Nəhcul-Bəlağə pand iyən hikməton

Nəhcul-Bəlağə pand iyən hikməton

3-ə hikmət.Əlbuxlu ğar vəl-cubnu mənğəsətun.vəlfəğru yuxrisul-fitən an(hacətihi)huccətih.vəlmuğilu ğərib fi bəldətihi.pəxıləti qıləy are və tars noğisətiye və tanqə dastəti çı zirəki zıvoni bo huccəti bəyoniro bıbasto və benəvo ıştə şəhrədə ğəribe.

Imruj  ziyodə fərdon boştə camiyə isloh,təhəvvul iyən əvəzon dumoye.əmmo ın təhəvvul iyən əvəzon çı fərdon təhəvvul iyən əvəzon nıbə holədə mıyəssər nibəbe.pəxıləti,tars iyən fəğrəti min cumlə maneyəonkuye ki,nəyinki,fərdi təxrib kardedə,bəlkəm çı fərdon de camiyə miyono rabitəon xərob kardedə və bə fərd iyən camiyə islohir mane beydə.

İmom(ə) Nəhcul-Bəlağə 3-ə hikmətədə bə ın amilon işorə kardedə və hamyedə:”Əlbuxlu ğar vəl-cubnu mənğəsətun.vəlfəğru yuxrisul-fitən an(hacətihi)huccətih.vəlmuğilu ğərib fi bəldətihi.pəxıləti qıləy are və tars noğisətiye və tanqə dastəti çı zirəki zıvoni bo huccəti bəyoniro bıbasto və benəvo ıştə şəhrədə ğəribe”.

Pəxıləti qıləy əxloği sıfəte ki,insoni çəy ixtiyorədə bıə çiyon xarciku ğədəğən kardedə və çı cud iyən səxovəti mığobilədə ğərol doydə.kamə zərfiyyəti soyb bıə inson bənə qıləy hırdəni ki,ıştə ixtiyorədə bıə çiyon çı cokəson ixtiyorədə ğərol doey zıneydəni və hozzı ni ki,Xıdo çəy ixtiyorədə ğərol doə çiyonku çı cokəson ixtiyorədə ğərol bıdo və ım boəy qıləy are.

Həmçinin pəxıl boyis beydə ki,camiyə ixtisodi mənbəonku veyni çı solimə ticori qardışiku xaric beydə və zəxirə iyən ambo şikilədə sıstə ticorət beydə.pəxılə fərdon bə dınyo mol və jimoni bıə ğeyri-məntıği dıl dəvastey və məhəbbəti xoto,iştimoyi təfəkkuri nəzəkuzəyif iyən ocizin və ım həm co qıləy are.İmom(ə) çı Malıik Əştəri məşhurə əhdnomədə bəy tevsiyə kardedə ki,hiçvaxti ıştə məşvərəti koyədə bə pəxılə odəmi ro nıdo.çıro ki,pəxılə odəm əy bə həxı tərk kardey səmt dəvət kardedə və çı dasti təyləti iyən fəğrətiku torsıneydə.

Tars çı insoni vucudi erj və ğeyətiku bə kam kardedə.qıləy tarsovə fərd bə zu iyən ğudrəti bovəş ni və çı cokəson mığobilədə qıləy zəyfəti hissi dəvordıneydən.əvon hiçvaxti ıştə potensiyal,ləyoğət iyən istedodonku çok-çoki oko doey zıneydəni.bəçəy xoto İmom(ə) hamyedə ki,tars bə noxsani səbəb beydə. qıləy tarsovə fərd çanədə mumin həm bıbu,əmmo bəştə tarsovəti səbəbi xoto,əve bənə qıləy komilə isnoni əməl kardey zıneydəni.odəmi dığğəti cəlbəkə çi ıme ki,çı mıttəğiyon İmom Əli(ə) Nəhcul-Bəlağə 53-ə şərifə nomədə bə Malıik Əştəri tevsiyə kardedə ki,hiçvaxti de tarsovə fərdi məşvərət məkə.

Əmirəl-Muminin Əli(ə) seminə hissədə bo muminon ıştə camiyə islohiro təşviğ kardey xoto,bə fəğrəti iyən bəçəy ziyon doə təsiron işorə kardedə və hamyedə:fəğrəti qıləy zırənqə insoni ıştə dəlili bəyon kardeyku lol kardedə.