Атамбоев Қозоғистон бўйича навбатдаги кескин баёнот билан чиқди

Энг камида уч минг йиллик тарихга эга халқ уч кунлик блокададан қўрқмайди ва бошқа давлатга хизмат қиладиган шахсни президент этиб танламайди, деди Қирғизистон раҳбари Алмазбек Атамбоев Боткенда ҳарбийлар учун учта кўп қаватли уйнинг очилиш маросимида чиқиш қилиб.

«Мен ҳозирда Қирғизистоннинг вилоятларига бормоқдаман, президент сифатидаги сўнгги учрашувларни ўтказмоқдаман. Бир кун олдин Таласда, кеча эса Ўш ва Жалолободда бўлдим. Бу 3 кун давомида мен Қирғизистон-Қозоғистон чегарасида рўй бераётган алғов-далғовликка гувоҳ бўлдим.     Биз хорижий ҳукуматлар ва олигархлар ўз вакилларини ўтказишга уринаётганини кўрмоқдамиз ", - деди у.

«Афсуски, бугунги кунда мамлакат ўз мустақиллигини нафақат чет эл қўшинларининг киритилиши билан, балки бошқаларга хизмат қиладиган қандайдир шахсни шунчаки сотиб олиш ва Қирғизистонга давлат раҳбари сифатида ўтказиш туфайли ҳам йўқотиши мумкинлигини кўрмоқдамиз. Лекин мен бу ҳеч қачон содир бўлмайди, деб биламан. Кимдир қўшни уйга ўт қўйишни хоҳласа, шамол ўзгариши мумкинлиги ва ўз уйи ҳам ёниб кетиши эҳтимоли борлигини унутмаслиги керак. Биз – қўшнилар тинчлик ва дўстликда яшашимиз, бир-биримизга ёрдам беришимиз керак.   Ҳеч ким ва ҳеч қачон икки биродар халқни бир-бири билан можарога боришига мажбурлай олмайди», - дея қўшимча қилиб ўтди А.Атамбоев.

«Қирғизларни сотиб олиш ёки қўрқитиш мумкин, деб ўйлаётганлар хато қилади. Қирғизлар учун ор-номус ҳаммасидан устун туради. Албатта, Қирғизистон армияси кучли ва биз ҳар бир қисмда жавоб қайтара оламиз, бироқ, кўриб турганингиздек, бошқа уруш, ахборот уруши, пул уруши бор, буни унутманг. Мустақилликни нафақат қурол-яроғ билан, балки ақл ва овоз бериш билан ҳам ҳимоя қилиш керак», - деди Қирғизистон раҳбари.