Ўзбекистоннинг энг ёши улуғ кишиси 124 ёшда (видео)
Учта юз йиллик билан юзлашган момо мисоли тирик тарихнинг ўзи. Унинг паспортида туғилган куни санаси – 1895 йил 1 январь.
2018 йил сўнгида ёши улуғлар зиёратида бўлишни ният қилдик. Сарлавҳани ўқиб, кимдадир шубҳа ҳам пайдо бўлгандир... Бироқ, Фарғона вилояти, Бувайда тумани Қорақум қишлоғида яшайдиган 124 ёшли Ҳувайдо момо Умарова ҳақидаги маълумотларни ҳамқишлоқлари яхши билишади. Чунки, она уларнинг аждодлари билан ҳам бирга яшаган.
Ҳувайдо онанинг ҳали хотираси тиниқ, гаплари дадил. Унинг жамиятдаги эврилишлар – колхозлаштириш, қулоқлаштириш, иккинчи жаҳон уруши, очарчилик даврларини аниқ-тиниқ эслаб гапиришидан ҳайратга тушасиз. Сўзлаши ҳам бошқача. Қадимий лутф билан, шоирона…
“Авлодингизда узоқ яшаганлар бўлганми?” дея савол бераман. Момонинг авлодида бир асрдан мўл яшаганлар кўп бўлган экан. “Отам, Тошмат ота 101 ёшга кирган. Тоғам, Муллақодир 130 йил яшаган. Сайдинисо аммам эса 125 йил умр кўрган”, дейди онахон.
“16 ёшимда турмушга беришган. Биринчи рўзғоримдан фарзанд бўлмади. Иккинчисидан аввал кўрган икки фарзандимиз турли касалликлардан вафот этган. 1935 йили яна бир ўғил фарзанд Ҳошимжоним туғилди ва яшаб кетди. Жами уч қиз, тўрт ўғилни катта қилганмиз. Ҳозир 50 нафар невара, 71 чевара, 28 эварам бор”, дея сўзлайди момо. Тўғриси, Ҳувайдо онанинг яқинлари авлод ичида “бегона”лари ҳам бор эканлигини айтишди. Ҳозир момо кенжа ўғли Ҳусанбой ва келини Дилоромхонлар билан бирга истиқомат қилади.
Ҳужжатларга кўра, онахонни айни пайтда “Ўзбекистоннинг энг кекса кишиси” дейиш мумкин. Гиннес китобига киритиш, “Бувайдадаги узоқ умр кўриш” феномени билан эса илм кишилари шуғулланса, мақсадга мувофиқ бўлар эди.
