom Huseyne(ə).ə həzrəti ziyodə ləğəbonış heste ki,çəvonku kali qıləyni de İmom Həsəni(ə) mıştərəke.bənə “seyyidi şəbabi əhlil-cənnə”.(vəhışti əhli cıvonon sərvər və əğə)bəzi qıləyniyon həm çımonku iborəte:Zəkiy,Təyyib,Vəfi,Seyyid,Mıborək,Nafiiyən Rəşid.bə şiəyon etığodi əsos İmom Huseyn(ə) çı Xıdovəndi “Rəşidi” ismi məzhəre və bəşəriyyoti çı zəlolət iyən cəholətiku xilos kardero bıə qıləy kəştiye.İmom Huseyn(ə) bo milləti bə ruşd iyən kəmoli səmt hidoyət kardero ıştə həmmə çiyonku dəvarde və bın royədə bə şəhodəti məğami rəse.....