İlahi əsma iyən nomon

İlahi əsma iyən nomon

İlahi əsma və nomonku coqıləyni Səbur nome.Səbur bə saxtiyon iyən muşkiloton tov vardey mənoədəy. Səburi kəlmə ərəbi ədəbiyyotədə muşəbbəhə sıfət bıə və həmişə səbrəkə və tov vardə kəsi mənoədəy. Xıdovəndi barədə səbr ğeyri-passivəti şikilədə və çı bandəon isyon iyən tuğyonqərəti mığobilədə və çəvon kufr iyən şırki təsiri ğəbul nıkardeye.inson eyni holədə ki,bəpe bə Xıdovəndi itoət iyən bandəçəti məsuliyyəyi əməlko,həmçinin bənə qıləy ixtiyori soyb bıə məxloğati bəştə kəc iyən inhirofə tələb iyən irodə əsos hərəkət kardedə və çı qıno iyən məsiyəti qırdəovədə ğərğ beydə.bın holədə Səburə Xıdovənd deməkə ki,ğudrətış heste ki,bilofosilə ıştə qınokor iyən cinoyətkorə bandəon çı miyoniku bıbo.əmmo de tobə mumkin bıə oxonə ləzon,bəvon fırsət doydə tayinki,bəlkəm əvon həxə roy pəydukon və çı zəlolətiku perəxon…..

Səburi ism məfhumi cəhəto bə Xıdovəndi Həlimi ismi neze.ım dıqlə kəlmə deməkə ki,urfi cəhəto iyande vırədə oko doey beydən və har dıqləku iqlə məno irodə beydə,de iyande tafutonış həm heste.Hilm insoni barədə şəxsi çı ğəzəbi həyəcon iyən hisson mığobilədə mənoədə iyən oroməti,xotırcəməti iyən səbri holəti bə dast vardeye.bəçəy xoto votey beydə:Hilm çı ğəzəbi mığobilədəy.əmmo Səbri qıləy komil iyən  hevujə mənoş heste və çı helmisə vey komilə məno soybe.çıro ki,səbr çı seqlə çiy mığobilədəy.qıləyni çı şəytoniyə vəsvəson iyən həvaye-nəfsi mığobilədə,dıminə qıləyni çı Xıdovəndi itoət iyən ibodəti saxtəti iyən muşkiloton mığobilədə və seminə qıləyni həm bəy nozil bıə çı mısibət iyən bəloon mığobilədə.joqo ki,səbrəkə şəxs həmonə zohiri oroməti iyən vuğar ki,çı hodisəon bənav hesteşbe,ijən çəy malik bıbu və ıştə zıvoni de şikoyəti oj nıko və ıştə əzonku qıləy anormal hərəkəton zohir nıko……

Xıdovənd Səbure və peyğombəron iyən çəvon tərəfdoron bə səbri səmt dəvət kardedə.Xıdovənd çı peyğombəron iyən çokə odəmon səbarzəti rəmzış dini təblıği zəmonədə bıə saxti iyən kaxtiyonədə səbrış bəyon kardə.bəçəy xoto Səbri kəlmə Kərimə-Ğıronədə 90 kərəsə ziyodə zikr bıə və har dəfə de mənfəət rosnə nuktəon bə ico bıə.çın ayəonku qıləyni ki,Bəğərə mıborəkə surə 153-ə şərifə ayədə omə ki, hamyedə:”Ya əyyuhəlləzinə...ha imon vardə kəson ha! səbr iyən nımojiku komək tələbkənən ki, Xıdopvənd de səbrəkəyone”.Əmirəl-Muminin həzrət Əli(ə) həm çı Səbri məğam iyən mənziləti bəyonədə jıqo hamyedə:”Ələykum bissəbri ....səbrkənən ki,çı səbr iyən imoni nisbət bənə sə iyən bədəni mandedə və çoko ki,besə tani qıləy foydəş ni,səbr nıbə holədə həm imoni qıləy foydəş ni”.....