АҚШда терроризмда айбланиб қамалган ўзбекистонликка нисбатан қўшимча жазо муддати белгиланди

АҚШда террорчиларга молиявий ёрдам берганликда айбланиб 25 йил қамоқ жазосига маҳкум этилган ўзбек қочқини Фазлиддин Қурбоновга Калифорниядаги федерал қамоқхона назоратчисини ўлдириш учун қилган ҳаракати учун яна 20 йиллик жазо муддати белгиланди, деб хабар беради Associated Press.

Фарғона.ру сайтигакўра ҳукм 13 август куни Лос-Анжелос шаҳрида чиқарилди. Прокурор сўзларига кўра, судланувчи пичоқ тайёрлаб, назоратчини ўлдирмоқчи бўлганига иқрор бўлган. Бу қотиллик 2016 йили Калифорниянинг Викторвилл турмасида содир этилган. Назоратчи Келвин Джонсон (Calvin Johnson) қаттиқ тана жароҳатини олади, лекин тирик қолади. У даволаниб чиққанидан сўнг ўз ишини ўзгартирди, деб хабар беради KSL телеканали.

36 ёшли Қурбонов март ойида офицерни ўлдирмоқчи бўлганига иқрор бўлган. Суд мажлисида таржимон орқали бўлган мулоқотда у «назоратчи ўлимга лойиқ экани»ни айтиб, кечирим сўрашдан бош тортади. АҚШ Адлия вазирлигининг матбуот релизига кўра, судланувчи «Қўшма Штатларига нисбатан ўз адоватини яширмаган».

Тергов материалларидан шу нарса маълум бўладики, Қурбонов ва унинг ота-онаси мусулмон оиласида улғайиб ўсган. Кейинчалик Фазлиддиннинг ота-онаси православие динини қабул қилади ва оила Қозоғистонга қочиб ўтади. 2009 йили Қурбоновнинг ота-онаси АҚШга кўчиб келади. Шу йилнинг август ойида Фазлиддин Қурбонов ҳам хотини ва ўғлини олиб Америкага келади. Фазлиддин Америкада дастлаб православие динида бўлади, кейинчалик Колорадо штатининг Денвер шаҳрида бир гуруҳ ўзбек мусулмонлари билан танишгандан сўнг, яна ислом динига қайтади. 2011 йили у диний радикал оқимига қўшилиб кетади.

Қурбонов 2013 йили Айдахо штатида ҳибсга олинади, 2015 йили уни айбдор деб топадилар, 2016 йили январь ойида “Ўзбекистон ислом ҳаракати” террорчи ташкилотига молиявий ёрдам бермоқчи бўлгани ва рўйхатга олинмаган қуролга эгалик қилгани учун 250 минг доллар жарима билан 25 йиллик қамоқ жазосига ҳукм қилинади. Суриштирув жараёнида унинг ҳибсга олинишидан олдин Айдахо ва Техас штатларида теракт содир этиш учун бомба тайёрламоқчи бўлгани аниқланган.